អាជ្ញាធរមានសមត្ថកិច្ច ក្រុមគ្រូពេទ្យជួរមុខនៃមន្ទីរពេទ្យបង្អែកសិរីសោភ័ណ កាលពីព្រឹកថ្ងៃទី០៧  រហូតដល់ថ្ងៃទី៨ ខែមិថុនា  ឆ្នាំ២០២១  បានបន្តយកសំណាកមនុស្សជាង១០០នាក់ ដែលមានទំនាក់ទំនង  និងចូលរួមពិធីភ្ជាប់ពាក្យ មួយអ្នកនៅភូមិ /សង្កាត់ កោះពងសត្វ ក្រុងសិរីសោភ័ណ។ ក្នុងនោះ លទ្ធផលតេស្តរហ័សបានរកឃើញថែមវិជ្ជមានកូវីដ ១៩ ម្នាក់ទៀត គឺកញ្ញា សុ សិវណ្ណធីតា មានទីលំនៅក្នុងភូមិតារាងបាល់សង្កាត់កំពង់ស្វាយ ក្រុងសិរីសោភ័ណ ។ នេះបើតាមលោកហ៊ឹល រ៉ាយ៉ា អភិបាលក្រុងសិរីសោភ័ណ បាន    អោយបញ្ជាក់អោយដឹង ។ លោកបានបន្តថា៖ ” ការមិនអនុវត្តតាមការណែនាំ (ជួបជុំ មិនរក្សាគម្លាតសង្គម មិនលាងដៃ បាញ់អាល់កុល មិនពាក់ម៉ាស…) គឺបែបនេះឯង ។ សូមចិត្តបងប្អូន ឈប់បាន ឈប់សិនទៅ  សូមអង្វរណា អាជ្ញាធរមិនទាន់អនុញ្ញាតិច្បាប់អោយធ្វើពិធីអាពាហ៍ពិពាហ័វិញនៅឡើយ ” ។

សូមរំលឹកថា រដ្ឋបាលក្រុងសិរីសោភ័ណបានអំពាវនាវ ដល់អ្នកចូលរួមភ្ជាប់ពាក្យកូនស្រីរបស់លោកស្រីតែម យិន នៅភូមិកោះពង់សត្វ សង្កាត់កោះពងសត្វ ក្រុងសិរីសោភ័ណ កាលពីព្រឹកថ្ងៃទី៤ ខែមិថុនា ឆ្នាំ២០២១ កន្លងទៅ សូមប្រញាប់ប្រញាល់មកយកសំណាក និងធ្វើចត្តាឡីស័ក ពីព្រោះលោកស្រី តែម  យិន  វិជ្ជមានកូវីត១៩ ។

សូមរំលឹកដែរថា នៅថ្ងៃទី៤  ខែមិថុនា  ឆ្នាំ២០២១ ដែលជាថ្ងៃតែមួយនោះ  អាជ្ញាធរក្រុងសិរីសោភ័ណ​បានធ្វើការប្រមូលអ្នកជាប់ពាក់ព័ន្ធ  ដែលធ្លាប់ជិះរថយន្តរបស់ឈ្មោះ  ចាន់ សុភក្ត្រ័ រស់នៅសង្កាត់ អូរអំបិល  ក្រុងសិរីសោភ័ណ  ដែលរត់តាក់ស៊ី នៅគោលដៅពីសិរីសោភ័ណ  ក្រុងប៉ោយប៉ែត   ក្រោយតេស្តរកឃើញវិជ្ជមានកូវិដ-១៩  ។

ក្នុងនោះអាជ្ញាធរបានប្រមូលអ្នកជាប់ពាក់ព័ន្ធដោយផ្ទាល់  និងប្រយោលបានចំនួន៥៩នាក់(ស្រី ៣១នាក់)  ដើម្បីយកសំណាក់វិភាគរកជម្ងឺកូវីដ-១៩  នៅមន្ទីរបង្អែកក្រុងសិរីសោភ័ណ  ជាលទ្ធផលរកឃើញអ្នកវិជ្ជមាន៤នាក់ ។

អ្នកទាំង៤នាក់ដែលរកឃើញវិជ្ជមាន  ៖  ១/ ចាន់  សុភ័ក្រ្ត  (អ្នករត់តាក់ស៊ី)  ភេទប្រុស  អា៣៣ឆ្នាំ  រស់នៅភូមិ អូរអំបិល  សង្កាត់អូរអំបិល ។ ២/ អៃ  សាស់  ហៅត្រិប  ភេទស្រី  អាយុ៣៩ឆ្នាំ  រស់នៅភូមិ  អូរអំបិល  សង្កាត់ អូរអំបិល ។  ៣/តែម  យិន ភេទស្រី  អាយុ ៤៧ឆ្នាំ  រស់នៅ ភូមិ កោះពងសត្វ  សង្កាត់ កោះពងសត្វ ។ ៤/តែម  ចំប៉ី  ភេទស្រី  អាយុ ៤៤ឆ្នាំ  រស់នៅ ភូមិ កោះពងសត្វ  សង្កាត់ កោះពងសត្វ ៕