(ភ្នំពេញ)៖ នៅថ្ងៃទី ១៥ ខែមិថុនា ឆ្នាំ ២០២៥នេះទាំងមន្រ្តី ពលរដ្ឋកម្ពុជា និងក្រសួង មន្ទីរ មួយចំនួនរបស់កម្ពុជាបានបង្ហាញការ អបអរសាទរខួប ៦៣ឆ្នាំ នៃសាលក្រមរបស់តុលាការយុត្តិធម៌អន្តរជាតិ (ICJ) ទីក្រុងឡាអេ ដែលបានប្រគល់អធិបតេយ្យភាពលើប្រាសាទព្រះវិហារ ដល់កម្ពុជា និងថ្ងៃទី២៥ ខែមិថុនា ឆ្នាំ២០២៥នេះដែរ កម្ពុជាក៏បានសម្រេចដាក់ពាក្យប្តឹងតំបន់ចំនួន៤គឺប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបីទៅតុលាការយុត្តិធម៌អន្តរជាតិផងដែរ ក្រោយប្រទេសថៃធ្វើការរំលោភបំពានធ្ងន់ធ្ងរលើព្រំដែនកម្ពុជារួចមក ។

ប្រមុខរាជរដ្ឋភិបាលកម្ពុជាសម្តេច បវរធិបតី ហ៊ុន ម៉ាណែត បានលើកឡើងថាថ្ងៃនេះ ទី១៥ មិថុនា ឆ្នាំ២០២៥ បានបញ្ជាក់ថា រាជរដ្ឋាភិបាលកម្ពុជាបានបញ្ជូនលិខិតជាផ្លូវការទៅកាន់តុលាការយុត្តិធម៌អន្តរជាតិ (ICJ) ដើម្បីជួយស្វែងរកដំណោះស្រាយពាក់ព័ន្ធទៅនឹងបញ្ហាវិវាទព្រំដែននៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី។វាគាប់ជួនផងដែរ កាលពី ៦៣ឆ្នាំមុន នៅថ្ងៃទី១៥ ខែមិថុនា ឆ្នាំ១៩៦២ គឺជាថ្ងៃប្រវត្តិសាស្ត្រដែលតុលាការយុត្តិធម៌អន្តរជាតិ (ICJ) បានសម្រេចឲ្យកម្ពុជាឈ្នះលើរឿងក្តីប្រាសាទព្រះវិហារ”។

សម្តេចបវរធិបតី បានមានប្រសាសន៍ថា៖ទោះបីជាព្រឹត្តិការណ៍ទាំងពីរនេះកើតឡើង ៦៣ឆ្នាំខុសពីគ្នាក៏ពិតមែន ប៉ុន្តែស្មារតី និងគោលបំណងគឺដូចគ្នា គឺកម្ពុជាជ្រើសរើសយកការដោះស្រាយ ដោយសន្តិវិធី ផ្អែកលើច្បាប់អន្តរជាតិ តាមរយៈយន្តការតុលាការយុត្តិធម៌អន្តរជាតិ ICJ សម្រាប់ការដោះស្រាយបញ្ហាព្រំដែននៅតំបន់ដែលមានលក្ខណៈស្មុគស្មាញខ្លាំង និងមានហារនិភ័យខ្ពស់នៃជម្លោះប្រដាប់អាវុធ ហើយដែលយន្តការទ្វេភាគីមិនអាចដោះស្រាយចប់ ដូចជានៅតំបន់ប្រាសាទព្រះវិហារកាលពីជាង៦០ឆ្នាំមុន និងតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី នាពេលបច្ចុប្បន្ន។

សម្តេច បវរធិបតីបានបញ្ជាក់ថា”កម្ពុជាត្រូវការតែយុត្តិធម៌ ភាពត្រឹមត្រូវ និងច្បាស់លាស់មួយ ក្នុងការកំណត់ខ្សែរព្រំដែនជាមួយប្រទេសជិតខាង ដើម្បីកុំអោយកូនចៅជំនាន់ក្រោយនៅបន្តមានបញ្ហាមិនចេះចប់ជាមួយគ្នា”។

ដោយឡែកមន្រ្តីរាជរដ្ឋាភិបាលកម្ពុជា និងពលរដ្ឋកម្ពុជានៅថ្ងៃទី១៥ ខែ មិថុនា ឆ្នាំ ២០២៥នេះក៏បានបង្ហាញការអបអរសាទរខួប៦៣ឆ្នាំ ១៥ មិថុនា ១៩៦២ ឈ្នះក្តីរឿងប្រាសាទព្រះវិហារពីប្រទេសថៃយ៉ាងច្រើនតាមរយៈបណ្តាញសង្គម តិកតុក និងប្រព័ន្ធអេឡិកត្រូនិកជាច្រើនទៀត។

ដោយឡែកក្នុងដែរ គេឃើញ រដ្ឋមន្រ្តីក្រសួងព័ត៌មាន ឯកឧត្តម នេត្រ ភក្រ្តា បានលើកឡើងតាមរយៈបណ្តាញសង្គមហ្វេសប៊ុកថា៖”១៥ មិថុនា ១៩៦២ – ១៥ មិថុនា ២០២៥ អបអរសាទរខួប ៦៣ឆ្នាំ នៃសាលក្រមរបស់តុលាការយុត្តិធម៌អន្តរជាតិ (ICJ) ទីក្រុងឡាអេ ដែលបានប្រគល់អធិបតេយ្យភាពលើប្រាសាទព្រះវិហារ ដល់ព្រះរាជាណាចក្រកម្ពុជា។ ខ្ញុំមានមោទនភាពដែលបានកើតជាជនជាតិខ្មែរ!”។

ជាមួយគ្នានេះក្រសួងកសិកម្មរុក្ខាប្រមាញ់ និងនេសាទ បានចេញសារ អបអរសាទរ ខួប៦៣ឆ្នាំ នៃសាលក្រមរបស់តុលាការយុត្តិធម៌អន្តរជាតិ (ICJ) ទីក្រុងឡាអេ ដែលបានប្រគល់អធិបតេយ្យភាពលើប្រាសាទព្រះវិហារ ដល់ប្រទេសកម្ពុជា១៥ មិថុនា ១៩៦២ – ១៥ មិថុនា ២០២៥។

ក្រៅពីនេះគេក៏ឃើញពលរដ្ឋ មន្រ្តីរាជការ សិស្ស-និស្សិត កម្ពុជា បានបង្ហាញការអបអរសាទរ ខួប៦៣ឆ្នាំ នៃសាលក្រមរបស់តុលាការយុត្តិធម៌អន្តរជាតិ (ICJ) ទីក្រុងឡាអេ ដែលបានប្រគល់អធិបតេយ្យភាពលើប្រាសាទព្រះវិហារ ដល់ប្រទេសកម្ពុជា ១៥ មិថុនា ១៩៦២ – ១៥ មិថុនា ២០២៥នេះយ៉ាងច្រើនតាមរយៈបណ្តាញសង្គមហ្វេសប៊ុក។

ទោះបីយ៉ាងណាខណៈដែលកម្ពុជាអបអរសាទរប៦៣ឆ្នាំ នៃសាលក្រមរបស់តុលាការយុត្តិធម៌អន្តរជាតិ ទីក្រុងឡាអេ ដែលបានប្រគល់អធិបតេយ្យភាពលើប្រាសាទព្រះវិហារ ដល់ប្រទេសកម្ពុជា និងពិសេសកម្ពុជាបានសម្រេចចិត្តដាក់ពាក្យប្តឹងតំបន់ចំនួន៤គឺប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបីទៅតុលាការយុត្តិធម៌អន្តរជាតិដែរនេះ បណ្តាញសារព៏ត៌មានថៃ ឯណោះវិញបង្ហាញការភ្ញាក់ផ្អើល និងប្រកាសឱ្យពលរដ្ឋរបស់គេដឹងពីកម្ពុជាបានសម្រេចប្តឹងទៅកាន់តុលាការយុត្តិធម៌អន្តរជាតិ យ៉ាងផុលផុស។ក្នុងនេះដូចជាកាសែតថៃរ៉ាត់ បានចេញផ្សាយនាព្រឹកថ្ងៃទី១៥ ខែ មិថុនា ឆ្នាំ ២០២៥នេះដោយដាក់ចំណងជើងថា”បន្ទាន់!កម្ពុជាបានដាក់ពាក្យប្តឹងទៅកាន់តុលាការយុត្តិធម៌អន្តរជាតិតំបន់ទាំង៤ ដែលមានទំនាស់ ដោយ ជ្រើសរើសថ្ងៃទី១៥ ខែមិថុនា ព្រោះថាជាថ្ងៃតែមួយដែលកម្ពុជាបានឈ្នះក្តីតុលាការយុត្តិធម៌អន្តរជាតិ (ICJ) ទីក្រុងឡាអេ លើក្តីរឿងប្រាសាទព្រះវិហារ។

ជាងនេះទៅទៀតបណ្តាញសារព័ត៌មានថៃ និងអ្នកជំនាញថៃជាច្រើនបង្ហាញការព្រួយបារម្ភថា ថៃនឹងចាញ់ក្តីកម្ពុជាម្តងទៀត ហើយបានជំរុញឱ្យរដ្ឋាភិបាលរបស់ខ្លួនកុំឱ្យទទួសស្គាល់យុត្ថាធិការតុលាការយុត្តិធម៌អន្តរជាតិ ទីក្រុងឡាអេ ប្រទេសហូឡង់៕

ដោយ ៖ ម៉ាដេប៉ូ