ព្រឹត្តិការណ៍ប្រណាំងរថយន្ត OFF ROAD អន្តរជាតិ នឹងប្រព្រឹត្តទៅខេត្តព្រះសីហនុ
ព្រះសីហនុ៖ក្រុមការរងារសហព័ន្ធកីឡាយានយន្តកម្ពុជា ដឹកនាំដោយឯកឧត្តម ទៀ ស្យាម អនុប្រធានសហព័ន្ធ និងជាប្រធានគ្រួសារ Off Road កម្ពុជា បានជួបពិភាក្សាការងារជាមួយឯកឧត្តម ម៉ាង ស៊ីណេត អភិបាលខេត្តព្រះសីហនុ កាលពីព្រឹកថ្ងៃទី១៦ ខែ
តុលា ឆ្នាំ២០២៤ ទាក់ទងនឹងការរៀបចំព្រឹត្តិការណ៍ប្រណាំងរថយន្ត (OFF ROAD) អន្តរជាតិ ២០២៤។ការរៀបចំកម្មវិធីនេះទៀត
សោតក្នុងគោលបំណងទាក់ទាញទេសចរ និងផ្សព្វផ្សាយពីសក្ដានុពលទេសចរណ៍កម្ពុជាទៅពិភពលោកផងដែរ។
ក្នុងកិច្ចពិភាក្សាដោយមានការចូលរួមពីមន្ទីរ អង្គភាពពាក់ព័ន្ធ និងតំណាងក្រុមហ៊ុនផង លោក ឈិន សីហា អគ្គលេខាធិការរងសហព័ន្ធកីឡាយានយន្តកម្ពុជាបានបទបង្ហាញ ពីការរៀបចំការប្រណាំងរថយន្ត (OFF ROAD) អន្តរជាតិ ២០២៤ នៅខេត្តព្រះសីហនុ ។លោកថា ព្រឹត្តិការណ៍នេះដើម្បីបង្កើតការជួបជុំគ្រួសាររថយន្ត (OFF ROAD)ដ៏ធំនៅកម្ពុជា មកពីបណ្តាក្លឹប និងប្រទេសនានា។
លោកបានគូសរំលេចថា ការប្រណាំងរថយន្ត (OFF ROAD) អន្តរជាតិ គឺជាព្រឹត្តការណ៍ទាក់ទាញភ្ញៀវទេសចរជាតិ និងអន្តរជាតិឱ្យមកប្រកួតបង្ហាញសមត្ថភាព បែបឆ្លងកាត់ឧបសគ្គដែលមាន វាលភក់ ឆ្លងទឹក ថ្ម និងឧបសគ្គជាច្រើន រួមទាំងការបោះតង់ អាំងសាច់ និងរីករាយជាមួយការប្រគំតន្ត្រី កម្មវិធីកម្សាន្ត ស្តង់តាំងលក់ផលិតផល និងម្ហូបអាហារផ្សេងៗ នាបរិយាកាសក្បែរមាត់សមុទ្រផងដែរ។
តាមកម្មវិធីដែលបានគ្រោងមាន ការដង្ហែក្បួនម៉ូតូ និងរថយន្ត(OFF ROAD) អន្តរជាតិ ឆ្លងកាត់ផ្លូវក្នុងទីប្រជុំជនក្រុងព្រះសីហនុ ព្រមទាំងមានការដាក់ស្តង់តាំងបង្ហាញក្រុមរថយន្ត ផលិតផល និងស្តង់លក់ដូរអាហារផ្សេងៗក្នុងទីលានប្រណាំងជិតឆ្នេរអូរត្រេះ ។
អគ្គលេខាធិការរងរូបនេះបន្ថែមថា ការប្រណាំងរថយន្តឧបសគ្គអន្តរជាតិ ២០២៤ នៅខេត្តព្រះសីហនុនឹងប្រព្រឹត្តទៅលើផ្ទៃដី ២៤ហិកតា នៅជិតឆ្នេរអូត្រេះ និងមានរថយន្ត Off-Road កម្ពុជា ចូលរួមប្រណាំងប្រមាណ ៨០គ្រឿង ក្នុងនោះក៏មានអ្នកប្រណាំងអន្តរជាតិចូលរួមដែរ។ ការប្រណាំងរថយន្តនឹងប្រព្រឹត្តទៅរយៈពេល ៤ថ្ងៃចាប់ពីថ្ងៃទី២៨ ដល់ថ្ងៃទី៣០ ខែវិច្ឆិកា ឆ្នាំ២០២៤ ។
ឯកឧត្តម ម៉ាង ស៊ីណេត អភិបាលខេត្តព្រះសីហនុបានឯកភាព និងគាំទ្រ សហព័ន្ធកីឡាយានយន្តកម្ពុជា ដែលផ្តួចផ្តើមគំនិតយកខេត្តព្រះសីហនុ បង្កើតព្រឹត្តិការណ៍ប្រណាំងរថយន្តឧបសគ្គ OFF ROAD អន្តរជាតិ ២០២៤នាពេលខាងមុខ។ ឯកឧត្តមបានចាត់ទុកការប្រណាំងរថយន្តនេះ ជាផលិតផល ឬព្រឹត្តិការណ៍ទេសចរថ្មីៗ ដ៏ទាក់ទាញលើទឹកដីតំបន់ឆ្នេរ នៃភាគនិរតី នៃព្រះរាជាណាចក្រកម្ពុជា ក្នុងន័យរួមគ្នាជំរុញផ្សព្វផ្សាយវិស័យទេសចរណ៍ ដើម្បីស្រូបយកភ្ញៀវទេសចរជាតិ និងអន្តរជាតិ ៕
ដោយ៖លោក ចាន់ វិចិត្រ
