ភ្នំពេញ៖ លោក ម៉ុន សុខ ជា នាយសាលា GVA បានថ្លែង ក្នុងពិធីបើកព្រឹត្តិការណ៍ការប្រកួតកីឡាបាល់ទះពានរង្វាន់ GVA លើកទី១ ឆ្នាំ២០២៤ថា ការប្រកួតបាល់ទះដែលសាលារៀបចំឡើងនេះ មានគោលបំណង ចូលរួមអភិវឌ្ឍវិស័យកីឡា និងផ្តល់ឱកាសឲ្យសិស្សនៅក្នុងសាលាបានប្រកួតប្រជែងបញ្ចេញសមត្ថភាព។

លោកថា សម្រាប់កីឡា កាលណាបង្កើតឡើងនៅក្នុងសាលាបែបនេះ បានរួមចំណែកជួយច្រើនណាស់ចំពោះសិស្សានុសិស្ស ទី១ ជួយឲ្យពួកគេទទួលបានសុខភាពល្អរឹងមាំ ជួយឲ្យប្រាជ្ញាស្មារតីឆ្លាតវៃ ជួយបង្រៀនឲ្យសិស្សានុសិសស្សទទួលបានបទពិសោធន៍នៃការសហការគ្នាធ្វើការជាក្រុម និង ទប់ស្តាត់មិនឲ្យសិស្សទៅធ្វើរឿងដែលមិនល្អនៅក្នុងសង្គម ។

កីឡាការិនី ហ៊ន បូរីយ៉ា បានចាត់ទុកព្រឹត្តិការណ៍ប្រកួតកីឡានេះ គឺជាការបង្ហាត់បង្រៀនផ្តល់នូវបទពិសោធន៍នៃកិច្ចសហការជាក្រុមដែលនឹងជួយឲ្យពួកគេប្រើប្រាស់សម្រាប់សកម្មភាពបំរើការងារនៅពេលអនាគត។

សូមបញ្ជាក់ថា ការប្រកួតកីឡាបាល់ទះពានរង្វាន់GVAលើកទី១ ឆ្នាំ២០២៤ មានក្រុមចូលរួមប្រកួតចំនួន១៧ក្រុម បែងចេញជា៣កម្រិត សិស្សបឋម អនុវិទ្យាល័យ និងវិទ្យាល័យ ដែលដំណើរការប្រកួតចាប់ពីថ្ងៃទី១៥ ខែ កុម្ភរហូតដល់ថ្ងៃទី២៣ ខែ កុម្ភៈ ឆ្នាំ២០២៤ ៕រូបភាព ជីម ភារ៉ា អត្ថបទ៖ ជាវ ចន្ធូ