Real Madrid បានដាក់សំណើដល់ Spurs ៤៥លានផោន បូកជាមួយខ្សែបម្រើ Dani Ceballos ដើម្បីផ្ទេរយក Christian Eriksen។ អ្នកចាត់ការ Real លោក Zidane បានដាក់ខ្សែបម្រើរបស់ Spurs ក្នុងបញ្ជីដើរទិញរបស់លោក ត្បិតកាលពីពេលថ្មីៗទើបតែទិញបាន Eden Hazard ពី Chelsea ។ Ceballos ពេលនេះកំពុងជាប់ភារកិច្ចជាមួយក្រុមជម្រើសជាតិអេស្ប៉ាញលេង Euro Under-21 Championship។

គួររំលឹកថា Ceballo វ័យ២២ឆ្នាំ ធ្លាប់និយាយថាចង់ចាកចេញពី Madrid បន្ទាប់មិនសូវជាប់ជម្រើសកាលពីរដូវកាលមុន ស្របពេលដែល Spurs ក៏ធ្លាប់ទាក់ទងកីឡាករសញ្ជាតិអេស្ប៉ាញរូបនេះជាច្រើនខែមកហើយ។ ដោយមើលឃើញនេះជាឱកាសល្អ Real Madrid ចង់យក Ceballo ជាថ្នូរបូកជាមួយការថែមទឹកប្រាក់ ដើម្បីទាយយក Eriksen ពីកីឡដ្ឋាន Tottenham Hotspur Stadium។ 

Eriksen វ័យ២៧ឆ្នាំ បានបង្ហើបកាលពី២សប្ដាហ៍មុនថា គេចង់ចេញពី Spurs ដើម្បីព្យាយាមអ្វីថ្មី។ ប៉ុន្តែកីឡាករសញ្ជាតិ ដាណាម៉ាករូបនេះ នៅសល់កុងត្រារយៈពេលមួយឆ្នាំទៀត ជាមួយមាន់ខ្នាយមាស ខណៈប្រធានក្លិបចង់បានតម្លៃខ្លួន១០០លានផោន សម្រាប់កីឡាកររបស់ខ្លួន៕ធ.ដ