ប្រទេសកាតាកំពុងបន្តដឹកនាំការចរចាររវាងអ៊ីស្រាអែលនិងក្រុមហាម៉ាស់
កាតា៖ បើយោងតាមប្រភពមួយបានឱ្យដឹងថា ប្រទេសកាតាកំពុងបន្តសម្របសម្រួល ការចរចាររវាងអ៊ីស្រាអែល និងក្រុមហាម៉ាស់ កាលពីថ្ងៃទី២៨ ខែតុលា កន្លងទៅនេះក្នុងគោលដៅបន្ថយការប្រយុទ្ធគ្នានៅតំបន់ហ្គាហ្សា បើទោះជាអ៊ីស្រាអែលបានបង្កើនការវាយលុករបស់ខ្លួនទៅលើតំបន់នោះក៏ដោយ។
ទីភ្នាក់ងារព័ត៌មានរ៉យទ័របានបញ្ជាក់ថា ប្រភពខាងលើនេះស្នើសុំនិយាយក្នុងលក្ខខណ្ឌមិនបញ្ចេញឈ្មោះដោយសារតែភាពរសើបនៃការចរចា។
ប្រជាជននៅតំបន់ហ្គាហ្សានាពេលនេះ ស្ទើរតែគ្មានទំនាក់ទំនងអ្វីសោះជាមួយពិភពខាងក្រៅ ខណៈដែលយន្តហោះអ៊ីស្រាអែលបានបន្តទម្លាក់គ្រាប់បែកបន្ថែមទៀតទៅលើក្រុមហាម៉ាស់។ លើសពីនេះទៅទៀតមេទ័ពអ៊ីស្រាអែលបាននិយាយថា ការវាយលុកតាមផ្លូវគោកកំពុងរៀបចំឡើង។
គួរឱ្យដឹងដែរថា កាតាបាននិងកំពុងដឹកនាំការចរចាផ្នែកការទូតនៅពីក្រោយឆាកអស់រយៈពេលជាងបីសប្តាហ៍ដោយមន្ត្រីកាតាព្យាយាមនិយាយទៅកាន់មន្ត្រីក្រុមហាម៉ាស់ និងអ៊ីស្រាអែល ដើម្បីឱ្យលើកកម្ពស់សន្តិភាព និងធានាការដោះលែងចំណាប់ខ្មាំងជាង ២០០ នាក់ដែលក្រុមហាម៉ាស់ និងក្រុមប្រដាប់អាវុធផ្សេងទៀតកំពុងកាន់កាប់នៅតំបន់ហ្គាហ្សា។
ជាលទ្ធផលមកទល់ពេលនេះ តាមរយៈការសម្រុះសម្រួលរបស់ប្រទេសកាតា កាលពីសប្តាហ៍មុនបានធ្វើឱ្យក្រុមហាម៉ាស់បានដោះលែងចំណាប់ខ្មាំងជនជាតិអាមេរិកពីរនាក់ម្តាយ និងកូនស្រី រួមទាំងស្ត្រីចំណាស់ជនជាតិអ៊ីស្រាអែល ២នាក់ផងដែរ។
ស្របពេលជាមួយគ្នានេះដែរនាយករដ្ឋមន្ត្រីអ៊ីស្រាអែល លោក បេនចាមីន ណេតានយ៉ាហ៊ូ(Benjamin Netanyahu)បាននិយាយកាលពីថ្ងៃសៅរ៍ដែរថា កិច្ចខិតខំប្រឹងប្រែងដើម្បីធានាឱ្យមានការដោះលែងចំណាប់ខ្មាំងនឹងបន្ត សូម្បីតែក្នុងអំឡុងពេលនៃការវាយលុកតាមដែនគោលដៅចូលទៅតំបន់ហ្គាហ្សាក៏ដោយ។
ចំណែកឯភាគីក្រុមប្រដាប់អាវុធហាម៉ាស់វិញបាននិយាយថា ខ្លួនជិតឈានដល់កិច្ចព្រមព្រៀងជាមួយអ៊ីស្រាអែលជុំវិញបញ្ហាចំណាប់ខ្មាំងទៅហើយ ប៉ុន្តែការជាប់គាំងគឺដោយសារអ៊ីស្រាអែលខ្លួនឯងទៅវិញទេ។លោក Abu Ubaida អ្នកនាំពាក្យរបស់កងពលតូច Izz el-Deen al-Qassam ក៏បាននិយាយនៅក្នុងសុន្ទរកថាវីដេអូមួយដែរថា ក្រុមរបស់ខ្លួននឹងដោះលែងចំណាប់ខ្មាំងទាំងអស់ ប្រសិនបើអ៊ីស្រាអែលដោះលែងអ្នកទោសប៉ាឡេស្ទីនទាំងអស់។
មកទល់ពេលនេះ អ៊ីស្រាអែលបានឱ្យដឹងថា មនុស្សចំនួន ១.៤០០នាក់ដែលភាគច្រើនជាជនស៊ីវិលត្រូវបានសម្លាប់ក្នុងអំឡុងការវាយឆ្មក់ដឹកនាំដោយក្រុមហាម៉ាស់កាលពីថ្ងៃទី៧ ខែតុលា ហើយចំណាប់ខ្មាំង ២២៤ ក៏នាក់ត្រូវបានចាប់ខ្លួនដោយភាគច្រើនមានលិខិតឆ្លងដែនបរទេសមកពី ២៥ ប្រទេសផ្សេងៗគ្នា៕
ដោយ៖ស្រ៊ុន សិរីវឌ្ឍនៈ
ប្រភព៖ Qatar-led negotiations between Israel and Hamas continue, source says
