អ្នកជំនាញអ.ស.ប ស្នើសហរដ្ឋអាមេរិកកុំឱ្យផ្គត់ផ្គង់គ្រាប់បែកចង្កោមដល់អ៊ុយក្រែន
អ.ស.ប៖ អ្នកជំនាញរបស់អង្គការសហប្រជាជាតិ(អ.ស.ប)កាលពីថ្ងៃពុធបានស្នើឱ្យសហរដ្ឋអាមេរិកពិចារណាឡើងវិញនូវការសម្រេចចិត្តរបស់ខ្លួនលើការផ្គត់ផ្គង់គ្រាប់បែកចង្កោមដល់អ៊ុយក្រែន ដោយនិយាយថា វាអាចបង្កគ្រោះថ្នាក់ដល់ជនស៊ីវិលរាប់ទសវត្សរ៍ក្រោយជម្លោះបញ្ចប់ទៅ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
លោកស្រី Alice Jill Edwards អ្នករាយការណ៍ពិសេសរបស់អ.ស.ប បានថ្លែងក្នុងលិខិតរបស់ខ្លួនទៅកាន់រដ្ឋាភិបាលសហរដ្ឋអាមេរិកថា គ្រាប់បែកចង្កោមធ្វើឱ្យជនស៊ីវិលរងរបួសយ៉ាងធ្ងន់ធ្ងរ ទាំងក្នុងអំឡុង និងក្រោយជម្លោះ ហើយមិនគួរយកវាទៅប្រើប្រាស់ឡើយ។
លោកស្រី Edwards បានបន្តថា៖ «ខ្ញុំសូមអំពាវនាវដោយគោរពដល់រដ្ឋាភិបាល ឱ្យពិចារណាឡើងវិញនូវការសម្រេចចិត្តផ្ទេរគ្រាប់បែកចង្កោម និងបញ្ឈប់ផែនការណាមួយចំពោះការអនុវត្តការសម្រេចចិត្តបែបនេះ»។
លិខិតរបស់លោកស្រី Edwards ចេញផ្សាយតែប៉ុន្មានថ្ងៃប៉ុណ្ណោះ បន្ទាប់ពីមន្រ្តីអាមេរិកបាននិយាយថា រដ្ឋបាលលោក បៃដិន ជិតនឹងអនុម័តលើការដឹកជញ្ជូនមីស៊ីលរយៈចម្ងាយឆ្ងាយដែលផ្ទុកដោយគ្រាប់បែកចង្កោម ទៅកាន់អ៊ុយក្រែន ដើម្បីផ្តល់ឱ្យទីក្រុងកៀវ នូវអាវុធដែលអាចបង្កការខូចខាតយ៉ាងធ្ងន់ធ្ងរដល់កងទ័ពរុស្ស៊ីដែលគ្រប់គ្រងលើទឹកដីអ៊ុយក្រែន។
តាមពិតទៅ គ្រាប់បែកចង្កោមត្រូវបានហាមឃាត់មិនឱ្យប្រើប្រាស់ដោយប្រទេសជាង ១០០ ។ ប៉ុន្តែ រុស្ស៊ី អ៊ុយក្រែន និងសហរដ្ឋអាមេរិក មិនស្ថិតនៅក្នុងចំណោមប្រទេសដែលបានចុះហត្ថលេខាលើអនុសញ្ញាស្តីពីគ្រាប់បែកចង្កោម ដែលហាមឃាត់ការផលិត ការស្តុកទុក ការប្រើប្រាស់ និងការផ្ទេរអាវុធប្រភេទនេះទេ។
ជាធម្មតា គ្រាប់បែកចង្កោមបញ្ចេញគ្រាប់បែកតូចៗជាច្រើនគ្រាប់ ដែលអាចសម្លាប់ជីវិតដោយមិនរើសមុខនៅលើទីលានវាយប្រហារបានធំទូលាយ។ គ្រាប់ដែលមិនទាន់ផ្ទុះក្នុងអំឡុងពេលវាយប្រហារ អាចបង្កគ្រោះថ្នាក់ក្នុងរយៈពេលវែងបន្ទាប់ពីជម្លោះបញ្ចប់ទៅ។
កន្លងមក មានសេចក្ដីរាយការណ៍ថា ទាំងរុស្ស៊ី និងអ៊ុយក្រែន សុទ្ធតែបានប្រើប្រាស់អាវុធប្រភេទនេះ ដើម្បីធ្វើការវាយប្រហារគ្នាទៅវិញទៅមក៕
ប្រែសម្រួល៖ ហួន ឌីណា
ប្រភព៖ UN expert urges US not to supply Ukraine with cluster munitions https://www.channelnewsasia.com/world/un-expert-urges-us-not-supply-ukraine-cluster-munitions-3786366
