ហុងកុង៖នៅថ្ងៃទី១០ ខែធ្នូ ឆ្នាំ២០២៣សកម្មជនគាំទ្រលទ្ធិប្រជាធិបតេយ្យនៅហុងកុងចំនួនបីនាក់ត្រូវបានចាប់ខ្លួននៅអំ​ឡុង​ពេល​ដំណើរការបោះឆ្នោតក្រុមប្រឹក្សាស្រុក​កំពុងប្រព្រឹត្តទៅ ប៉ុន្តែ​មិន​មានវត្តមានរបស់ឥស្សរជនមកពីគណបក្ស​ប្រឆាំងឈរឈ្មោះនោះទេ។

រដ្ឋាភិបាលហុងកុងដែលមាននិន្នាការគាំទ្រចិន បាននិងកំពុងធ្វើយ៉ាងណាដើម្បីបង្កើនចំនួនអ្នកទៅបោះឆ្នោតឱ្យបានច្រើ​ន ប៉ុន្តែ​មនុស្ស​ជា​ច្រើនហាក់មិនចង់ទៅចូលរួម​បោះឆ្នោតនោះទេ។ ទិដ្ឋភាពនេះគឺខុសពីឆ្នាំ ២០១៩ នៅពេលដែលមា​នអ្នកចេញបាតុកម្មតវ៉ាគាំទ្រលទ្ធិប្រជាធិបតេយ្យយ៉ាងច្រើន ហើយក៏មានប្រជាជនបោះឆ្នោតដ៏ច្រើនដូចគ្នា។ កាល​នោះ​ គណបក្ស​គាំទ្រ​លទ្ធិប្រជាធិបតេយ្យ​បាន​ទទួល​ជ័យ​ជម្នះភ្លូកទឹកភ្លូកដីតែម្ដង។​

សកម្មជនគាំទ្រលទ្ធិប្រជាធិបតេយ្យបីនាក់ មកពីគណបក្សសម្ព័ន្ធសង្គមប្រជាធិបតេយ្យ ត្រូវបានចាប់ខ្លួននៅកណ្តាលទីក្រុងហុងកុង ខណៈពេលដែលពួកគេកំពុងធ្វើដំណើរចេញទៅតវ៉ាប្រឆាំងការបោះឆ្នោត។ ពួកគេ​បាន​រិះគន់​ការបោះឆ្នោ​ត​ថា​មិនមាន​លទ្ធិប្រជាធិបតេយ្យ​ដោយសារ​ច្បាប់​បោះឆ្នោតមិន​បានទទួលយកបេក្ខជន​ដែលគាំទ្រ​លទ្ធិប្រជាធិបតេយ្យ​ឱ្យឈរឈ្មោះបោះឆ្នោត​។​

បន្ថែមលើនេះ ក្រុមបាតុករមួយទៀតនៅក្នុងទីក្រុងហុងកុងបានសម្តែងការព្រួយបារម្ភអំពីអវត្តមាននៃសិទ្ធិបោះឆ្នោត និងសិទ្ធិឈរឈ្មោះបោះឆ្នោត ហើយថាក្រុមរបស់ពួកគេត្រូវបានអាជ្ញាធរតាមដានចាប់តាំងពីពេលដែលពួកគេធ្វើដំ​ណើរចេញពីផ្ទះមកម៉្លេះ។ យ៉ាងណាមិញ មន្ត្រីប៉ូលិសបានលើកឡើងនៅក្នុងសេចក្ដីថ្លែងការណ៍មួយថា ពួកគេ​បាន​ចាប់​ខ្លួន​មនុស្សបី​នាក់​ដែល​សង្ស័យ​ថា​បាន​ព្យាយាម​រំខាន​ការ​បោះឆ្នោត​ក្រុម​ប្រឹក្សា​ស្រុក ដោយ​បានធ្វើការឃុំ​ខ្លួន​ពួកគេ​ដើម្បី​ស៊ើបអង្កេតបន្ថែម។​

កាលពីខែកក្កដាកន្លងទៅ បទប្បញ្ញត្តិថ្មីមួយត្រូវបានដាក់ចេញឱ្យអនុវត្ត ដោយបានកាត់បន្ថយអាសនៈក្រុមប្រឹក្សាស្រុកដែលជាប់ឆ្នោតដោយផ្ទាល់ជិត ៨០ភាគរយធៀបនឹងកាលពីបួនឆ្នាំមុន។ ឥឡូវនេះ បេក្ខជនឈរឈ្មោះត្រូវការត្រួតពិនិត្យព័ត៌មានផ្នែកសន្តិសុខជាតិ និងត្រូវការតែងតាំងពីគណៈកម្មាធិការគាំទ្ររដ្ឋាភិបាល។ ក្រុម​គាំទ្រ​លទ្ធិប្រជាធិបតេយ្យ​មួ​យ​ចំនួន និង​សូម្បី​តែ​ឥស្សរជន​គាំទ្រ​រដ្ឋាភិបាលក្រុង​ប៉េកាំង​មួយ​ចំនួន​ក៏​មិន​មានឱកាស​ទទួល​បាន​ការ​តែងតាំងនោះដែរ។​

ការវិវត្តចុងក្រោយនេះ បានឈានដល់ការរឹតត្បិតសិទ្ធិសេរីភាពបោះឆ្នោតនៅទីក្រុងហុងកុង ដែលជាទីក្រុងពាណិជ្ជកម្មមួយធ្លាប់ស្ថិតនៅក្រោមអាណានិគមអង់គ្លេស ក្រោយមកអង់គ្លេសបានប្រគល់ការគ្រប់គ្រងឱ្យទៅចិនវិញក្នុងឆ្នាំ​១៩​៩​៧​។ ជាក់ស្ដែង ការបង្រ្កាបសំឡេងក្រុមប្រឆាំងដោយប្រើប្រាស់ច្បាប់សន្តិសុខជាតិឆ្នាំ ២០២០ របស់ប្រទេសចិន បណ្ដា​លឱ្យមានការចាប់ខ្លួនអតីតសមាជិកក្រុមប្រឹក្សាស្រុក និងថែមទាំងបានរំលាយគណបក្សប្រឆាំងសំខាន់ៗទៀតផង។​

មេដឹកនាំទីក្រុងហុងកុង លោក ចន លី (John Lee) បាននិយាយថា ៖ «ការបោះឆ្នោតនេះគឺមានសារៈសំខាន់ណា​ស់​ក្នុងការបង្កើតអភិបាលកិច្ចដឹកនាំដោយអ្នកស្នេហាជាតិនៅក្នុងទីក្រុងហុងកុង»។ លោកបានយល់ឃើញថា ការ​បោះ​ឆ្នោ​ត​នៅឆ្នាំ ២០១៩ ជាការរំខាន​ដល់​អភិបាល​កិច្ចសង្គម និង​បង្ក​គ្រោះថ្នាក់​ដល់​សន្តិសុខ​ជាតិ។​

គួរកត់សម្គាល់ថា សន្តិសុខត្រូវបានដាក់ពង្រាយយ៉ាង​តឹងរ៉ឹង ដោយមានប៉ូលិស​ចំនួន ១ ម៉ឺននាក់ជាង ​ដើម្បី​ធានា​សណ្តាប់ធ្នាប់​ក្នុង​អំឡុង​ពេល​បោះឆ្នោត​។​ ដោយឡែក បណ្ដាប្រទេសលោកខាងលិចបានរិះគន់ច្បាប់សន្តិសុខជាតិរបស់ចិន ដែលបានរារាំងមិនឲ្យមានសំឡេងបក្សប្រឆាំងចូលរួម ប៉ុន្តែចិនបានអះអាងថា ខ្លួនកំពុងរក្សាស្ថិរភាពសង្គមនៅហុងកុង។ ទន្ទឹមនឹងនេះ បណ្ដាគណបក្ស​ដែលមាននិន្នាការគាំទ្រ​រដ្ឋាភិបាលក្រុង​ប៉េកាំង​បាន​ព្យាយាមធ្វើ​យុទ្ធនាការ ​ដើ​ម្បី​ជំរុញពលរដ្ឋហុងកុងឱ្យ​​ទៅ​បោះឆ្នោត។​

លោក តាំង (Tang) វ័យ ២៧ ឆ្នាំ​បាន​កត់​សម្គាល់​ថា សំឡេង​ចម្រុះ​មាន​ចំនួន​តិចខ្លាំងណាស់ ​បើ​ធៀប​នឹង​បួន​ឆ្នាំ​មុន។ គិតត្រឹមម៉ោង ២ កន្លះរសៀលថ្ងៃអាទិត្យ ចំនួនអ្នកទៅបោះឆ្នោតមានចំនួនត្រឹមតែ ១៥,៤៧ភាគរយទាបជាងបួនឆ្នាំមុនចំនួន ៤២ភាគរយ គិតក្នុងរយៈពេលដូចគ្នា។​

លោក កេណេត ឆាន (Kenneth Chan) អ្នកវិទ្យាសាស្ត្រនយោបាយនៅសាកលវិទ្យាល័យមួយនៅហុងកុង និងជាអតីតសមាជិកសភាគាំទ្រលទ្ធិប្រជាធិបតេយ្យបាននិយាយថា ៖ «នៅហុងកុងសព្វថ្ងៃ វាពិបាកខ្លាំងណាស់ក្នុងការជជែ​ក​ពីលទ្ធិប្រជាធិបតេយ្យ។ ពួកគេ​កំពុង​រៀបចំ​ប្រព័ន្ធ​សង្គម​​មនុស្សមួយបែប​ដែល​ពួកគេ​ហៅថា​ជា​អ្នក​ស្នេហា​ជាតិ​ប៉ុណ្ណោះ​​ទើបអាចឡើងកាន់មុខតំណែង​ក្នុងជួររាជការបាន»៕​

ប្រែសម្រួល៖ធា សុណា

ប្រភពព័ត៌មាន៖ ​Hong Kong activists arrested in city’s ‘birdcage’ election