ប្រធានរដ្ឋសភានេប៉ាល់ សម្តែងការចងចាំនូវគំរូវីរភាព និងការលះបង់របស់សម្តេចតេជោក្នុងបុព្វហេតុកសាង ថែរក្សា និងធានាបាននូវសន្តិភាពជូនកម្ពុជា
(ភ្នំពេញ)៖ ប្រធានរដ្ឋសភានេប៉ាល់ សម្តែងការចងចាំនូវគំរូវីរភាព និងការលះបង់របស់សម្តេចតេជោក្នុងបុព្វហេតុកសាង ថែរក្សា និងធានាបាននូវសន្តិភាពជូនកម្ពុជា និងជឿជាក់ថា តួនាទី និងសមិទ្ធផល ដែលសម្តេចតេជោសម្រេចបាន គឺជាឧទាហរណ៍ដែលមិនអាចកាត់ថ្លៃបានសម្រាប់ពិភពលោក និងជាពិសេសប្រទេសតូចៗ ។
ប្រធានរដ្ឋសភានៃសាធារណរដ្ឋសហព័ន្ធប្រជាធិបតេយ្យនេប៉ាល់ លើកឡើងបែបនេះ ក្នុងឱកាសចូលជួបសម្តែងការគួរសម ជាមួយសម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា កាលពីរសៀលថ្ងៃទី២៤ ខែវិច្ឆិកា ឆ្នាំ២០២៤ នៅវិមាន៧មករា រាជធានីភ្នំពេញ ។
នៅក្នុងជំនួបនេះ សម្ដេចតេជោ ហ៊ុន សែន បានសម្តែងនូវការស្វាគមន៍យ៉ាងកក់ក្តៅសាជាថ្មី បន្ទាប់ពីជំនួបជាមួយប្រតិភូ ក្រុមប្រធានសភានៃប្រទេសជាមិត្តនៅពេលព្រឹក និងក្នុងពេលបាឋកថាពិសេសរបស់សម្តេច ស្តីពី «បទពិសោធដឹកនាំ និងចក្ខុវិស័យសន្តិភាព»។
ក្នុងគ្រានេះដែរ សម្តេចតេជោមានសេចក្តីសង្ឃឹមយ៉ាងមុតមាំថា ក្រុមប្រធានសភានៃប្រទេសជាមិត្តនឹងបន្តកិច្ចសហប្រតិបត្តិការក្នុងស្មារតីសាមគ្គីភាពអាស៊ី-អាហ្រ្វិក ដែលមានប្រវត្តិជាយូរមកហើយ និងខិតខំប្រឹងប្រែងពង្រឹងបន្ថែមកិច្ចសហប្រតិបត្តិការនេះប្រកបដោយស្មារតីយោគយល់។
ចំណែក លោក Dev Raj Ghimire ប្រធានរដ្ឋសភានៃសាធារណរដ្ឋសហព័ន្ធប្រជាធិបតេយ្យនេប៉ាល់ បានលើកឡើងនៅក្នុងជំនួបជាមួយសម្ដេចតេជោថា លោកសូមថ្លែងអំណរគុណយ៉ាងជ្រាលជ្រៅ ចំពោះសម្តេចតេជោនិងកម្ពុជាដែលបានទទួលរៀបចំកម្មវិធីប្រជុំពេញអង្គ IPTPលើកទី១១ នៃសភាអន្តរជាតិដើម្បីភាពអត់ឱន និងសន្តិភាព ខណៈបច្ចុប្បន្នសន្តិភាព កាន់តែមានសារៈសំខាន់សម្រាប់ពិភពលោក។
ប្រធានរដ្ឋសភានៃសាធារណរដ្ឋសហព័ន្ធប្រជាធិបតេយ្យនេប៉ាល់ ក៏បានសង្កត់ធ្ងន់លើស្ថានការណ៍សង្រ្គាម ដែលកំពុងរីករាលដាលទូទាំងពិភពលោកផងដែរ និងស្នើឱ្យធ្វើការរួមគ្នាដើម្បីសន្តិភាពពិភពលោកយូរអង្វែង។
ទន្ទឹមគ្នានេះ លោក Dev Raj Ghimire បានសម្តែងនូវការចងចាំមិនអាចបំភ្លេចនូវគំរូវីរភាព និងការលះបង់របស់សម្តេចតេជោក្នុងបុព្វហេតុកសាង ថែរក្សា និងធានាបាននូវសន្តិភាពជូនកម្ពុជាក្នុងរយៈពេលយូរអង្វែង និងជឿជាក់ថាតួនាទី និងសមិទ្ធផលដែលសម្តេចតេជោសម្រេចបានគឺជាឧទាហរណ៍ដែលមិនអាចកាត់ថ្លៃបានសម្រាប់ពិភពលោក និងជាពិសេសប្រទេសតូចៗ។
ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណចំពោះពាក្យពេចន៍ដ៏មានតម្លៃរបស់លោក Dev Raj Ghimire និងការលើកកម្ពស់តួនាទីរបស់កម្ពុជា ក្នុងការស្វែងរកសន្តិភាព ដើម្បីមនុស្សជាតិនិងភពផែនដី។
ជាមួយគ្នានេះ សម្តេចតេជោ ក៏បានកោតសរសើរចំពោះប្រតិភូ ក្រុមប្រធានសភានៃប្រទេសជាមិត្តដែលបានធ្វើដំណើរដ៏វែងឆ្ងាយមកចូលរួមប្រជុំពេញអង្គលើកទី១១ នៃសភាអន្តរជាតិនៅកម្ពុជា ដែលនេះសរបង្ហាញឱ្យឃើញពីសំឡេងរួបរួមគ្នានៃបណ្តាប្រទេសកំពុងអភិវឌ្ឍន៍៕
ដោយ ៖ វណ្ណលុក
