កសិករចង់ឱ្យស្រូវផ្ការំដួល ស្ថិតក្នុងតម្លៃសមរម្យនារដូវច្រូតកាត់នៅខែវិច្ឆិកាខាងមុខនេះ
ភ្នំពេញ៖ កសិករ ដាំដុះស្រូវផ្ការំដួលនៅតាមបណ្តាខេត្តនានា បានសំណូមដល់ក្រសួងកសិកម្មឱ្យជួយរក្សាតម្លៃស្រូវផ្ការំដួល ឱ្យស្ថិតនៅក្នុងតម្លៃមួយសមរម្យ នារដូវប្រមូលផលក្នុងខែវិច្ឆិកាខាងមុខនេះ ខណៈដែលក្រសួងក៏កំពុងជំរុញឱ្យមានការផលិតពូជស្រូវល្អ សែនក្រអូប និងផ្ការំដួល ដើម្បីឆ្លើយតបនឹងតម្រូវការទីផ្សារផងដែរ។
ក្នុងរយៈពេលប៉ុន្មានខែចុងក្រោយនេះ ការឡើងថ្លៃប្រភេទស្រូវIR និងOM បានធ្វើឱ្យកសិករដែលដាំដុះស្រូវប្រភេទនេះ មានសេចក្តីត្រេកអរយ៉ាងខ្លាំង ប៉ុន្តែក្រោយមកស្ថានភាពនៃតម្លៃស្រូវនេះ ក៏បានត្រឡប់មករកសភាពធម្មតាវិញ។ ដំណាលគ្នានេះដែរ កសិករដែលដាំដុះស្រូវប្រភេទ ផ្ការំដួល ដែលនឹងត្រៀមប្រមូលផលក្នុងរយៈពេលពីរខែខាងមុខទៀតនេះ ចង់ឱ្យក្រសួងកសិកម្ម និងភាគីពាក់ព័ន្ធ គិតគូរជួយរក្សាលំនឹងតម្លៃស្រូវផ្ការំដួល ព្រោះពួកគាត់បារម្ភថា វានឹងមានតម្លៃទាបនៅពេលមានការប្រមូល។
លោក ជា សាន កសិករ ដាំដុះស្រូវផ្ការំដួលនៅស្រុកកញ្ចៀច ខេត្តព្រៃវែង បានប្រាប់ឱ្យដឹងនៅថ្ងៃទី១២ ខែកញ្ញាថា ប្រភេទស្រូវផ្ការំដួលនេះ គេអាចដាំដុះបានត្រឹមតែម្តងប៉ុណ្ណោះក្នុងមួយឆ្នាំ ព្រោះជាប្រភេទស្រូវប្រកាន់រដូវ ហើយការដាំដុះត្រូវការថែទាំខ្លាំងជាងស្រូវធម្មតា (IR និងOM) និងពឹងផ្អែកច្រើនលើទឹកភ្លៀង។
មិនត្រឹមតែប៉ុណ្ណោះ លោកថា សម្រាប់ពូជវិញកសិករ មិនទុកធ្វើពូជខ្លួនឯងបានទេ ដោយពូជត្រូវទិញពីស្ថានីយផលិតពូជរបស់ក្រសួងកសិកម្ម ឬទិញពីសហគមន៍ ព្រោះការទុកប្រើខ្លួនឯងនឹងធ្វើឱ្យគុណភាពស្រូវមិនល្អ មិនទទួលបានពូជសុទ្ធ នៅពេលលក់ឈ្មួញនឹងទំលាក់ថ្លៃ។
លោកបានប្រាប់ដូច្នេះថា ៖ «ដាំស្រូវរំដួលនេះ យើងប្រើដើមទុនច្រើន និងចំណាយពេលវេលាក្នុងការថែទាំដិតដល់ណាស់។ ជាទូទៅ ស្រូវរំដួលលក់បានថ្លៃជាងស្រូវ IR និងOM ចន្លោះពី១០០រៀលទៅ១៥០រៀល ដូចនេះ បើ IR និងOMឡើងថ្លៃ រំដួលក៏លក់បានថ្លៃទៅតាមហ្នឹងដែរ។ ឥឡូវ IR និងOM បានធ្លាក់ថ្លៃបន្តិចមកវិញហើយ ចឹងយើងបារម្ភថា ដល់ពេលច្រូតកាត់ស្រូវផ្ការំដួល តម្លៃស្រូវទាបជាងនេះទៀត»។
ចំណែក លោក ឃុន សាអែម ប្រធានសហគមន៍កសិកម្មបាភ្នំមានជ័យ បាននិយាយដែរថា មិនថាស្រូវប្រភេទផ្ការំដួល, IR ឬOMនោះទេ បើសិនជាមានការសម្រុកច្រូតដំណាលគ្នាក្នុងពេលតែមួយ ច្បាស់ណាស់ឈ្មួញប្រាកដទម្លាក់តម្លៃមិនខាន។ ហេតុដូចនេះហើយ ទើបសហគមន៍តែងតែប្រាប់ដល់សមាជិក កុំឱ្យមានការច្រូតដំណាលគ្នាក្នុងពេលតែមួយ។
លោកបានបញ្ជាក់ថា ៖ «ស្រូវផ្ការំដួលនេះ ថ្វីត្បិតតែមានតម្លៃល្អមែន តែនៅពេលកសិករប្រមូលផលដំណាលគ្នា វាអាចនឹងធ្លាក់ថ្លៃដែរ។ កសិករខ្លះ ប្រមូលផលតាមគ្នា ទាំងដែលស្រូវមិនទាន់ទុំល្អក៏មាន។ ដូចនេះ សូមឱ្យខាងក្រសួង និងមន្ទីរជួយផ្សព្វផ្សាយដល់កសិករបន្ថែមទៀត កុំឱ្យមានការប្រមូលផលដំណាលគ្នាក្នុងពេលតែមួយ ដែលធ្វើឱ្យឈ្មួញតម្លៃថ្លៃបានតាមចិត្ត»។
លោកបានបន្ថែមថា សម្រាប់ខេត្តព្រៃវែង តំបន់ដែលមានការដាំដុះស្រូវផ្ការំដួលច្រើនជាងគេ គឺមានស្រុកចំនួនបី រួមមានស្រុក ស្វាយអន្ទរ, កំចាយមារ និងកញ្ច្រៀច ដោយសារតែស្រុកទាំងនេះនៅឆ្ងាយពីប្រភព និងពឹងផ្អែកលើទឹកភ្លៀងទើបគេដាំដុះស្រូវប្រភេទនេះច្រើន ខណៈដែលតំបន់ដទៃទៀតដែលនៅក្បែរប្រភពទឹកគេមិននិយមដាំស្រូវរំដួលទេ គេដាំIR និងOM ដែលធ្វើបាន២ទៅ៣ដងក្នុងមួយឆ្នាំ ចំណេញជាង។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានប្រាប់ឱ្យដឹងដែរថា ចំពោះតម្លៃស្រូវផ្ការំដួល ឡើងចុះកម្រិតណានោះ វាអាស្រ័យដល់ពេលប្រមូលផលសិនទើបអាចដឹងបាន ប៉ុន្តែលោកថា ជាធម្មតា ស្រូវប្រភេទនេះ ថ្លៃជាងស្រូវធម្មតា ដូច្នេះបើស្រូវIR និងOM ឡើងថ្លៃ ស្រូវរំដួលក៏ឡើងទៅតាមនេះដែរ។
បើក្រឡេកទៅមើលរបាយការណ៍នាំចេញអង្កររបស់សហព័ន្ធស្រូវអង្ករកម្ពុជា ក្នុងរយៈពេល៨ខែក្នុងឆ្នាំ២០២៣នេះ ការនាំចេញអង្ករក្រអូបប្រភេទ ផ្ការំដួល សម្រេចបានជាង៨០ភាគរយ តែបើមើលការដាំដុះរបស់កសិករវិញឃើញថា នៅមានតិចតួចប៉ុណ្ណោះសម្រាប់ប្រភេទស្រូវផ្ការំដួលនេះ។
ជុំវិញចំណុចនេះ លោកលន់ យ៉េង បានពន្យល់ថា ៖ «ផ្ការំដួល ជាស្រូវប្រកាន់រដូវ ទិន្នផលទាប ពឹងទឹកភ្លៀង និងមួយឆ្នាំធ្វើបានម្តង។ គេដាំ IR និងOMច្រើន ព្រោះធ្វើបាន២ទៅ៣ដង ហើយងាយស្រួលលក់ទៅវៀតណាម ព្រោះវៀតណាមទិញតែស្រូវធម្មតាទេ»។
កន្លងទៅរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា បានជំរុញការប្រើប្រាស់ពូជស្រូវសុទ្ធ ពូជស្រូវល្អ សែនក្រអូប និងផ្ការំដួល ដែលជាពូជស្រូវយុទ្ធសាស្ត្ររបស់ខ្មែរ។
ក្នុងពេលចុះពិនិត្យកសិដ្ឋានផលិតពូជស្រូវ និងសហគមន៍កសិកម្ម ក្នុងខេត្តបាត់ដំបង កាលពីថ្ងៃទី១០ ខែកញ្ញាកន្លងទៅថ្មីៗនេះ ឯកឧត្តមរដ្ឋមន្រ្តីបានលើកឡើងថា ជាយន្តការ គឺចាំបាច់ត្រូវមានការចូលរួម ការសហការគ្នាល្អ ការកសាងនូវបណ្តាញពូជស្រូវសុទ្ធ ពិសេសពូជស្រូវសែនក្រអូប និងផ្ការំដួល ដែលមានតម្លៃថ្លៃ មានការចុះបញ្ជី មានវិញ្ញាបនបត្រត្រឹមត្រូវ និងមានខ្សែច្រវាក់ទីផ្សារល្អ។
ឯកឧត្តម ឌិត ទីណា បានជំរុញឱ្យកសិដ្ឋានផលិតស្រូវពូជ និងសហគមន៍កសិកម្ម នៅក្នុងខេត្តបាត់ដំបង ត្រូវយកចិត្តទុកដាក់ផលិតពូជស្រូវល្អ សែនក្រអូបនិងផ្ការំដួល ដើម្បីឆ្លើយតបនឹងតម្រូវការទីផ្សារនិងការប្រើប្រាស់, ត្រូវធ្វើការផ្សព្វផ្សាយចលនាពូជសុទ្ធ និងជំរុញការប្រើប្រាស់ពូជសុទ្ធឱ្យកាន់តែធំទូលាយ ទាំងអ្នកប្រើស្រូវចំណី ដើម្បីពង្រីកឱ្យធំ ព្រោះមានទីផ្សារពូជស្រូវល្អ និងតម្លៃល្អ។
ឯកឧត្តមបានបញ្ជាក់ថា ៖ «ការជ្រើសរើសពូជស្រូវសុទ្ធ សែនក្រអូប និងផ្ការំដួល គឺជួយដល់អ្នកផលិតពូជសុទ្ធ និងបង្កើនផលចំណេញសម្រាប់ទាំងអស់គ្នា។ ក្រសួងនឹងជួយជំរុញឱ្យមានការសហការ សម្របសម្រួលជាមួយអាជ្ញាធរ និងរោងម៉ាស៊ីនកិនស្រូវពីទីផ្សារ និងតម្លៃនេះ»៕ វណ្ណ សុជាតា
