តូក្យូ៖ប្រធានាធិបតីអាមេរិក លោក ចូ បៃដិន (Joe Biden) បាន ធ្វើដំណើរទៅដល់ទីក្រុងហ៊ីរ៉ូស៊ីម៉ា (Hiroshima) ប្រទេសជប៉ុន ហើយ ដើម្បីចូលរួមកិច្ចប្រជុំកំពូលរបស់ប្រទេសទាំងប្រាំពីរ ឬហៅថា G7 Summit។ កិច្ចប្រជុំកំពូលនេះត្រូវបានគេយល់ឃើញថា បញ្ហា សង្រ្គាមឈ្លានពានរបស់រុស្ស៊ីទៅលើទឹកដីអ៊ុយក្រែន និងការកើនឡើង ឥទ្ធិពលរបស់ប្រទេសចិនក្នុងតំបន់ នឹងក្លាយជាកម្មវត្ថុសំខាន់ សម្រាប់ កិច្ចពិភាក្សា។

នៅក្នុងអំឡុងពេលកិច្ចប្រជុំនៅទីក្រុងហ៊ីរ៉ូស៊ីម៉ានេះ លោក បៃដិន ត្រូវបានគេរំពឹងថានឹងខិតខំបញ្ចុះបញ្ចួលបណ្តាប្រទេសទាំង ៦ ផ្សេងទៀត ក្នុងការដាក់សម្ពាធទៅលើទីក្រុងមូស្គូបន្ថែម ដើម្បី បញ្ចប់សង្រ្គាមនៅអ៊ុយក្រែន និងចូលរួមរាំងខ្ទប់ឥទ្ធិពល របស់ ទីក្រុងប៉េកាំង។

គួរដឹងដែរថា កាលពីល្ងាចថ្ងៃព្រហស្បតិ៍ លោក បៃដិន បានចូល ជួបពិភាក្សាទ្វេភាគីជាមួយម្ចាស់ផ្ទះនៃកិច្ចប្រជុំកំពូលនេះ គឺលោក នាយករដ្ឋមន្ត្រីជប៉ុន ហ្វ៊ូមីអូ គីស៊ីដា (Fumio Kishida) មុនពេល ដែលកិច្ចប្រជុំកំពូលត្រូវបានប្រព្រឹត្តទៅជាផ្លូវការរយៈពេលបីថ្ងៃ ចាប់ពីថ្ងៃទី១៩ ដល់ថ្ងៃទី២១ ខែឧសភា ឆ្នាំ២០២៣។

នៅព្រឹកថ្ងៃសុក្រនេះ លោក គីស៊ីដា បានប្រកាសបើកកិច្ចប្រជុំ និងស្វាគមន៍មេដឹកនាំក្រុមប្រទេសទាំង ៧ ជាផ្លូវការនៅឯឧទ្យាន អនុស្សាវរីយ៍សន្តិភាពហ៊ីរ៉ូស៊ីម៉ា ជាទីក្រុងដែលធ្លាប់ទទួលរងការ ទម្លាក់គ្រាប់បែកបរមាណូលើកដំបូងពីសហរដ្ឋអាមេរិក នៅថ្ងៃទី៦ ខែសីហា ឆ្នាំ១៩៤៥។

គួរបញ្ជាក់ថា សមាជិកនៃក្រុមប្រទេសទាំង ៧ មានដូចជា ប្រទេសកាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងសហរដ្ឋអាមេរិក។ កិច្ចប្រជុំនេះនឹងមានវត្តមានប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) ចូលរួមតាម អនឡាញ ផងដែរ។ បណ្ដាប្រទេសទាំងអស់នេះត្រូវបានគេរំពឹងថា នឹងប្រកាស ដាក់ទណ្ឌកម្មថ្មីបន្ថែមទៀត ប្រឆាំងនឹងរុស្ស៊ី និងដាក់ចេញនូវ វិធានការ ដោះស្រាយបញ្ហាសេដ្ឋកិច្ចផ្សេងៗដែលបង្កឡើងដោយប្រទេសចិន។

ក្រុមប្រទេសលទ្ធិប្រជាធិបតេយ្យ ដែលសុទ្ធតែជាមហាអំណាច សេដ្ឋកិច្ចនេះ ក៏ត្រូវបានគេរំពឹងផងដែរថានឹងលើកយកបញ្ហា ជាច្រើនទៅពិភាក្សា ក្នុងនោះរួមមាន ការរំសាយអាវុធនុយក្លេអ៊ែរ បញ្ញាសិប្បនិមិត្ត ការប្រែប្រួលអាកាសធាតុ សន្តិសុខសេដ្ឋកិច្ច និងការធ្វើឱ្យប្រសើរឡើងនូវកិច្ចសហប្រតិបត្តិការជាមួយប្រទេសកំពុងអភិវឌ្ឍន៍ និងបញ្ហាផ្សេងៗជាច្រើនទៀត។

ខណៈពេលដែលប្រទេស G7 ទំនងជានឹងបង្កើនការដាក់ សម្ពាធ ទៅលើទីក្រុងមូស្គូ និងទីក្រុងប៉េកាំង ប៉ុន្តែការដាក់សម្ពាធធ្ងន់កម្រិត ណានោះ គេមិនទាន់ដឹងនៅឡើយទេ ដោយហេតុថាប្រទេសទាំង ៧ ហាក់មិនមានការចុះសម្រុងគ្នាត្រង់ចំណុចនេះនៅឡើយ។ ជាក់ស្ដែង ប្រទេសជប៉ុន និងបណ្តាប្រទេសនៅអឺរ៉ុបត្រូវបានគេមើល ឃើញថា មានការស្ទាក់ស្ទើរ ក្នុងការកាត់បន្ថយការធ្វើពាណិជ្ជកម្មជាមួយរុស្ស៊ី និងចិន ឱ្យដូចទៅនឹងអ្វីដែលរដ្ឋាភិបាលក្រុងវ៉ាស៊ីនតោនចង់បាន។

កាលពីខែមុន យោងតាមកាសែត Financial Times បាន រាយការណ៍ ថា ប្រទេសជប៉ុន និងបណ្តាប្រទេសនៅអឺរ៉ុបបានច្រាន ចោលសំណើរបស់សហរដ្ឋអាមេរិកដែលបានស្នើសុំឱ្យបញ្ឈប់ការនាំចូលពីរុស្ស៊ី ដោយជប៉ុន និងបណ្ដាប្រទេសនៅអឺរ៉ុបបានចាត់ទុកថា វាជារឿងដែលមិនទំនង និងមិនសមហេតុផលទាល់តែសោះ។ កន្លងមក អ្នកការទូតនៅអឺរ៉ុបក៏ធ្លាប់បានលើកឡើងពីការព្រួយ បារម្ភអំពីសំណើររបស់សហរដ្ឋអាមេរិក ឱ្យបិទបំពង់បង្ហូរឧស្ម័ន ធម្មជាតិពីរុស្ស៊ីជាអចិន្ត្រៃយ៍ផងដែរ។

គួរកត់សម្គាល់ដែរថា លោក បៃដិន បាននិងកំពុងចូលរួមក្នុង កិច្ចប្រជុំកំពូលរបស់ក្រុមប្រទេសទាំង ៧ បន្ទាប់ពីលោកបាន លុបចោលផែនការដំណើរទស្សនកិច្ចទៅកាន់ប្រទេសប៉ាពូអាស៊ី នូវែលហ្គីណេ (Papua New Guinea) និងប្រទេសអូស្ត្រាលី ដើម្បីត្រឡប់ទៅសហរដ្ឋអាមេរិកវិញទាន់ពេលចូលរួមប្រជុំសភាអាមេរិកស្ដីពីការបង្កើនកម្រិតបំណុលរបស់រដ្ឋាភិបាលសហរដ្ឋអាមេរិក៕
ប្រែសម្រួលដោយ៖ ធា សុណា

ប្រភពព័ត៌មាន៖ Al Jazeera US President Joe Biden arrives in Japan for G7 summit