អូហៃយ៉ូ៖ អតីតប្រធានាធិបតីសហរដ្ឋអាមេរិក លោក ត្រាំ (Trump) បានទៅធ្វើទស្សនកិច្ចនិងពិនិត្យទីតាំង ដែលកើតមានឧបទ្ទេវហេតុរថភ្លើង បើកធ្លាក់ផ្លូវ នៅរដ្ឋ អូហៃយ៉ូ (Ohio) ។

បេក្ខជនប្រធានាធិបតីសហរដ្ឋអាមេរិក ឆ្នាំ២០២៤ លោក ដូណាល់ ត្រាំ (Donald Trump)
បានធ្វើទស្សនកិច្ចនៅតំបន់ អ៊ីស ប៉ាឡេស្ទីន (East Palestine) នៃរដ្ឋ អូហៃយ៉ូ (Ohio) ជាកន្លែងដែលរថភ្លើងដឹកទំនិញបានធ្លាក់ផ្លូវ កាលពីដើមខែនេះ ដោយពេលនោះ បណ្តាលឱ្យមានការបញ្ចេញសារធាតុគីមីពុល នៅក្នុងដី ខ្យល់ និងទឹក នៅក្នុងរដ្ឋ អូហៃយ៉ូ (Ohio)។

អតីតប្រធានាធិបតីអាមេរិករូបនេះបានប្រាប់អ្នកស្រុកថា “យើងបានប្រាប់អ្នកយ៉ាងច្បាស់ហើយថា អ្នកមិនត្រូវបានបំភ្លេចទេ”។ លោក អតីតប្រធានាធិបតីអាមេរិករូបនេះបានប្រាប់ពលរដ្ឋអាមេរិកនៅក្នុងតំបន់ដូច្នោះ បន្ទាប់ពីការដោះស្រាយរបស់ប្រធានាធិបតីអាមេរិក បៃឌិន (Biden) អំពីឧប្បត្តិហេតុនេះ។

លោក ត្រាំ (Trump) បានបន្ថែមថា “ទំនួលខុសត្រូវដែលអ្នកសមនឹងទទួលបាន យើងនឹងមានគណនេយ្យភាព យ៉ាងច្បាស់” ។ រដ្ឋាភិបាលសហរដ្ឋអាមេរិក កាលពីថ្ងៃអង្គារ សប្តាហ៍នេះ បានបញ្ជាឱ្យក្រុមហ៊ុនផ្លូវដែក ន័រហ្វូក សោធឺន (Norfolk Southern) បង់ថ្លៃទាំងមូលនៃការសម្អាតរថភ្លើងដែលមានជាតិពុល នៅក្នុងរដ្ឋ អូហៃយ៉ូ (Ohio) ភាគខាងលិច។

ការធ្លាក់រថភ្លើងដឹកទំនិញ កាលពីថ្ងៃទី ៣ ខែកុម្ភៈ នៅនៅតំបន់ អ៊ីស ប៉ាឡេស្ទីន (East Palestine) បានបង្កឱ្យមានភ្លើងឆេះយ៉ាងសន្ធោសន្ធៅ និងបានបង្កឱ្យមានការបញ្ចេញផ្សែងពុល រួមមានទាំង ប្រភេទ វីនយ៉ល់ ឈ្ល័រ រ៉ាយ (vinyl chloride) ដែលជាឧស្ម័នគ្មានពណ៌ ចាត់ទុកថាជាសារធាតុបង្កមហារីក ផ្អែកតាមវិទ្យាស្ថានជាតិ មហារីក របស់អាមេរិក។ អ្នកស្រុកជាច្រើនពាន់នាក់ត្រូវបានជម្លៀសចេញ ខណៈដែលអាជ្ញាធរវាយតម្លៃពីគ្រោះថ្នាក់៕ ប្រភពពី AFP ប្រែសម្រួលដោយ៖ សារ៉ាត