រាជរដ្ឋាភិបាលកម្ពុជា នឹងអនុវត្តបន្ថែមនូវកម្មវិធីជំនួយសង្គមថ្មីៗមួយចំនួនទៀត ក្នុងឆ្នាំ ២០២៤ ខាងមុខ
ភ្នំពេញ៖ ប្រធានក្រុមប្រឹក្សាភិបាលមូលនិធិជាតិជំនួយសង្គមឯកឧត្តម សំហេង បុរស រដ្ឋមន្រ្តីប្រតិភូអមនាយករដ្ឋមន្ត្រី និង ជាប្រធានក្រុមប្រឹក្សាភិបាលមូលនិធិជាតិជំនួយសង្គម បានលើកឡើងថា សម្រាប់ឆ្នាំ ២០២៤ ខាងមុខនេះដែរ កម្មវិធីមួយចំនួននៃមូលនិធិជាតិជំនួយសង្គមក៏នឹងចាប់ផ្តើមបញ្ចប់ ហើយការអនុវត្តនូវកម្មវិធីជំនួយសង្គមថ្មីៗផ្សេងទៀតក៏នឹងចាប់ផ្តើមបន្ថែម។
ឯកឧត្តម សំហេង បុរស បានប្រាប់អ្នកសារព័ត៌មាន នាសប្តាហ៍មុន ដោយបានលើកឡើងដែរថា នៅក្នុងឆ្នាំ ២០២៣នេះ រាជរដ្ឋាភិបាលបានចំណយថវិកាប្រមាណជា១០ភាគរយនៃថវិកាជាតិ ក្នុងការជួយទៅដល់កម្មវិធីជំនួយសង្គមនានាទៅដល់ប្រជាពលរដ្ឋដែលងាយរងគ្រោះ ស្រ្តីមានផ្ទៃពោះ កុមារ និងមន្រ្តីរាជការស៊ីវិលចូលនិវត្ត និងអតីតយុទ្ធជនជាដើម។
លោកមានប្រសាសន៍ថា ៖ «នៅឆ្នាំ២០២៤ ខាងមុខនេះ គម្រោងឧបត្ថម្ភរបស់រាជរដ្ឋាភិបាលមួយចំនួននឹងត្រូវបានបញ្ចប់ ចឹងការអនុវត្តនូវការចំណាយថវិកាក៏នឹងមានការប្រែប្រួលខ្លះដែរ ប៉ុន្តែទន្ទឹមនឹងនោះយើងក៏នឹងមានការដាក់ចេញនូវគម្រោងថ្មីៗបន្ថែមទៀត»។
លោកបានបន្តថា ៖ «ខ្ញុំគិតថាគម្រោងដែលនឹងត្រូវអនុវត្តសម្រាប់ប្រជាជនយើងគឺយើងបានដឹងខ្លះហើយដោយសម្តេចធ្លាប់បានប្រកាសរួចហើយ ក្នុងនោះមានកម្មវិធីឧបត្ថម្ភសាច់ប្រាក់ជូនយុវជនក្រីក្រប្រមាណ ១,៥លាននាក់ ដែលនេះជាគម្រោងថ្មីមួយ ហើយនឹងអនុវត្តដោយក្រសួងការងារ»។
មួយវិញទៀតឯកឧត្តម សំហេង បុរស ក៏បានបញ្ជាក់ដែរថា ក្នុងនោះក៏អាចនឹងមានកម្មវិធីមួយថ្មីទៀតគឺកម្មវិធីកញ្ចប់គ្រួសារ ដែលអាចនឹងដាក់បញ្ចូលក្នុងមូលនិធិជាតិជំនួយសង្គមផងដែរ ដោយមកដល់ពេលនេះការរៀបចំត្រៀមនូវយុទ្ធសាស្រ្តថ្មីរបស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត គឺលោកបានដាក់បញ្ជាជាបឋមតាមយុទ្ធសាស្រ្តនោះ ដោយលោកបានរក្សានូវគម្រោងដើមស្ទើរតែទាំងអស់។
ឯកឧត្តម សំហេង បុរស បានបញ្ជាក់ថា ៖ «លើសពីនោះ ឯកឧត្តមបណ្ឌិត ហ៊ុន ម៉ាណែត ក៏បានដាក់ចេញបន្ថែមទៀតនូវនីតិវិធីមួយចំនួនដែលលោកបានកំណត់ គឺនឹងមានការអនុវត្តបន្ថែមទៀត។ ដូចនេះ កិច្ចការរបស់មូលនិធិជំនួយសង្គមនេះនឹងក្លាយទៅជាអង្គស្ថាប័នស្នូលមួយដើម្បីអនុវត្តនូវយុទ្ធសាស្រ្តថ្មីរបស់រដ្ឋាភិបាលដែលនឹងចាប់បដិសន្និនៅពេលថ្មីៗខាងមុខនេះ»។
ទាក់ទងនឹងការបញ្ចប់ និងការអនុវត្តនូវកម្មវិធីឧបត្ថម្ភថ្មីៗបន្ថែមទៀត ឯកឧត្តម សំហេង បុរស មិនទាន់អាចបញ្ជាក់លំអិតបាននោះទេថាតើជាកម្មវិធីអី្វនោះនៅឡើយទេ៕
បើតាមឯកឧត្តម សំហេង បុរស មូលនិធិជាតិជំនួយសង្គម ជាស្ថាប័នថ្មីទើបបង្កើតឡើង ដែលមានភារកិច្ចពិសេសក្នុងការអនុវត្តកម្មវិធីជំនួយសង្គមនានា ក៏ដូចជាការបើកផ្ដល់ប្រាក់សោធនជូនមន្រ្តីរាជការស៊ីវិលចូលនិវត្ត និងអតីតយុទ្ធជនទូទាំងប្រទេសផងដែរ។
កម្មវិធីជំនួយសង្គម ដែលបាននឹងកំពុងអនុវត្តមានដូចជា៖ កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោមពីរឆ្នាំ ជាកម្មវិធីអចិន្ត្រៃយ៍, កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះកំឡុងពេលប្រយុទ្ធប្រឆាំងជំងឺកូវីដ១៩ ដែលជាកម្មវិធីមិនអចិន្ត្រៃយ៍ និងកម្មវិធីឧបត្ថម្ភផ្សេងៗទៀត។
សូមបញ្ជាក់ដែរថា «កម្មវិធីកញ្ចប់គ្រួសារ» គឺជាកម្មវិធីមានលក្ខណៈអចិន្រៃ្តយ៍សម្រាប់ឧបត្ថម្ភជាសាច់ប្រាក់រៀងរាល់ខែជូនគ្រួសារក្រីក្រតាមប្រភេទនៃមុខសញ្ញាចំនួន ៥ រួមមាន ស្រី្តមានផ្ទៃពោះ និងកុមារក្រោមអាយុ ២ ឆ្នាំ ជនមានពិការភាព មនុស្សចាស់ចាប់ពីអាយុ ៦០ ឆ្នាំឡើងទៅ អ្នកផ្ទុកមេរោគអេដស៍ និងអាហារូបករណ៍ដល់សិស្សក្រីក្រចាប់ពីថ្នាក់ទី ១ ដល់ថ្នាក់ទី ១២៕ដោយ៖ជា សុខនី
