សេអ៊ូល៖ យោធារបស់ប្រទេសកូរ៉េខាងត្បូងបាននិយាយថា កូរ៉េខាងជើងទើបបានបាញ់មីស៊ីលឆ្លងទ្វីប (Cruise) ជាច្រើនគ្រាប់ កាលពីព្រឹកថ្ងៃអាទិត្យនេះ ដែលជាការបាញ់ លើកចុងក្រោយបំផុត នៃការបង្កើនភាពតានតឹង ដោយរដ្ឋប្រដាប់ដោយអាវុធនុយក្លេអ៊ែរ មួយនេះ។

ម៉ីស៊ីល Cruise គឺជាប្រភេទម៉ីស៊ីលដែលប្រើក្នុងប្រតិបត្តិការយោធា ដែលត្រូវបានរចនាឡើង ដើម្បីបញ្ជូនក្បាលគ្រាប់ដ៏ធំក្នុងរយៈចម្ងាយឆ្ងាយ ជាមួយនឹងភាពជាក់លាក់ខ្ពស់។ ម៉ីស៊ីល Cruise ទំនើប មានសមត្ថភាពធ្វើដំណើរក្នុងល្បឿនដ៏លឿន អាចរុករកកម្មវុត្ថុដោយខ្លួនឯង ហើយអាចហោះលើគន្លង ដែលមានរយៈកម្ពស់ទាបបំផុតផងដែរ។

ការបាញ់បង្ហោះ នាព្រឹកថ្ងៃទី២៨ ខែមករានេះ ត្រូវបានធ្វើឡើង នៅរយៈពេលតែប៉ុន្មានថ្ងៃប៉ុណ្ណោះ បន្ទាប់ពីទីក្រុងព្យុងយ៉ាងបានបាញ់មីស៊ីលឆ្លងទ្វីបជាច្រើនគ្រាប់ ឆ្ពោះទៅសមុទ្រលឿង ដែលខ្លួនបាននិយាយថា គឺជាការសាកល្បង លើកដំបូង នៃម៉ីស៊ីល Cruise ជំនាន់ថ្មី។

រដ្ឋបាលក្រុងព្យុងយ៉ាងបានពន្លឿនការធ្វើតេស្តអាវុធ ក្នុងឆ្នាំថ្មីនេះ រួមទាំងការសាកល្បងនូវអ្វីដែលខ្លួនហៅថា «ប្រព័ន្ធអាវុធនុយក្លេអ៊ែរក្រោមទឹក» និង «កាំជ្រួចមីស៊ីលបាលីស្ទីកលឿនជាងសំឡេងដែលមានឥន្ធនៈរឹង»។

អគ្គសេនាធិការចម្រុះ ហៅកាត់ JCS របស់ប្រទេសកូរ៉េខាងត្បូង បាននិយាយ នៅក្នុងសេចក្តីថ្លែងការណ៍មួយថា «យោធារបស់យើងបានរកឃើញកាំជ្រួចធ្វើដំណើរ ដែលមិនស្គាល់អត្តសញ្ញាណជាច្រើនគ្រាប់ ត្រូវបានបាញ់នៅជិតដែនទឹក ជុំវិញតំបន់ Sinpo របស់កូរ៉េខាងជើង នៅវេលាម៉ោង ៨ព្រឹក ថ្ងៃនេះ» ។

JCS បានអះអាងទៀតថា ការបាញ់បង្ហោះនេះគឺស្ថិតនៅក្រោមការវិភាគ ដោយអាជ្ញាធរចារកម្មកូរ៉េខាងត្បូង និងសហរដ្ឋអាមេរិក។ ប្រភពបានបន្ថែមថា ខ្លួនកំពុងតាមដានយ៉ាងដិតដល់ នូវចលនា និងសកម្មភាពបន្ថែម របស់កូរ៉េខាងជើង៕ ប្រភពពី AFP ប្រែសម្រួល៖ សារ៉ាត