ការដឹកនាំប្រទេសដោយគណបក្សប្រជាជនកម្ពុជា ជ្រើសរើសយកការដោះស្រាយបញ្ហាព្រំដែនជាមួយប្រទេសជិត ខាងដោយសន្តិវិធី និងផ្អែកលើច្បាប់អន្តរជាតិ
ភ្នំពេញ៖ កម្ពុជាត្រូវការតែយុត្តិធម៌ ភាពត្រឹមត្រូវ និងច្បាស់លាស់ ក្នុងការកំណត់ខ្សែព្រំដែន ជាមួយប្រទេសជិតខាង ដើម្បីកុំ ឱ្យបញ្ហាព្រំដែននេះ មិនអាចចប់ជាមួយគ្នា និងបន្តដល់កូនចៅជំនាន់ក្រោយ។ នេះជាប្រសាសន៍ដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នាថ្ងៃទី១៥ ខែមិថុនា ឆ្នាំ២០២៥ ដែលជាថ្ងៃប្រវត្តិសាស្ត្រ ដែលតុលាការយុត្តិធម៌អន្តរជាតិ (ICJ) បានសម្រេចឱ្យកម្ពុជាឈ្នះ លើរឿងក្តីប្រាសាទព្រះវិហារ។
រាជរដ្ឋាភិបាលកម្ពុជា ដែលកំពុងដឹកនាំដោយគណបក្សប្រជាជនកម្ពុជា ដែលបានបង្ហាញនូវគោលបំណងយ៉ាងម៉ឹងម៉ាត់ និងច្បាស់លាស់បំផុត គឺថែរក្សាសន្តិភាព ដែលរកបានដោយកម្រ, ដោយយកជីវិតធ្វើដើមទុន របស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភានៃព្រះរាជាណាចក្រកម្ពុជា ក្នុងការដឹកកម្លាំងអ្នកស្នេហាជាតិ ប្រមូលផ្តុំការតស៊ូសង្រ្គោះជីវិតប្រជាជន និងរំដោះជាតិពីរបបប្រល័យពូជសាសន៍ ប៉ុល ពត នាថ្ងៃទី០៧ ខែមករា ឆ្នាំ១៩៧៩។ គណបក្សប្រជាជនកម្ពុជា បានបន្តដឹកនាំការកសាងប្រទេសពីបាតដៃទទេរ ពីគំនរផេះផង់ ក្នុងបរិការណ៍ដៃម្ខាងការពារវិលត្រឡប់ នៃរបបអាវខ្មៅដ៏សាហាវយង់ឃ្នង, ដៃម្ខាងប្រឹងប្រែងអភិវឌ្ឍន៍ជីវភាពប្រជាជន ស្តារនិងកសាងប្រទេសថែមទៀត។ ក្រោមការដឹកនាំដ៏ប៉ិនប្រសប់ និងឈ្លាសវៃបំផុត សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា ជាបន្តបន្ទាប់ បានពុះពារគ្រប់ការលំបាករហូតបានបង្រួបបង្រួមជាតិ បញ្ចប់សង្រ្គាមនយោបាយឈ្នះ ឈ្នះ ដោយនាំយកសន្តិភាព និងស្ថិរភាពនយោបាយពេញលេញ ជូនប្រជាជនកម្ពុជា និងមាតុភូមិកម្ពុជា នាថ្ងៃទី២៩ ខែធ្នូឆ្នាំ១៩៩៨ និងថែមទាំងបានធ្វើឱ្យកម្ពុជា មានការរីកចម្រើនជាបន្តបន្ទាប់ រហូតដល់សព្វថ្ងៃ។
រាជរដ្ឋាភិបាលបច្ចុប្បន្ន ដែលដឹកនាំដោយគណបក្សប្រជាជនកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាអនុប្រធានគណបក្សប្រជាជនកម្ពុជា ជាអ្នកដឹកនាំបន្តវេន ប្រកបដោយសក្តានុពល និងចក្ខុវិស័យច្បាស់លាស់ បានបន្តជ្រោងទង់សន្តិភាព និងការអភិឌ្ឍជូនជាតិ មាតុភូមិកម្ពុជា និងនៅជាមួយប្រជាជនគ្រប់កាលៈទេសៈ ព្រមទាំង បន្តដឹកនាំប្រទេសឆ្ពោះទៅសម្រេចបាន ចក្ខុវិស័យឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ និងនៅឆ្នាំ ២០៥០ កម្ពុជានឹងក្លាយជាប្រទេសមានចំណូលខ្ពស់។ រាជរដ្ឋាភិបាលបន្តវេនសម្រេចបានសមិទ្ធផលជាច្រើន ទាំងកម្រិតជាតិ និងអន្តរជាតិ រហូតទទួលបានកិត្តិស័ព្ទល្បាញល្បីគ្រប់ទិសទី ពេញសកល ជាប្រទេសមានការអភិវឌ្ឍឆាប់រហ័ស និងប្រជាជនមានជីវភាពរីកចម្រើនជាលំដាប់។ ទាក់ទាញបានការវិនិយោគ បង្កើនការងារ អភិវឌ្ឍហេដ្ឋរចនាសម្ព័ន្ធបម្រើ ឱ្យខឿនសេដ្ឋកិច្ចជាតិ,មានកំណើនសេដ្ឋកិច្ច ជាបន្តបន្ទាប់ ចំនួន៦ភាគរយ នៅឆ្នាំ២០២៤ និងត្រូវបានព្យាករណ៍មានកំណើន ជាង៦ភាគរយ នៅឆ្នាំ២០២៥។
ទាក់ទងនឹងបញ្ហាបូរណភាពទឹកដី សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានដឹកនាំប្រទេសកន្លងទៅ ដោយយកគោលនយោយបាយ និងយុទ្ធសាស្រ្តរឹងមាំ ច្បាស់លាស់ ពិតប្រាកដ ការពារទឹកដីកម្ពុជា មិនឱ្យបាត់បង់មួយមីលីម៉ែត, ការពារជាតិ ការពារប្រជាជនកម្ពុជា ប្រឆាំងនឹងការរំលោភ អធិបតេយ្យភាព និងជាពិសេសការបំពានព្រំដែនណាមួយ។ នៅពេលបច្ចុប្បន្នរាជរដ្ឋាភិបាល របស់គណបក្សប្រជាជនកម្ពុជា ដែលដឹកនាំបន្តសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាអនុប្រធានគណបក្សប្រជាជនកម្ពុជា បានដាក់ចេញគោលនយោបាយ យុទ្ធសាស្រ្តជាតិ ដោះស្រាយបញ្ហាដោយសន្តិវិធី ក្នុងការកំណត់ខ្សែព្រំដែន ដើម្បីកុំឱ្យបន្តដល់កូនចៅជំនាន់ក្រោយ ក្នុងពេលជាមួយគ្នានេះ បានពង្រឹងខឿនការពារជាតិ បំពាក់សម្ភារ បច្ចេកទេស វិទ្យាសាស្រ្ត និងមូលធនមនុស្ស ឱ្យមានការរីកចម្រើនឥតឈប់ឈរ។
ស្ថានភាពពិតប្រាកដនៃបញ្ហាព្រំដែនរវាងកម្ពុជា និងថៃ ជាពិសេសការលួចឆ្មក់បាញ់សម្លាប់ទាហានខ្មែរពីខាងភាគីថៃ ការសម្រេចចិត្តជាឯកតោភាគីរបស់ថៃបិទព្រំដែន និងសកម្មភាពដែលថៃ បានរំលោភបំពានមកលើកម្ពុជា ក៏ដូចជាបូរណភាពទឹកដីកម្ពុជា នាពេលកន្លងមក ដែលជាផ្នែកមួយដែលកម្ពុជាត្រូវតែមានវិធានការក្នុងការទប់ស្កាត់ឆ្លើយតបត្រឡប់ទៅវិញ។
ក្នុងពេលនេះ រាជរដ្ឋាភិបាលរបស់គណបក្សប្រជាជនកម្ពុជា មានជំហម៉ឺងម៉ាត់ ក្នុងការដោះស្រាយបញ្ហាព្រំដែន ជាមួយប្រទេសថៃ ដោយសន្តិវិធី និងច្បាប់អន្តរជាតិ ដោយបានបញ្ជូនលិខិតជាផ្លូវការទៅកាន់តុលាការយុត្តិធម៌អន្តរជាតិ(ICJ) ដើម្បីជួយស្វែងរកដំណោះស្រាយពាក់ព័ន្ធទៅនឹងបញ្ហាវិវាទព្រំដែន នៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ក្នុងភូមិសាស្រ្តខេត្តព្រះវិហារ និងឧត្តរមានជ័យ។ ការដឹកនាំនេះ បានទទួលការគាំទ្រយ៉ាងពេញទំហំង ពីប្រជាពលរដ្ឋគ្រប់ស្រទាប់វណ្ណៈនៃមហាគ្រួសារខ្មែរ នៅគ្រប់ទិសទី ខណៈកងកម្លាំងនិងសព្វាវុធរបស់កម្ពុជា ត្រូវបានត្រៀមបម្រុងជាប់ជាប្រចាំ ដើម្បីការពារទឹកដី ក្នុងករណីមានការឈ្លានពានណាមួយ។
សូមបញ្ជាក់ថា កម្ពុជាសម្រេចបានយុត្តិធម៌ជាប្រវត្តិសាស្រ្ត សម្រាប់ប្រជារាស្រ្តខ្មែរ និងជាតិមាតុភូមិកម្ពុជាដ៏បវរ កាលពី ៦៣ឆ្នាំមុន គឺនៅថ្ងៃទី១៥ ខែមិថុនា ឆ្នាំ១៩៦២ ដែលតុលាការយុត្តិធម៌អន្តរជាតិ (ICJ) បានសម្រេចឱ្យកម្ពុជាឈ្នះ លើរឿងក្តីប្រាសាទព្រះវិហារ។ ការដឹកនាំប្រទេសរបស់គណណបក្សប្រជាជនកម្ពុជា បានបង្ហាញយ៉ាងជាក់ច្បាស់ថា កម្ពុជាត្រូវការតែយុត្តិធម៌ ភាពត្រឹមត្រូវ និងច្បាស់លាស់មួយ ក្នុងការកំណត់ខ្សែព្រំដែនជាមួយប្រទេសជិតខាង ដើម្បីកុំឱ្យកូនចៅជំនាន់ក្រោយ នៅបន្តមានបញ្ហាមិនចេះចប់ជាមួយគ្នា ជាពិសេសនោះគឺបងប្អូនជនរួមជាតិទាំងអស់ បានផ្ដល់ការទុកចិត្តយ៉ាងពិតប្រាកដ គ្រប់ទិសទី មកលើរាជរដ្ឋាភិបាលកម្ពុជានីតិកាលទី៧ ដែលដឹកនាំដោយគណបក្សប្រជាជនកម្ពុជា ក្នុងការខិតខំប្រឹងប្រែង ធ្វើកិច្ចការងារនេះប្រកបដោយឆន្ទៈ និងការទទួលខុសត្រូវខ្ពស់ ដើម្បីការពារបូរណភាពទឹកដី និងឧត្តមប្រយោជន៍របស់ជាតិនិងប្រជាជនកម្ពុជា៕
ដោយ៖អប្សរា
