តូក្យូ ៖ ប្រទេសជប៉ុន កាលពីថ្ងៃ ចន្ទ បានចាប់ផ្តើមដឹកជញ្ជូនឧបករណ៍បាញ់មីស៊ីល និងបរិក្ខារយោធាផ្សេងទៀតទៅកាន់កោះ មីណាមីតូរីស៊ីម៉ា ដែលជាកោះស្ថិតនៅចុងខាងកើតបំផុតរបស់ប្រទេសនេះ នៅក្នុងមហាសមុទ្រប៉ាស៊ីហ្វិក ដើម្បីត្រៀមធ្វើសមយុទ្ធបាញ់គ្រាប់ពិតនៅឆ្នាំ ២០២៧ ។

មូលហេតុដែលជប៉ុនបញ្ជូនសម្ភារៈសឹកសង្គ្រាមទៅកាន់កោះ មានចម្ងាយប្រហែល ២,០០០គីឡូម៉ែត្រ ភាគអាគ្នេយ៍នៃទីក្រុងតូក្យូមួយនេះ គឺស្ថិតក្នុងគោលបំណងពង្រឹងសមត្ថភាពយោធានៅតំបន់ប៉ាស៊ីហ្វិក ឆ្លើយតបការកើនឡើងសកម្មភាពកងទ័ពជើងទឹកចិននៅក្នុងតំបន់ ។

បើតាម ឆៃណា ដេលី, ក្រសួងការពារជាតិជប៉ុន បានប្រើប្រាស់នាវាដឹកជញ្ជូនឯកជនចេញដំណើរពីកំពង់ផែ ឈីបបា ក្បែរទីក្រុងតូក្យូ ដើម្បីដឹកជញ្ជូនឧបករណ៍បាញ់មីស៊ីល និងបរិក្ខារយោធាទាំងនោះ ទៅកាន់កោះ មីណាមីតូរីស៊ីម៉ា ។

ឧបករណ៍ដែលត្រូវបានដឹកជញ្ជូន រួមមាន ឧបករណ៍បាញ់មីស៊ីលប្រឆាំងនាវាចម្បាំងប្រភេទ ថាយ-១២ រួមជាមួយយន្តហោះគ្មានមនុស្សបើកឈ្លបយកការណ៍ខ្នាតមធ្យម សម្រាប់ការឃ្លាំមើល និងកំណត់ទីតាំងគោលដៅ ។

សម្រាប់កោះ មីណាមីតូរីស៊ីម៉ា ប្រទេសជប៉ុនមានគម្រោងសាងសង់ទីលានហ្វឹកហាត់បាញ់មីស៊ីលនៅលើកោះដាច់ស្រយាលគ្មានមនុស្សរស់នៅមួយនេះ ។ តួយ៉ាង ការធ្វើសមយុទ្ធបាញ់គ្រាប់ពិតលើកដំបូង គ្រោងនឹងចាប់ផ្តើមនៅក្នុងឆ្នាំ ២០២៧ ៕

ប្រភព ៖ China Daily ប្រែសម្រួល ៖ ឈឹម ទីណា