សៀមរាប៖ឯកឧត្តម ហ៊ុន​ ម៉ានី ប្រធានសហភាពសហព័ន្ធយុវជនកម្ពុជា (​ស.ស.យ.ក.) លើកឡើងថា ព្រឹត្តិការណ៍អង្គ​រ​​សង្ក្រាន្តឆ្នាំ២០២៣រយៈពេលបីថ្ងៃ បានបញ្ចប់ទៅប្រកបដោយជោគជ័យ ដែល​បានបន្សល់ទុកនូវស្នាមញ​ញឹមរាប់លានដល់ពលរដ្ឋខ្មែរពីគ្រប់ទិសទី។​

ឯកឧត្តម  ហ៊ុន​ ម៉ានី ឡើងលើកឡើងដូច្នេះតាមរយៈសំណេរលើទំព័រហ្វេសប៊ុកផ្លូវការរបស់លោកនៅថ្ងៃទី១៧ ខែមេសា ឆ្នាំ២០២៣ ខណៈពេលព្រឹត្តិការណ៍អង្គរសង្ក្រាន្តដែលបានប្រព្រឹត្តទៅពីថ្ងៃទី ១៤ ដល់១៦ ខែមេសា ហើយដែលរៀបចំដោយសហភាពសហព័ន្ធយុវជនកម្ពុជា(ស.ស.យ.ក.) នៅរមណីយដ្ឋានតំបន់អង្គរ ខេត្តសៀមរាប បានបិទបញ្ចប់ជាស្ថាពរ។​ គួរបញ្ជាក់ថា ព្រឹត្តិការណ៍អង្គរសង្ក្រាន្តនៅរដូវកាលចូលឆ្នាំប្រពៃណីខ្មែរក្នុងឆ្នាំ២០២៣ នេះ ជាខួបទី១០ ​នៃវត្តមានព្រឹត្តិការណ៍អង្គរសង្ក្រាន្តលើទឹកដីអង្គរដែលព្រឹត្តិការណ៍នេះបានពាំនាំយកនូវផ្ទាំងទស្សនីយភា​ពវប្បធម៌ ល្បែងប្រជាប្រិយខ្មែរ ទម្រង់របាំប្រពៃណីខ្មែរ កម្មវិធីសាសនា ​ពិសេសការស្រូបទាញជាគោលដៅទេសចរណ៍

និងកំណើនភ្ញៀវទេសចរជូនខេត្តសៀមរាប ជាមួយនឹង​ការបំបែកកំណត់ត្រាពិភពលោកជា​​ច្រើនសម្រាប់កម្ពុជា។​

ឯកឧត្តម ហ៊ុន​ ម៉ានី បានលើកឡើងដូច្នេះថា ៖ «១០ឆ្នាំមកនេះ យើងបានបង្កើតចំណងមិត្តភាព ភាតរភាព និ​​ងសាមគ្គីភាពយ៉ាងរឹងមាំ ហើយចេញពីអង្គរសង្រ្កាន្ត យើងក៏​បានបង្កើតសមិទ្ធិផលជាច្រើនផ្សេងទៀតរួមគ្នា​»។​

ឯកឧត្តមបន្តថា ក្នុងនាមតំណាងដល់សហភាពសហព័ន្ធយុវជនកម្ពុជា លោកសូមថ្លែងអំណរគុណដល់រដ្ឋាភិបាលកម្ពុជាក្រោមការដឹកនាំដោយសម្ដេចតេជោ ហ៊ុន សែន ដែលបានគាំទ្រនិងផ្តល់កិត្តិយសដោយចូលរួមជាអធិ​បតីភាពបើកអង្គពិធីនិងជាពិសេសកិច្ចខិតខំរបស់រដ្ឋាភិបាលលើការគ្រប់គ្រងជំងឺកូវីដ១៩ ដែលញ៉ាំងឲ្យកើតមានឱកាសរៀបចំព្រឹត្តិការណ៍អង្គរសង្រ្កាន្តបាន។

ប្រធានស.ស.យ.ក. រូបនេះក៏ឆ្លៀតថ្លែងអំណរគុណដល់គ្រប់ភាគីពាក់ព័ន្ធដែលបានចូលរួមចំណែកធ្វើឱ្យព្រឹ​ត្តិការណ៍អង្គរសង្រ្កាន្ត ខួប ១០ឆ្នាំ ប្រព្រឹត្តដោយជោគជ័យ ក្នុងនោះមានអាជ្ញាធរពាក់ព័ន្ធ ដែលបានជួ​យសម្របសម្រួល លោកគ្រូ អ្នកគ្រូ សាស្ត្រាចារ្យ សិល្បករ ដែល​បានចូលរួមតម្លើង និងសម្តែងផ្ទាំងទស្សនីយភាព និងអាជីវករ វិស័យ​​ឯកជន ដៃគូឧបត្ថម្ភ និងប្រជាពលរដ្ឋដែលបានដើរតួនាទីសំខាន់ក្នុងការទទួលភ្ញៀវទេសចរជាតិ និងអន្តរជាតិ។​

លោកបានបន្ថែមថា៖ «ចុងក្រោយ និងពិសេសជាងគេបំផុត គឺសូមអរគុណដល់ក្រុមគ្រួសារយុវជនស្ម័គ្រចិត្តគ្រប់ក្រុម បងៗសមត្ថកិច្ច ក្រុមគ្រូពេទ្យ បងៗអនាម័យ ក្រុមបច្ចេកទេស ដែលជាអ្នកអនុវត្តផ្ទាល់ក្នុងការងារធានានូវដំណើរការរបស់អង្គរសង្រ្កាន្ត។ អ្នកទាំងអស់គ្នានេះហើយ គឺជាមូលហេតុនៃស្នាមញញឹមរាប់លានក្នុងរយៈពេល ៣ថ្ងៃនេះ»។​

សូមជម្រាបជូនថា ព្រឹត្តិការណ៍អង្គរសង្ក្រាន្ត ខួប១០ឆ្នាំ ក្នុងឆ្នាំ២០២៣ នេះ បានបំបែកកំណត់ត្រាឯត​ទគ្គកម្មធំៗចំនួនពីរជាមួយស្ថាប័ន Guinness World Record គឺ «បេះដូងច្រើនជាងគេលើពិភពលោក» ដែលជាកំណត់ត្រាបត់បេះដូងក្រដាសចំនួន ៣ ៩១៧ ៨០៥ បេះដូង និងកំណត់ត្រា «រាំម៉ាឌីហ្សុនច្រើនជាងគេលើពិភពលោក» ដែលមានអ្នកចូលរួមរាំចំនួន៤ ៩៩៩ នាក់។

ជុំវិញបញ្ហានេះ លោក​ មាស នី អ្នកស្រាវជ្រាវការអភិវឌ្ឍន៍សង្គម មើលឃើញពីកិច្ចខិតខំប្រឹងប្រែងរបស់ស​ហ​ភាពសហព័ទ្ធយុវជនកម្ពុជា និង​ភាគីពាក់ព័ន្ធក្នុងដំណើរការកម្មវិធីអង្គរសង្ក្រាន្តនេះ ដោយលោកយល់ថា បា​នទទួលសមិទ្ធផលល្អច្រើនបូករួមការកោតសរសើរពីរង្វង់ប្រជាពលរដ្ឋខ្មែរភាគច្រើនក្នុងការរំលេចក​ម្ម​វិធីនានាសំដៅលើកកម្ពស់វប្បធម៌ខ្មែរ និងបានស្រូបទាញកំណើនទេសចរក្នុងអំឡុងរដូវចូលឆ្នាំប្រ​ពៃណី​ខ្មែរនេះ។

​លោកបានបន្ត​ថា មិនត្រឹមតែនៅសៀមរាបប៉ុណ្ណោះទេ នៅបណ្តាខេត្តផ្សេងៗទៀតក៏មានការបង្កើតព្រឹ​ត្តិការណ៍ស្រដៀងៗគ្នានេះដែរ។​

លោក​ មាស នី យល់ថា ការបង្កើតព្រឹត្តិការណ៍ទាំងនេះ ជាកត្តាជំរុញចរន្តកំណើនសេដ្ឋកិច្ចជាតិ ជាមួយលំហូ​​រភ្ញៀវទេសចរជាតិ និងអន្តរជាតិ និងការបង្កើនប្រាក់ចំណូលជូនដល់មូលដ្ឋានតាមរយៈវិស័យទេ​សចរណ៍ក្នុងស្រុកនេះ។

លោកបាន​ថ្លែងថា ៖ «ធម្មតាទេ កាលណាមានភ្ញៀវទេសចរធ្វើដំណើរចុះឡើង​ទៅស្នាក់នៅ ទៅកម្សាន្ត​។អ៊ីចឹង វាតែងធ្វើឲ្យសេដ្ឋកិច្ចតាមមូលដ្ឋានហ្នឹងវាដើរហើយ។ បើយើងនិយាយពីចរន្តសេដ្ឋកិច្ច កាលណាមា​នមនុស្សធ្វើដំណើរចុះឡើងច្រើន មានមនុស្សដើរចាយលុយ នោះសេដ្ឋកិច្ចនឹងកម្រើកឡើងវិញ»​៕

ដោយ៖សំបាន ច័ន្ទដារ៉ា