ខេត្តទេសចរណ៍សំខាន់ៗចំនួនពីរទទួលបានភ្ញៀវទេសចជាងមួយសែននាក់ នៅកំលុងពេលឈប់សម្រាកបោះឆ្នោត
ភ្នំពេញ៖ ខេត្តព្រះសីហនុ និងខេត្តកំពត ទទួលភ្ញៀវទេសចរសរុបបានជិតមួយសែននាក់ នៅចុងសប្តាហ៍កន្លងមកនេះ។ ជាសប្តាហ៍ដែលរាជរដ្ឋាភិបាលបានអនុញ្ញាតឱ្យប្រជាពលរដ្ឋ បានឈប់សម្រាកក្នុងរយៈពេលបីថ្ងៃ ដើម្បីទៅចូលរួមបោះឆ្នោតជ្រើសតាំងតំណាងរាស្រ្តនីតីកាលទី៧ ឆ្នាំ២០២២៣។
ប្រធានមន្ទីរទេសចរខេត្តព្រះសីហនុ លោក តាំង សុចិត្រគ្រឹះស្នា បានប្រាប់ឱ្យដឹងនៅថ្ងៃទី២៥ ខែកក្កដា ថា នៅចុងសប្តាហ៍កន្លងទៅដែលចំថ្ងៃបោះឆ្នោតជ្រើសតាំងតំណាងរាស្រ្តនីតិកាលទី៧ មានប្រជាពលរដ្ឋចេញកម្សាន្តច្រើនជាងសប្តាហ៍មុនៗ ជាពិសេសថ្ងៃទី២៣ និងថ្ងៃទី២៤ខែកក្កដា។ ប្រជាពលរដ្ឋដែលចេញទៅកម្សាន្តនោះ ភាគច្រើនជាពលរដ្ឋនៅខេត្តព្រះសីហនុ ដែលបានធ្វើដំណើរទៅបោះឆ្នោត ហើយឆ្លៀតទៅកម្សាន្តនៅតាមឆ្នេរសមុទ្រផងដែរ ដោយក្នុងរយៈពេលពីរថ្ងៃ ពោលគឺថ្ងៃទី២៣ និង២៤ ខែកក្កដាមានពលរដ្ឋទៅកម្សាន្តនៅខេត្តព្រះសីហនុប្រមាណជិតប្រាំពីរម៉ឺននាក់។
ទន្ទឹមនឹងនេះដែរ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានបង្ហាញពីការភ្ញាក់ផ្អើល និងបានរៀបរាប់ដែរថា លោកស្ទើរតែនឹកស្មានមិនដល់ថា នៅក្នុងថ្ងៃបោះឆ្នោត នាសប្តាហ៍កន្លងទៅមានភ្ញៀវទេសចរមកកម្សាន្តនៅខេត្តកំពតច្រើន ក្នុងរង្វង់ជាងបីម៉ឺននាក់ ខណៈដែលរៀងរាល់ចុងសប្តាហ៍មានត្រឹមតែជាងពីរម៉ឺននាក់ប៉ុណ្ណោះ។
លោក សយ ស៊ីណុល បានបញ្ជាក់បន្ថែមថា ៖ «យើងមិននឹកស្មានថា មានពលរដ្ឋទៅកំសាន្តច្រើនដល់ម្លឹងទេ ក្នុងអំឡុងពេលឈប់សម្រាកថ្ងៃបោះឆ្នោត៣ថ្ងៃនោះ។ រមណីយដ្ឋានទេសចរណ៍ដែលទទួលបានទេសចរច្រើនជាងគេ នៅថ្ងៃនោះរួមមាន ភ្នំបូកគោ តំបន់ទឹកឈូរ និងទំនប់ម្លិចជាដើម»។
លោកបានបន្តទៀតថា ទោះបីជាជំងឺកូវីដ១៩ បានធូរស្រាលហើយក៏ពិតមែន ប៉ុន្តែមន្ទីរទេសចរណ៍ខេត្តកំពត មិនដែលធ្វេសប្រហែសម្តងណាឡើយ ក្នុងការអនុវត្តតាមការណែនាំរបស់ក្រសួងទេសចរណ៍ក្នុងការអនុវត្តវិធានការពារនានា ដើម្បីចៀសវាងនូវការផ្ទុះឡើងជាថ្មីនៃវីរុសកូវីដ១៩នេះ។
ទាក់ទងនឹងដំណើរកម្សាន្តនេះដែរ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានប្រាប់ថា វាជាភាពវិជ្ជមានមួយ ដែលពលរដ្ឋចេញដើរលេងកម្សាន្តក្រោយពេលបោះឆ្នោតរួច ដែលនេះសបញ្ជាក់ឱ្យឃើញថា ប្រជាជនមិនមានក្តីបារម្ភពីបញ្ហាអសន្តិសុខអ្វីនោះទេ នៅអំឡុងពេលបោះឆ្នោត។
លោកបានបញ្ជាក់ថា ៖ «ជាការពិតណាស់ ភាពវិជ្ជមាន ដែលយើងបានឃើញ គឺការទុកចិត្ត ការជឿលើសមត្ថភាពរបស់អ្នកដឹកនាំ។ ប្រទេសខ្លះពេលបោះឆ្នោត មានបញ្ហាអសន្តិសុខកើតឡើងច្រើន ដូចជាប្រទេសជិតខាងយើង មានការធ្វើបាតុកម្មតវ៉ាជាដើម។ ប៉ុន្តែសម្រាប់ប្រទេសយើងវិញ ពលរដ្ឋបែរជារីករាយនឹងដំណើរកម្សាន្តក្រោយពេលបោះឆ្នោត ដែលនេះបញ្ជាក់ឱ្យឃើញថា កំណើនទេសចរ កើនឡើងទៅបាន ដោយសារសន្តិភាព»។
បើតាមក្រសួងទេសចរណ៍កាលពីចុងសប្ដាហ៍ទី២ខែកក្កដាកន្លងទៅ ទូទាំងប្រទេសទទួលបានភ្ញៀវជិត៣០ម៉ឺននាក់ ដោយ គោលដៅទេសចរណ៍សំខាន់ៗ រួមមាន ខេត្តព្រះសីហនុ ៦៦,៥៥៧នាក់, បាត់ដំបង ៣៥,៦៦៤នាក់, រាជធានីភ្នំពេញ ៣៣,២១១នាក់, កំពត ២៧,៦៧៥នាក់, សៀមរាប ២២,៥៣៥នាក់, កំពង់ស្ពឺ ១៤,២៥៣នាក់, ពោធិ៍សាត់ ១១,២៧៧នាក់ និងខេត្តកែប ១១,០៧៦នាក់។
ចំនួនភ្ញៀវទេសចរ មានការកើនឡើងប្រមាណ ៣,១៥ភាគរយ ធៀបនឹងសប្តាហ៍កន្លងមក ក្នុងនោះភ្ញៀវជាតិ កើនឡើង ៣,៤ភាគរយ និងភ្ញៀវអន្តរជាតិ កើនឡើង ១,៣៦ភាគរយ៕ដោយ៖វណ្ណ សុជាតា
