(ខេត្តកណ្ដាល)៖ រដ្ឋបាលខេត្តកណ្តាល កាលពីថ្ងៃទី២៩ ខែមករា ឆ្នាំ២០២៤ ដឹកនាំ ដោយ លោក ឌឹម បូរ៉ា អភិបាលរងខេត្តកណ្ដាល បានបើកកិច្ចប្រជុំត្រួតពិនិត្យវឌ្ឍនភាព ការងារគ្រប់គ្រង និងពង្រឹងការប្រមូលចំណូលទីតាំងលើកស្លាក អាហ្វីស-ប៉ាណូ ក្នុងភូមិសាស្ត្រខេត្តកណ្តាល រយៈពេល ៥ខែ ចាប់ពីខែសីហា ឆ្នាំ២០២៣ ដល់ខែមករា ឆ្នាំ២០២៤ និងលើកទិសដៅអនុវត្តបន្តសម្រាប់ឆ្នាំ២០២៤ ។

លោក ឌឹម បូរ៉ា បានស្នើរដល់អាជ្ញាធរក្រុង-ស្រុកទាំង១៣ ត្រូវសហការជាមួយមន្ទីរព័ត៌មានខេត្តកណ្ដាល ដើម្បីផ្ដល់ព័ត៌មានដល់ក្រុមការងារខេត្ត ក៏ដូចជាអង្គភាពច្រកចេញចូលជាមួយខេត្ត នូវស្ថិតិទីតាំងលើកស្លាក អាហ្វីស-ប៉ាណូ ក្នុងភូមិសាស្ត្រខេត្តកណ្តាល ឲ្យបានច្បាស់លាស់នៅតាមបណ្តាមូលដ្ឋាន ដើម្បីក្រុមការងារគ្រប់គ្រង និងប្រមូលចំណូលទីតាំងលើកស្លាក អាហ្វីស-ប៉ាណូខេត្ត មានភាពច្បាស់លាស់ និងអនុវត្តការងារឲ្យមានប្រសិទ្ធភាព។

លោក បានបន្តទៀតថា៖ ដោយសារមានក្រុមហ៊ុន និងអាជីវករមួយចំនួន ពុំទាន់យល់ច្បាស់ និងមិនមានកិច្ចសហការល្អ ជាមួយរដ្ឋបាលខេត្តក៏ដូចជាអង្គភាពច្រកចេញចូល តែមួយរបស់ខេត្ត ក្នុងការបង់សេវាការផ្សព្វផ្សាយពាណិជ្ជកម្ម និងទីតាំងលើកស្លាកសញ្ញា ដូចនេះក្រុមការងារគ្រប់គ្រង និងប្រមូលចំណូលខេត្ត ត្រូវមានការកំណត់ពីវិធានការរដ្ឋបាល គឺការជូនដំណឹងចំនួន៣ដង មុននឹងសុំកិច្ចសហការពីក្រុមការងារអនុវត្តច្បាប់ក្នុងករណី ដែលសេវាករមិនគោរពកាត្វពកិច្ច ហើយក្នុងនាមមន្ទីរព័ត៌មានខេត្ត ដែលជាអនុប្រធានអចិន្ត្រៃយ៍ នៃក្រុមការងារសម្រាប់ចុះរុះរើផ្ទាំងផ្សព្វផ្សាយពាណិជ្ជកម្ម ត្រូវមានវិធានការច្បាប់ក្នុងពេលចុះអនុវត្ត។

សូមជំរាបជូនផងដែរថា៖ តាមរបាយការណ៍របស់អង្គភាពច្រកចេញចូលតែមួយខេត្ត បានអោយដឹងថា រយៈពេល ០៥ខែ ផ្ដល់សេវាបានចំនួន ៣២ច្បាប់ និងប្រមូលចំណូលបានចំនួន ១២៥លានរៀល ដោយឡែកសម្រាប់មន្ទីរព័ត៌មានខេត្តកណ្ដាល ក្នុងការប្រមូលសេវារយៈពេល 0៥ខែ គិតចាប់ពីខែសីហា ដល់ខែធ្នូ បានចំនួនជាង ១៣៦លានរៀល ក្នុងឆ្នាំ២០២៣ ៕

ដោយ ៖ ង៉ាន់ ទិត្យ