ភ្នំពេញៈ ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល បានបញ្ជាក់ថា ការរៀប​ចំ​វគ្គបណ្តុះបណ្តាលស្តីពី «ភាពជាអ្នកដឹកនាំ និងនវានុវត្តន៍» នាពេលនេះ គឺជាផ្នែកមួយនៃការឆ្លើយតបតាមចក្ខុវិស័យ និងការចង្អុល​បង្ហាញ​របស់សម្តេចធិបតី នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេស​លើវិធានការគន្លឹះ ត្រង់ចំណុចទី២គឺ «ការពង្រឹងសមត្ថភាព និង​សមិទ្ធកម្មស្ថាប័នដើម្បីលើកកម្ពស់គុណភាពការងារ ប្រកបដោយវិន័យ សីលធម៌ វិជ្ជាជីវៈ ប្រសិទ្ធភាព និងស័ក្តិសិទ្ធិភាព» ដែលក្រសួង​មុខងារសាធារណៈដើរតួនាទីជាលេខាធិការដ្ឋានសម្រាប់គណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភា។ការបញ្ជាក់នេះ ក្នុងពិធីបើកវគ្គបណ្តុះបណ្តាលស្តីពី«ភាពជាអ្នកដឹកនាំ និង​នវានុវត្តន៍» នាព្រឹកថ្ងៃទី៤ ខែតុលា ឆ្នាំ២០២៣។

ឯកឧត្តមរដ្ឋមន្ត្រី បានកោតសរសើរសាលាភូមិន្ទរដ្ឋបាល ដែលបានវិវឌ្ឍខ្លួនជាបន្តបន្ទាប់ក្នុងបេសកកម្ម បណ្តុះបណ្តាលអនាគតអ្នកដឹកនាំ ទាំងថ្នាក់ជាតិ និងថ្នាក់ក្រោមជាតិ ឲ្យទទួលបាននូវចំណេះដឹង និងបទពិសោធន៍ថ្មីៗបន្ថែមទៀត ស្របទៅតាមការវិវត្តឥតឈប់ឈរនៅក្នុងតំបន់ និងអន្តរជាតិ ដើម្បីឆ្លើយតបនឹងតម្រូវការចាំបាច់របស់ប្រជាពលរដ្ឋ និងសង្គម។

ឯកឧត្តម ហ៊ុន ម៉ានី បានចែករំលែកចំណុច និងខ្លឹមសារ ០៣ សំខាន់ដែលជាទស្សនៈ និងបទពិសោធន៍របស់ឯកឧត្តមផ្ទាល់ ជូនដល់អង្គ​សិក្ខាកាម ក្នុងនោះរួមមាន៖ (១)ស្មារតី ដឹកនាំសកម្មភាព La conscience determine l’ action ការចេះប្រើប្រាស់ចំណេះដឹង​ឱ្យ​​ត្រូវតាមបរិបទ និងស្របតាមលទ្ធភាព និងមធ្យោបាយដែលមានក្នុងដៃ និង(៣) គុណភាពនៃអ្នកដឹកនាំ ដែលត្រូវការចាំបាច់កត្តាបី គឺចក្ខុវិស័យ ជំនាញ និងអត្តចរិត។ ពាក់ព័ន្ធនឹងភាពជាអ្នកដឹកនាំ ឯកឧត្តមបានលើកឡើងដែរថា ក្នុងនាមជាមន្ត្រីរាជការស៊ីវិល ត្រូវការ​ក្តាប់ឱ្យ​បាននូវចក្ខុវិស័យរបស់រាជរដ្ឋាភិបាល បន្តសម្រួចនូវចំណេះជំនាញជាបច្ចេកទេសក្នុងការបំពេញភារកិច្ច ឱ្យស្របតាមបរិបទជា​ពិសេសការប្រើប្រាស់បច្ចេកវិទ្យាដើម្បីសម្រួលដល់ការសម្រេចសមិទ្ធផលអោយបានច្រើន និងការប្រកាន់ភ្ជាប់អត្តចរិកទន់ភ្លន់ ហ្មត់ចត់​ក្នុងការបំពេញការងារ៕ដោយ៖ពលជ័យ

ចំណែកលោក Bryan Fornari នាយកផ្នែកសហប្រតិបត្តិការ នៃសហភាពអឺរ៉ុបប្រចាំប្រទេសកម្ពុជាបានឡើងមានមតិស្វាគមន៍គណៈអធិបតី និងអង្គសិក្ខាកាម ដោយធ្វើការរៀបរាប់ពីសាវតារនៃកិច្ចសហប្រតិបត្តិការ ព្រមទាំងគម្រោងកន្លងមកដែលធ្លាប់បានរៀបចំក្រោមកិច្ចសហការជាមួយក្រសួងមុខងារសាធារណៈ និងសាលាភូមិន្ទរដ្ឋបាល។

រីឯឯកឧត្តម យក់ ប៊ុនណា រដ្ឋលេខាធិការប្រចាំការ និងជានាយកសាលាភូមិន្ទរដ្ឋបាល បានថ្លែងរបាយការណ៍ ផ្តើមចេញពីការបង្ហាញពីគោលបំណងនៃវគ្គបណ្ដុះបណ្ដាល ដំណើរប្រព្រឹត្តទៅ និងភាពជោគជ័យដែលទទួលបានកន្លងមក ព្រមទាំងក្តីរំពឹងសម្រាប់វគ្គបណ្ដុះបណ្ដាលភាពជាអ្នកដឹកនាំ និងនវានុវត្តន៍ ជំនាន់ទី៥។ ឯកឧត្តមបានបញ្ជាក់ថា សាលាភូមិន្ទរដ្ឋបាល បានរៀបចំវគ្គបណ្តុះបណ្តាលនេះជូនដល់សិក្ខាកាមជាន់ខ្ពស់បានចំនួនបួនជំនាន់មកហើយ ដែលជាលទ្ធផល សិក្ខាកាមចំនួន៦៥៧នាក់(ស្រី១១១នាក់) បានឆ្លងកាត់វគ្គបណ្តុះបណ្តាលដោយជោគជ័យ។ ដោយឡែក សម្រាប់ «វគ្គបណ្តុះបណ្តាលភាពជាអ្នកដឹកនាំ និងនវានុវត្តន៍» ជំនាន់ទី៥ នាពេលនេះ នឹងធ្វើការបណ្ដុះបណ្ដាលសិក្ខាកាមជាន់ខ្ពស់ដែលមានមុខតំណែងចាប់ពីប្រធាននាយកដ្ឋាន រហូតដល់រដ្ឋលេខាធិការ ឬមុខតំណែងប្រហាក់ប្រហែល អភិបាលក្រុង ស្រុក នាយករដ្ឋបាល ខេត្ត ឬមុខតំណែង​ប្រហាក់ប្រហែល តាមបណ្ដាក្រសួង ស្ថាប័ន ចំនួន៣៣ និងរដ្ឋបាលថ្នាក់ក្រោមជាតិចំនួន ២៥រាជធានី-ខេត្ត សរុបចំនួន១៩៧នាក់។ ការបណ្ដុះបណ្ដាលមានរយៈពេល ៧សប្ដាហ៍ ដោយ ៦សប្ដាហ៍ សិក្សាតាមប្រព័ន្ធអនឡាញ និង ១សប្ដាហ៍តម្រូវឱ្យសិក្ខាកាម​មកសិក្សាផ្ទាល់នៅសាលា៕ ដោយ៖ពលជ័យ