ក្រសួងធនធានទឹកប្រកាសឱ្យពលរដ្ឋ នៅតំបន់ខ្ពង់រាប ប្រុងប្រយ័ត្នពីសុខភាព ពីធាតុអាកាសចុះត្រជាក់ និងតំបន់មាត់សមុទ្រនឹងមានខ្យល់បោកបក់
ភ្នំពេញ៖ ក្រសួងធនធានទឹក និងឧតុនិយមបានប្រកាសឱ្យពលរដ្ឋត្រូវប្រុងប្រយ័ត្ន ដោយសារកម្ពុជា ទទួលរងខ្យល់មូសុងឦសានបក់ពីបង្គួរទៅខ្លាំង ដែលធ្វើឱ្យតំបន់ខ្ពង់រាបបន្តចុះត្រជាក់ ខណៈតំបន់មាត់សមុទ្រ នឹងមានខ្យល់បក់បោកលើផ្ទៃសមុទ្រ និងរលកសមុទ្រ ក្នុងរយៈពេល ៣ថ្ងៃ។
បើតាមការព្យាកររបស់ក្រសួងធនធានទឹក និងឧតុនិយមចេញផ្សាយនៅថ្ងៃទី១៩ ខែវិច្ឆិកា ថា ចាប់ពីថ្ងៃទី១៩ ដល់ថ្ងៃទី២១ ខែវិច្ឆិកា ឆ្នាំ២០២៣ នៅតំបន់ខ្ពង់រាប មានសីតុណ្ហភាពអប្បបរមាពី ១៩-២២អង្សាសេ និងសីតុណ្ហភាពអតិបរមាពី ២៧-២៩អង្សាសេ ហើយខ្យល់បក់មកពីទិសឦសាន ក្នុងល្បឿនពី ៧-៩ម៉ែត្រ/វិនាទី។
ប្រភពដដែលបន្តថា ចំពោះតំបន់មាត់សមុទ្រ នឹងមានសីតុណ្ហភាពអប្បបរមាពី ២៤-២៦អង្សាសេ និងសីតុណ្ហភាពអតិបរមាពី ២៨-៣០អង្សាសេ ហើយខ្យល់បក់មកពីទិសឦសានក្នុងល្បឿនពី ៤-៦ម៉ែត្រ/វិនាទី។ ចំណែក តំបន់វាលទំនាប នឹងមានសីតុណ្ហភាពអប្បបរមាពី ២២-២៤អង្សាសេ និងសីតុណ្ហភាពអតិបរមាពី ២៨-៣១អង្សាសេ ហើយខ្យល់បក់មកពីទិសឦសាន ក្នុងល្បឿនពី ៣-៥ម៉ែត្រ/វិនាទី។
ក្រសួងធនធានទឹកបញ្ជាក់ថា ៖ «នៅតំបន់ខ្ពង់រាបរួមមាន ខេត្តឧត្តរមានជ័យ ព្រះវិហារ មណ្ឌលគិរី និងខេត្តរតនគិរី ធាតុអាកាសបន្តត្រជាក់នៅពេលព្រឹក ជាមួយនឹងសីតុណ្ហភាពអប្បបរមា ១៩-២០អង្សាសេ។ ចំណែកតំបន់មាត់សមុទ្រ នៅលើផ្ទៃសមុទ្រមានខ្យល់បក់បោក និងរលកសមុទ្រមានកម្ពស់ពី ១,០០-១,៥០ម៉ែត្រ»៕
ដោយ៖ជា សុខនី
