ក្រសួងសុខាភិបាល៖ កម្ពុជាមិនមានអ្នកឆ្លងជំងឺកូវីដ១៩ឡើយ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឡើយ
ភ្នំពេញ៖ ក្រសួងសុខាភិបាលបានជូនដំណឹងថា ក្នុងរយៈពេលបុណ្យចូលឆ្នាំថ្មីប្រពៃណីជាតិខ្មែររយៈពេល៣ថ្ងៃកន្លងមកនេះ នៅទូទាំងប្រទេសមិនមានទិន្នន័យអ្នកឆ្លងជំងឺកូវីដ១៩ឡើយ ខណៈដែលមានការជួបជុំគ្នាទ្រង់ទ្រាយធំនៅស្ទើរគ្រប់រាជធានីខេត្ត។
តាមរបាយការណ៍របស់ក្រសួងសុខាភិបាលចុះថ្ងៃទី១៧ ខែមេសានេះបានបញ្ជាក់ថា គិតចាប់ពីថ្ងៃទី១៤ រហូតមកដល់ ថ្ងៃទី១៦ ខែមេសា ក្នុងអំឡុងពិធីបុណ្យចូលឆ្នាំប្រពៃណីខ្មែររយៈពេលបីថ្ងៃកន្លងមកនេះ កម្ពុជាមិនមានអ្នកឆ្លងថ្មីនៃជំងឺកូវីដ១៩នោះឡើយ។
ជាមួយគ្នានេះដែរ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល បានបានបង្ហោះសារលើបណ្ដាញធ្វីតធើ (Twitter) របស់លោកស្រីនាថ្ងៃទី១៥ ខែមេសាកន្លងមកដោយលើកឡើងថា លោកជំទាវមានការភ្ញាក់ផ្អើល និងមិនគួរឲ្យជឿថា មានមហាជនទៅដើរកម្សាន្តក្នុងពិធីបុណ្យចូលឆ្នាំខ្មែរ នៅខេត្តព្រៃវែងយ៉ាងច្រើនដូចនេះឡើយ។
លោកជំទាវបានបញ្ជាក់ថា កាលដែលអាចជួបជុំគ្នាបានដោយទ្រង់ទ្រាយធំបែបនេះ ក៏ដោយសារតែកត្តាសន្តិភាព និងបុគ្គលិកសុខាភិបាល ដែលបានចូលរួមប្រយុទ្ធប្រឆាំងនឹងជំងឺរាតត្បាតកូវីដ១៩។
លោកជំទាវ ឱ វណ្ណឌីន បានបន្តថា បើគ្មានសន្តិភាព និងការគ្រប់គ្រងដោយជោគជ័យនៃកូវីដ១៩ យើងមិនអាចឃើញប្រជាពលរដ្ឋយ៉ាងច្រើនចូលរួមកម្សាន្ត សប្បាយរីករាយបែបនេះទេ។ សូមថ្លែងអំណរគុណយ៉ាងជ្រាលជ្រៅចំពោះសន្តិភាព និងបុគ្គលិកសុខាភិបាល ដែលបានចូលរួមប្រយុទ្ធប្រឆាំងនឹងជំងឺរាតត្បាតកូវីដ១៩ ដើម្បីសង្គ្រោះជីវិត។
ទាក់ទិនរឿងនេះ លោក នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិតសភាកម្ពុជា បានប្រាប់នៅថ្ងៃទី១៧ ខែមេសាថា ទាំងនេះបង្ហាញថា កម្ពុជាអាចគ្រប់គ្រងបានល្អក្នុងរយៈពេលបុណ្យចូលឆ្នាំខ្មែរ ដែលមានការជួបជុំគ្នាជាលក្ខណៈទ្រង់ទ្រាយធំ ហើយបើទោះបីជាឥលូវនេះ មិនមានអ្នកឆ្លងថ្មីក៏ដោយ ក៏ប៉ុន្តែលោកថាត្រូវរង់ចាំមើលរយៈពេលមួយសប្ដាហ៍ទៀត ពីព្រោះជំងឺនេះវាមិនអាចឆ្លងបានភ្លាមៗនោះទេ។
លោក នុត សម្បត្តិ បន្តថា៖ «ខ្ញុំថាកម្ពុជានៅតែមិនទាន់អស់នៅឡើយទេនៃជំងឺកូវីដ១៩ ដែលយើងនៅតែបន្តប្រុងប្រយ័ត្នជាប់ជានិច្ច និងមិនអាចព្រងើយកន្ដើយបានទេ ពីព្រោះជំងឺកូវីដ១៩ ជាប្រភេទវីរុស វានៅជាប់ជាមួយខ្លួនយើង បើកាលណាយើងភ្លេចខ្លួន វានឹងវាយលុកមកលើខ្លួនយើង»។
ប៉ុន្តែប្រធានមជ្ឍមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានឱ្យដឹងថា ចំ ពោះអ្នកដែលឆ្លងជំងឺកូវីដ១៩ ជាទូទៅពួកគាត់មិនចាំបាច់ទៅមន្ទីរពេទ្យនោះទេ ដោយអាចទិញថ្នាំបង្ការ និងព្យាបាលដោយខ្លួនឯងបាន។
លោកបន្តថា ក្រៅពីនេះទៀត លោកក៏ជឿថា ពួកគាត់ក៏មិនចាំបាច់ទៅធ្វើតេស្តនៅមន្ទីរពេទ្យ ដើម្បីពិនិត្យរកជំងឺកូវីដ១៩ដែរ ព្រោះបច្ចុប្បន្នពលរដ្ឋអាចទិញឧបករណ៍តេស្តរកកូវីដ១៩ដោយខ្លួនឯងបាន ហេតុនេះទើបក្រសួងសុខាភិបាលថា ករណីវិជ្ជមានកូវីដ១៩មិនមាននោះឡើយ។
ទោះបីកម្ពុជាបានទប់ស្កាត់កូវីដ១៩ ទទួលបានជោគជ័យក៏ពិតមែន ប៉ុន្តែក្រសួងសុខាភិបាល និងអ្នកពាក់ព័ន្ធក៏ត្រូវតែបន្តចែករំលែកព័ត៌មានថ្មីៗពីស្ថានភាពជំងឺកូវីដ១៩ និងការវិវត្តនៃជំងឺនេះ ទៅកាន់ប្រជាពលរដ្ឋឲ្យបានដឹង ព្រោះជារឿងមួយដែលសំខាន់ ដោយមិនត្រូវព្រងើយកន្ដើយនោះទេ។ លោក យង់ គិមអេង បញ្ជាក់។
សូមបញ្ជាក់ថា គិតត្រឹមថ្ងៃទី១៧ ខែមេសា ឆ្នាំ២០២៣ កម្ពុជារកឃើញអ្នកឆ្លងជំងឺកូវីដ១៩ សរុបចំនួន១៣៨ ៧២៦ នាក់ អ្នកជាសះស្បើយសរុបចំនួន ១៣៥ ៦៦៩នាក់ និងអ្នកស្លាប់សរុបចំនួន ៣ ០៥៦នាក់។
ដោយឡែក អត្រានៃការចាក់វ៉ាក់សាំងបង្ការជំងឺកូវីដ១៩ នៅទូទាំងប្រទេស គិតត្រឹមថ្ងៃទី១៧ ខែមេសាឆ្នាំ២០២៣ លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាននាក់ មាន ៩៥,៥២ភាគរយ៕
ដោយ៖ជា សុខនី
