សម្តេចតេជោៈលោកទេសរដ្ឋមន្ត្រី ត្រាំ អ៊ីវតឹក ជាឥស្សរជនឆ្នើមមួយរូបដែលពេញមួយជីវិតបានរួមចំណែកយ៉ាង សកម្មជាមួយរាជរដ្ឋាភិបាលក្នុងកិច្ចការបម្រើជាតិមាតុភូមិប្រកបដោយស្មារតីទទួលខុសត្រូវខ្ពស់
ភ្នំពេញៈនៅរសៀលថ្ងៃទី១ខែមិថុនាឆ្នាំ២០២១នេះសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាផ្ញើសារចូលរួមរំលែកទុក្ខចំពោះមរណភាពរបស់ទេសរដ្ឋមន្ត្រី ត្រាំ អ៊ីវតឹក ។
ក្នុងសារបានបញ្ជាក់ថា” ខ្ញុំនិងភរិយា មានក្តីរំជួលចិត្តឥតឧបមា ដោយបានទទួលដំណឹងថាឯកឧត្តម ត្រាំ អ៊ីវតឹក ទេសរដ្ឋមន្ត្រីទទួលបន្ទុកបេសកកម្មពិសេស បានទទួលមរណភាពនៅរសៀលថ្ងៃអង្គារ ៦រោច ខែជេស្ឋ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី០១ ខែមិថុនា ឆ្នាំ២០២១ ក្នុងជន្មាយុ ៧៣ឆ្នាំ ដោយរោគាពាធ។
ក្នុងឱកាសប្រកបដោយសមានទុក្ខនេះ ខ្ញុំនិងភរិយាសូមសម្តែងនូវការសោកស្តាយ ស្រណោះអាឡោះអាល័យ សង្វេគស្ទើររកទីបំផុតគ្មានចំពោះការបាត់បង់ឯកឧត្តមទេសរដ្ឋមន្ត្រី ត្រាំ អ៊ីវតឹក គឺជាការបាត់បង់នូវស្វាមីប្រកបដោយ សង្គហធម៌ដ៏ល្អនិងជាការបាត់បង់ឪពុកជីតាប្រកបដោយព្រហ្មវិហារធម៌មិនចេះរីងស្ងួតព្រមទាំងជាការបាត់បង់នូវឥស្សរជនឆ្នើមមួយរូបដែលពេញមួយជីវិតបានរួមចំណែកយ៉ាងសកម្មជាមួយរាជរដ្ឋាភិបាលក្នុងកិច្ចការបម្រើជាតិមាតុភូមិប្រកបដោយស្មារតីទទួលខុសត្រូវខ្ពស់។
លោក ត្រាំ អ៊ីវតឹក ទេសរដ្ឋមន្ដ្រីទទួលបន្ទុកបេសកកម្មពិសេសបានទទួលមរណភាពនៅរសៀលថ្ងៃទី០១ ខែមិថុនា ឆ្នាំ២០២១នេះបន្ទាប់ពីបញ្ជូនមកពីព្យាបាលជំងឺនៅក្រៅប្រទេស។នេះបើតាមការជូនដំណឹងតាមបណ្តាញតេលេក្រាមរបស់ខុទ្ទកាល័យរបស់ទេសរដ្ឋមន្ដ្រីត្រាំ អ៊ីវតឹក។
បើយោងតាមមន្ដ្រីជាន់ខ្ពស់នៃក្រុមការងាររបស់ទេសរដ្ឋមន្ដ្រី ត្រាំ អ៊ីវតឹក បានប្រាប់បណ្ដាញព័ត៌មាន Fresh News ថា លោក ត្រាំអ៊ីវវតឹក បានដាក់ច្បាប់ឈប់សម្រាកពីការងាររយៈពេលជាងមួយខែមកហើយដើម្បីទៅសម្រាកព្យាបាលសុខភាពនៅក្រៅប្រទេស។
លោក ហុក រិទ្ធី បានប្រាប់ថា សពរបស់ទេសរដ្ឋមន្ដ្រី ត្រាំ អ៊ីវតឹក កំពុងតម្កល់ធ្វើបុណ្យនៅគេហដ្ឋានក្បែរមន្ទីរពេទ្យខេមម៉ា ស្ថិតក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ។
លោក ត្រាំ អ៊ីវតឹក មានអាយុ៧៣ឆ្នាំ គឺជាអតីតរដ្ឋមន្ដ្រីក្រសួងសាធារណការ និង ដឹកជញ្ជូននិងអតីតរដ្ឋមន្ត្រីក្រសួង ប្រៃសណីយ និងទូរគមនាគមន៍។ បច្ចុប្បន្នក្នុងតំណែងជាទេសរដ្ឋមន្ដ្រីទទួលបន្ទុកបេសកកម្មពិសេសលោក ក៏ជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកកំពង់លែង ខេត្តកំពង់ឆ្នាំង៕
