ព្រះវិហារ៖ នៅព្រឹកថ្ងៃទី៨ ខែកក្កដា ឆ្នាំ២០១៩នេះ ក្រុមការងារបង្ក្រាបបទល្មើសធនធានធម្មជាតិ ដឹកនាំដោយលោក សុខ មុន្នីរិទ្ធិ អភិបាលរងស្រុក និងលោក សេង លាង នាយផ្នែករដ្ឋបាលព្រៃឈើឆែប ព្រមទាំងកងកម្លាំងប្រដាប់អាវុធទាំងបី ចុះបង្ក្រាបទីតាំង លួចលាក់ស្តុបឈើ មួយកន្លែង រឹបអូសឈើអារប្រភេទលេខ២ «ឈើទាល» ចំនួន១៦៨សន្លឹក ស្មើនឹង 6,30ម៉ែត្រគូប ត្រង់ចំនុចUTM527163-1528536 ស្ថិតនៅភូមិពោធិ៍ទាប ឃុំម្លូព្រៃមួយ ស្រុកឆែប ខេត្តព្រះវិហារ។

លោក សុខ មុន្នីរិទ្ធិ អភិបាលរងស្រុកឆែប បានបញ្ជាក់ថា នៅក្នុងករណីបង្ក្រាបកន្លែងលួចលាក់ស្តុកឈើខាងលើនេះ មិនឃើញមានម្ចាស់ឈើចេញមុខ មកបកស្រាយទទួលថាជារបស់ខ្លួននោះឡើយ។ លោកថា ចំពោះការបង្ក្រាបទីតាំងលួចលាក់ស្តុបឈើនេះដែរ កម្លាំងបានរឹបអូសរទេះកង់ឡានចំនួន០៤ រួមនឹងឈើអារប្រភេទលេខ២«ឈើទាល»ចំនួន១៦៨សន្លឹក។ បច្ចុប្បន្ននេះ ឈើ និងរទេះកង់ឡាន ត្រូវបានកម្លាំងដឹកយកមករក្សាទុក្ខ នៅថ្នាលបណ្តុះកូនឈើ នៃផ្នែករដ្ឋបាលព្រៃឈើឆែប ដើម្បីរៀបចំចាត់ចែងទៅតាមនីតិវិធីច្បាប់៕ធ.ដ

ដោយៈ សួន លីណា