អ.ស.ប៖ពិបាកក្នុងការស្ដារកិច្ចព្រៀមព្រៀងនាំចេញស្បៀងធញ្ញជាតិតាមសមុទ្រខ្មៅ
អ.ស.ប៖អគ្គលេខាធិការអង្គការសហប្រជាជាតិលោក អង់តូនីញ៉ូ ហ្គូតទែរ៉េស បានប្រាប់ទីភ្នាក់ងារសារព័ត៌មានរ៉យទ័រកាលពីថ្ងៃពុធទី៨ ខែវិច្ឆិកាថា វានឹងពិបាកក្នុងការស្តារឡើងវិញនូវកិច្ចព្រមព្រៀងដ៏សំខាន់ ដែលអនុញ្ញាតឱ្យការនាំចេញគ្រាប់ធញ្ញជាតិអ៊ុយក្រែនតាមសមុទ្រខ្មៅប្រកបទៅដោយសុវត្ថិភាព ក្រោយរុស្ស៊ីបានដកខ្លួនចេញកាលពីខែកក្កដា។
លោក ហ្គូតទែរ៉េស បានថ្លែងយ៉ាងដូច្នេះថា៖ «វានឹងពិបាក។ យើងកំពុងបន្តខិតខំប្រឹងប្រែង។ ប៉ុន្តែវានឹងមានការលំបាក»។
លោកបន្តថា គោលដៅចម្បងគឺធ្វើឱ្យរុស្ស៊ី និងអ៊ុយក្រែន យល់ព្រមគ្នាអនុញ្ញាតឱ្យមានសេរីភាពក្នុងការធ្វើនាវាចរណ៍សម្រាប់គ្នាទៅវិញទៅមក ប៉ុន្តែការណ៍នេះទំនងជាមិនអាចទៅរួចនោះទេ។
គួររំឭកថា រុស្ស៊ីបានបើកការឈ្លានពានអ៊ុយក្រែនទូទាំងប្រទេសកាលពីចុងខែកុម្ភៈឆ្នាំមុន។ ប្រទេសលោកខាងលិច ហើយអង្គការសហប្រជាជាតិ បានស្ដីបន្ទោសការឈ្លានពាននេះ ថាធ្វើឱ្យវិបត្តិស្បៀងអាហារពិភពលោកកាន់តែដុនដាបទៅៗ ដោយសារតែអ៊ុយក្រែន និងរុស្ស៊ីគឺជាអ្នកនាំចេញស្បៀងធញ្ញជាតិសំខាន់ៗ ហើយរុស្ស៊ីក៏ជាអ្នកនាំចេញជីកសិកម្មដ៏ធំរបស់ពិភពលោក។
នាពេលនេះ មន្ត្រីអង្គការសហប្រជាជាតិកំពុងធ្វើការដើម្បីព្យាយាមស្តារឡើងវិញនូវកិច្ចព្រមព្រៀងនាំចេញគ្រាប់ធញ្ញជាតិតាមសមុទ្រខ្មៅ ដែលរុស្ស៊ីដកខ្លួនចេញកាលពីខែកក្កដា ក្រោយកិច្ចព្រមព្រៀងនេះសម្រេចបានមួយឆ្នាំក្រោមការសម្របសម្រួលរបស់អង្គការសហប្រជាជាតិ និងតួកគី។
រុស្ស៊ីបានត្អូញត្អែរថាការនាំចេញអាហារ និងជីរបស់ខ្លួនប្រឈមនឹងឧបសគ្គដែលខុសពីកិច្ចព្រមព្រៀង ហើយចោទទៀតថា អ៊ុយក្រែននាំចេញស្បៀងធញ្ញជាតិភាគច្រើនទៅប្រទេសលោកខាងលិច ជាជាងប្រទេសដែលជួបបញ្ហាស្បៀងធ្ងន់ធ្ងរ។ ការណ៍នេះ ត្រូវបានលោកខាងលិច និងអ៊ុយក្រែនច្រានចោល ហើយនិយាយថា រុស្ស៊ី យកបញ្ហាស្បៀងធ្វើជាអាវុធ៕
ប្រែសម្រួល៖ហួន ឌីណា
ប្រភព៖ UN chief says it will be difficult to revive Black Sea grain deal
