សម្ដេចធិបតី៖ ទ័ពថៃ ចោទកងទ័ពកម្ពុជាថា តម្រង់កាណុងដាក់ ប៉ុន្ដែគេវិញចល័តទ័ព និងកាំភ្លើងធំរាល់ថ្ងៃ
(ភ្នំពេញ)៖ ប្រមុខរាជរដ្ឋាភិបាលកម្ពុជា បានបញ្ជាក់ថា កងទ័ពថៃ បានចោទកងទ័ពកម្ពុជាថា តម្រង់កាណុងដាក់ ប៉ុន្ដែសម្រាប់ពួកគេវិញ ចល័តទ័ព និងអូសកាំភ្លើងធំរាល់ថ្ងៃ ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដូច្នេះក្នុងពិធីបិទមហាសន្និបាតវិសាមញ្ញកាយរឹទ្ធិជាតិកម្ពុជា នៅរាជធានីភ្នំពេញ នាល្ងាចថ្ងៃទី១៧ ខែមិថុនា ឆ្នាំ២០២៥ ដោយមានការចូលរួមពីថ្នាក់ដឹកនាំក្រុមប្រឹក្សា និងគណៈកម្មាធិការប្រតិបតិ្ត ក.ជ.ក. ថ្នាក់ជាតិ រាជធានីខេត្ត ក្រុងស្រុកខណ្ឌ ក្មួយៗកាយរឹទ្ធិប្អូន កាយរឹទិ្ធជំទង់ និងកាយរឹទិ្ធរៀមច្បង ចំនួន ១២០០នាក់ ។
សម្ដេចធិបតី បានបន្តថា ចំពោះកងទ័ពកម្ពុជានៅជួរមុខ មានអ្នកលើកឡើងថា ឃើញពាក់ស្បែកជើងផ្ទាត់ ប៉ុន្ដែសម្ដេចឆ្លើយតបទៅវិញថា ពេលខ្លះវាជាភាពងាយស្រួលរបស់ពួកគាត់ មិនមែនខ្វះខាតសម្ភារៈទេ។ យ៉ាងណាមិញ សម្ដេចបានសង្កត់ធ្ងន់ថា ទោះបីជាពាក់ស្បែកជើងផ្ទាត់ ក៏កងទ័ពកម្ពុជា មិនខ្លាចញញើតនឹងការប្រយុទ្ធការពារទឹកដីដែរ ។
សូមជម្រាបថា ជុំវិញករណីកងទ័ពថៃ ចោទកងទ័ពកម្ពុជាថា តម្រង់កាណុងដាក់ ត្រូវបានឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានចេញមកបញ្ជាក់ថា នេះជាយុទ្ធវិធីការពារជាតិរបស់កម្ពុជា ពេលយើងបំពាក់សព្វាវុធ គឺដើម្បីការពារបូរណភាពទឹកដីច្បាស់ណាស់គោលដៅ គឺតម្រង់ទៅខ្មាំងសត្រូវ មិនដែលមានក្បួនទ័ពណា បង្វែរកាណុង មកផ្ទះខ្លួនឯងនោះទេ ឬមួយកងទ័ពថៃរៀនយុទ្ធវិធី ខុសពីកម្ពុជា? ជម្រើសសន្តិវិធី គឺការចរចារវាងរដ្ឋាភិបាលទាំងពីរ ទាំងផ្នែកនយោបាយ ផ្នែកសេដ្ឋកិច្ច និងផ្នែកផ្សេងៗ ចំពោះផ្នែកយោធា គឺជម្រើសចុងក្រោយ។ យើងត្រៀមរួចជាស្រេចក្នុងការការពារទឹកដីកម្ពុជា ដោយគ្មានមហិច្ឆតាឈ្លានពានទៅប្រទេសជិតខាងឡើយ ។
ជាមួយគ្នានេះដែរ ក្រសួងការពារជាតិ នៅល្ងាចថ្ងៃទី១៧ ខែមិថុនា ឆ្នាំ២០២៥ បានបង្ហាញការសោកស្ដាយ ដែលភាគីថៃ មិនបានគោរពនូវកិច្ចព្រមព្រៀង ហើយថែមទាំងបានបង្កើនការធ្វើសកម្មភាពរំលោភបំពានលើអធិបតេយ្យ និងបូរណភាពទឹកដីកម្ពុជា ផ្ទុយពីអនុស្សារណៈយោគយល់គ្នាឆ្នាំ២០០០។ នេះបើតាមសេចក្ដីប្រកាសព័ត៌មាន ។
ក្រសួងការពារជាតិ បានឱ្យដឹងទៀតថា ភាគីថៃ បានបង្កើនសកម្មភាពបង្ហោះដ្រូន ការជីកលេណដ្ឋាន ការបង្កើន និងចល័តអាវុធគាំទ្រ និងសព្វាវុធគ្រប់ប្រភេទ ការសាងសង់ហេដ្ឋារចនាសម្ព័ន្ធ និងបង្កើនចំនួនទាហាននៅតាមព្រំដែនក្នុងភូមិសាស្ដ្រខេត្ដព្រះវិហារ និងខេត្ដឧត្ដរមានជ័យ ដែលជាការគំរាមកំហែងធ្ងន់ធ្ងរដល់សន្ដិភាព និងសន្ដិសុខនៃប្រទេសទាំងពីរ ។
តែយ៉ាងណា ក្រសួងការពារជាតិ បញ្ជាក់ថា កងទ័ពកម្ពុជា គាំទ្រនូវជំហររបស់រាជរដ្ឋាភិបាលកម្ពុជា ក្នុងការដោះស្រាយជម្លោះតាមច្បាប់អន្ដរជាតិ និងដោយសន្ដិវិធី ព្រមទាំងរក្សាជំហរយ៉ាងមុតមាំទាំងកងទ័ព ទាំងប្រជាជននៅទូទាំងប្រទេស គោរពអធិបតេយ្យរបស់ប្រទេសជិតខាង និងប្ដេជ្ញាប្រែក្លាយតំបន់ព្រំដែនទៅជាតំបន់សន្ដិភាព។ ប៉ុន្ដែកម្ពុជា ក៏មិនអនុញ្ញាតជាដាច់ខាតដល់ការប៉ុនប៉ងរំលោភឈ្លានបានពីប្រទេសណាមួយ ហើយប្ដេជ្ញាការពារបូរណភាពទឹកដីទោះជាក្នុងតម្លៃណាក៏ដោយ ៕
អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ
