ភ្នំពេញ៖ ធនាគារជាតិនៃកម្ពុជាបានប្រកាសថា សាធារណជន អាច អញ្ជើញមកប្ដូរក្រដាសប្រាក់រៀល ចាស់ ទក់ រហែក ដោយមិនគិត កម្រៃសេវា នៅគ្រប់សាខាធនាគារជាតិនៃកម្ពុជា និងសាខាគ្រឹះស្ថាន ធនាគារ និងហិរញ្ញវត្ថុរាជធានី-ខេត្តទូទាំងប្រទេស នៅក្នុង អំឡុង ពេលយុទ្ធនាការ “ស្រឡាញ់ប្រាក់រៀល”ចាប់ពីថ្ងៃទី២០-២៩ ខែមីនា ឆ្នាំ២០២៤ វេលាម៉ោង៧:៣០ នាទីព្រឹកដល់ម៉ោង ៣:០០ នាទី រសៀល។ នេះបើយោងតាមសេចក្តីជូនដំណឹងនៅថ្ងៃអង្គារទី១៩ ខែមីនា។

សេចក្តីជូនដំណឹងដដែលបន្ថែមថា ក្នុងនាមជាអាជ្ញាធររូបិយវត្ថុជាតិ ធនាគារជាតិនៃកម្ពុជា ទទួលប្តូរក្រដាសប្រាក់ រៀលចាស់ ទក់ រហែក ដោយមិនគិតកម្រៃសេវា ជូនសាធារណជន នៅគ្រប់សាខាធនាគារ ជាតិនៃកម្ពុជា រាជធានី-ខេត្ត ចាប់ពីម៉ោង ៧:៣០ នាទី ដល់ម៉ោង ១១:០០ នាទី រៀងរាល់ថ្ងៃធ្វើការ ទោះជាមិននៅក្នុងអំឡុងពេល យុទ្ធនាការប្តូរប្រាក់រៀលក៏ដោយ។

ធនាគារជាតិនៃកម្ពុជាបានឆ្លៀតបញ្ចេញសារអំពាវនាវតាមរយៈសេចក្តីជូនដំណឹងរបស់ខ្លួនថា សូមចូលរួមចំណែក ប្រើប្រាស់ប្រាក់រៀល ឱ្យ កាន់តែទូលំទូលាយ ដើម្បីជាប្រយោជន៍ដល់សេដ្ឋកិច្ច និងសង្គមជាតិ នៃព្រះរាជាណាចក្រកម្ពុជា៕
ដោយ៖វណ្ណលុក