តូក្យូ៖ ក្រុមហ៊ុន Sony PlayStation ថ្មីៗនេះ បានប្រកាសនឹងបញ្ឈប់ការងារចំនួន ៨ភាគរយនៃកម្លាំងពលកម្មសកលរបស់ខ្លួន ដោយសារតែឧស្សាហកម្មបច្ចេកវិទ្យា បន្តទទួលរងនូវរលកនៃការកាត់បន្ថយការងារ។

ដោយហៅការប្រកាសនេះថា ជា “ដំណឹងសោកសៅ” ប្រធានផលិតម៉ាស៊ីនហ្គេម PlayStation លោក Jim Ryan និយាយថា ការកាត់បន្ថយបុគ្គលិកនេះ នឹងប៉ះពាល់ដល់មនុស្សប្រមាណ ៩០០នាក់នៅទូទាំងពិភពលោក រួមទាំងស្ទូឌីយ៉ូបង្កើតវីដេអូហ្គេមផងដែរ។

បើតាមក្រុមហ៊ុន Sony ការជម្រុះបុគ្គលិកនេះ នឹងធ្វើឱ្យស្ទឌីយ៉ូ PlayStation London របស់ក្រុមហ៊ុន ដែលបង្កើតឡើងក្នុងឆ្នាំ២០០២ និងមានឯកទេសលើគម្រោងបង្កើតហ្គេមអនឡាញបិទដំណើរការទាំងស្រុង។

ដោយឡែកស្ទូឌីយ៉ូរបស់សហរដ្ឋអាមេរិក Insomniac Games និង Naughty Dog ក៏រងផលប៉ះពាល់ផងដែរ។ ការកាត់បន្ថយបុគ្គលិកនេះដែរ កើតឡើងបន្ទាប់ពីក្រុមហ៊ុន Sony ក្នុងខែកុម្ភៈនេះព្រមានថា ការលក់ម៉ាស៊ីនហ្គេម PlayStation 5 នឹងមិនអាចសម្រេចបានតាមគោលដៅកំណត់ឡើយ។

ដោយឡែកក្រុមហ៊ុន Microsoft កាលពីខែមករាក៏បានអះអាងដែរថា ខ្លួនកំពុងបញ្ឈប់បុគ្គលិកចំនួន ១,៩០០នាក់ ឬ៨ភាគរយ នៅក្នុងផ្នែកហ្គេមរបស់ខ្លួន ខណៈដែល Microsoft បានច្របាច់បញ្ចូលគ្នានូវការទិញយកក្រុមហ៊ុនផលិតវីដេអូហ្គេម Activision។

សរុបមក កាលពីឆ្នាំមុន ឧស្សាហកម្មបច្ចេកវិទ្យារបស់ពិភពលោក បានជម្រុះបុគ្គលិករហូតដល់ ២៦០,០០០នាក់ នេះបើយោងតាមគេហទំព័រ layoffs.fyi ដែលជាគេហទំព័រមានមូលដ្ឋាននៅរដ្ឋកាលីហ្វ័រញ៉ា ដែលតាមដានវិស័យនេះ។ គិតមកដល់ឆ្នាំ២០២៤ ឧស្សាហកម្មបច្ចេកវិទ្យារបស់ពិភពលោក បានបញ្ឈប់បុគ្គលិកមានចំនួន ៤៣.៩៥៧នាក់នៅក្នុងក្រុមហ៊ុនចំនួន ១៧១៕ ប្រភព៖ AFP ប្រែសម្រួលដោយ៖ ឈឹម ទីណា