កំពង់ស្ពឺ៖ នៅព្រលប់យប់ថ្ងៃទី១៣ ខែកក្កដា ឆ្នាំ២០២០ កម្លាំងនគរបាលនៃផែនការងារប្រឆាំងបទល្មើស សេដ្ឋកិច្ចស្នងការនគរបាលខេត្តកំពង់ស្ពឺ ដោយមានការបញ្ជាពី លោក ឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ដឹកនាំដោយ លោកឧត្តមសេនីយ៍ត្រី ប៊ុត ចាន់តារា ស្នងការរង, លោកវរសេនីយ៍ឯក  ហេង  សំរេច នាយការិយាល័យនគរបាលប្រឆាំងបទល្មើសសេដ្ឋកិច្ច ដោយសហការជាមួយកម្លាំជំនាញផែនសន្តិសុខ និងអធិការដ្ឋាននគរបាលស្រុកឱរ៉ាល់ និងកម្លាំងប៉ុស្តិ៍នគរបាលរដ្ឋបាលសង្កែសាទប បានចុះបង្រ្កាបទីតាំង ឈើខុសច្បាប់ចំនួន០១កន្លែង នៅចំណុចចំការស្វាយចន្ទី នៅផ្លូវជាតិលេខ៤៤ ចន្លោះគីឡូម៉ែត្រ៥៤-៥៥ស្ថិតក្នុងភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ដោយគ្មានម្ចាស់នៅកន្លែងកើតហេតុ ។

លោកឧត្តមសេនីយ៍ទោ សម សាមួន ស្នងការនគរបាលខេត្ត បានឲ្យដឹងថា ក្រោយពីសមត្ថកិច្ចត្រួតពិនិត្យជាក់ស្តែងទីតាំងខាងលើរកឃើញ៖ ប្រភេទឈើជ្រុងចំរុះចំនួន ១៦១ ដើម, រថយន្តចំនួន ០៣ និងអេស្ការវ៉ាត់ទរ័ចំនួន ០១ គ្រឿង, ១-រថយន្តម៉ាក Hyundai ប្រភេទV1 មានទូកុងទីន័រ ស្លាកលេខ: ភ្នំពេញ3D-7657,ទី២-រថយន្តម៉ាកTriton ពណ៌ត្រីអុីស្លាកលេខ ខ.ម 2-1985, ទី៣-រថយន្តម៉ាក  Vigo ពណ៌ត្រីអុីពាក់ស្លាក លេខ: ខ.ម 2-9113,ទី៤-អេស្លារវ៉ាទរ័ ចំនួន០១ គ្រឿង,ម៉ូតូHonda Wave ពណ៌ទឹកសមុទ្រ ០១ គ្រឿង(គ្មានស្លាកលេខ) ។

សូមរំលឹកថា កន្លងមកធ្វើឱ្យមានការចាប់អារម្មណ៍ខ្លាំងនោះ គឺបន្ទាប់ពីសមត្ថកិច្ចបានតាមដានដើម្បីធ្វើការបង្ក្រាបឈើដែលលាក់ទុកក្នុងដីចំការ ឬស្សីមួយកន្លែង ដែលមហាជនប្រាប់ថាមានម្ចាស់តែមួយជាមួយករណីខាងលើ បែរជាមេឈ្មួញរូបនេះបានបាញ់កាំភ្លើងប្រមាណជិត១០ គ្រាប់ដើម្បីគំរាមលើសមត្ថកិច្ចរហូតដល់មានការស្នើសុំដីការចូលឆែកឆេរទីតាំងនេះតែម្តង ។ ការចុះឆែកឆេរទីតាំងស្តុកឈើរបស់មេឈ្មួញរូបនេះធ្វើឡើងនៅថ្ងៃទី១០ ខែកក្កដា ឆ្នាំ២០២០ នៅលើផ្លូវជាតិលេខ៤៤  ចំណុចស្ទឹងតាដុក (ចន្លោះបង្គោលគីឡូម៉ែត្រ៥៨ទៅលេខ៥៩ ក្នុងភូមិដំបងវេញ ឃុំសង្កែសាទបស្រុកឱរ៉ាល់ ខេត្តកំពង់ស្ពឺ ) ម្ចាស់ចំការមានឈ្មោះ ជឿង ថេង ជាមន្ត្រីយោធា ។

ក្នុងករណីបង្ក្រាបនោះសមត្ថកិច្ចបានដកហូតវត្ថុតាងឈើប្រម៉ាណ៣០កំណាត់ ដែលលាក់ទុកក្នុងទឹកប្រឡាយ ។ អ្វីដែលមហាជនចង់ដឹង និងដាក់ជាសំនួរថា មូលហេតុអ្វីបានជាមេឈ្មួញដែលប្រព្រឹត្តបទល្មើសដែលសមត្ថកិច្ចដឹងយ៉ាងច្បាស់ នៅតែបន្តរួចខ្លួន មិនត្រឹមតែរួចខ្លួនប៉ុណ្ណោះទេថែមទាំងបន្តប្រព្រឹត្តបទល្មើសកាន់សកម្មជាងមុនទៅទៀត ៕