(ភ្នំពេញ)៖ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានប្រកាសអបអរសាទរ ខួបអនុស្សាវរីយ៍ លើកទី៧៤ ថ្ងៃបង្កើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២៥) ស្របពេលដែលថ្ងៃនេះ គណបក្សប្រជាជនកម្ពុជា ប្រារព្ធមីទ្ទិញអបអរសាទរ ខួបលើកទី៧៤ ថ្ងៃបង្កើតគណបក្សប្រជាជនកម្ពុជា
(២៨ មិថុនា ១៩៥១ – ២៨ មិថុនា ២០២៥) យ៉ាងមហោឡារិក នៅទីស្នាក់ការកណ្ដាលគណបក្ស (គ៨៥) ស្ថិតក្នុងខណ្ឌចំការមន រាជធានីភ្នំពេញ ។

​គណបក្សប្រជាជនកម្ពុជា នៅគ្រាដំបូងមានឈ្មោះថា «បក្ស​ប្រជាជន​បដិវត្តន៍ខ្មែរ» ដែលត្រូវបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ ។

គណបក្សនេះ មានប្រភពចេញពីចលនាតស៊ូស្នេហាជាតិ របស់ប្រជាជនកម្ពុជា ប្រឆាំងរបបអាណានិគមនិយម ដើម្បី​ឯករាជ្យជាតិកម្ពុជា។ គណបក្សប្រជាជនកម្ពុជា គឺជាគណបក្សនយោបាយតែមួយគត់ ដែលប្រជាជនជឿជាក់ និង​គាំទ្រលើការដឹកនាំដ៏ត្រឹមត្រូវ ឆ្លើយតបតាមតម្រូវការ និងសំណូមពររបស់ប្រជាជន ពិសេស ធានាបាននូវ​ការ​ការពារ​សុខសន្តិភាព ប្រជាធិបតេយ្យ និងនីតិរដ្ឋ ការអភិវឌ្ឍសេដ្ឋកិច្ច សង្គម ការលើកស្ទួយជីវភាពប្រជាជន និងការបន្ត​កែទម្រង់លើគ្រប់វិស័យ។

គណបក្សប្រជាជនកម្ពុជា បានប្រកាន់ខ្ជាប់អត្តចរិត ឥតប្រែប្រួលរបស់ខ្លួន គឺជាកម្លាំងឈានមុខរបស់ប្រជាជន ដែលបានពុះពារធ្វើអ្វីៗគ្រប់យ៉ាង ដើម្បីឯករាជ្យ សន្ដិភាព សេរីភាព អព្យាក្រឹត ប្រជាធិបតេយ្យ និងវឌ្ឍនភាព​នៃមាតុភូមិកម្ពុជា។ ផ្អែកលើមូលដ្ឋាននេះហើយ ដែល​គណបក្សប្រជាជនកម្ពុជា បានក្លាយជាបង្អែកដ៏រឹងមាំ ជាជំនឿ និងក្តី​សង្ឃឹមរបស់ប្រជាជន។ សច្ចធម៌នេះ បានកើតឡើងពីភាពប្រាកដ​ជាក់​ស្តែងនៃនយោបាយ និងសកម្មភាព​ជាប្រចាំរបស់គណបក្ស ចាប់តាំងពីពេលបដិសន្ធិឡើង រហូតមកដល់បច្ចុប្បន្ន។ ជាក់ស្ដែង គណបក្សបានដឹកនាំធ្វើការ​តស៊ូ​រួមចំណែកដល់ការទាមទារឯករាជ្យ និងបានចូលរួមយ៉ាងសកម្ម ក្នុងការការពារឯករាជ្យ សន្តិភាព អធិបតេយ្យជាតិ​ពីឆ្នាំ១៩៥៣-១៩៧០។ ក្នុងពេលដែលប្រទេសជាតិ ធ្លាក់ចូលក្នុងភ្លើងសង្គ្រាមពីឆ្នាំ១៩៧០-១៩៧៥ ក្រោយពីបន​ក្បត់ជាតិលោក លន់ នល់ ធ្វើរដ្ឋប្រហារផ្ដួលរំលំ សម្តេចព្រះ នរោត្តម ​សីហនុ ព្រះបរមរតនកោដ្ឋ គណបក្សបានបន្ត​ដឹកនាំ​ប្រជាជនធ្វើការ​តស៊ូ ដើម្បីរំដោះប្រទេសជាតិពីកណ្ដាប់ដៃ ពួកខ្ញុំកញ្ជះបរទេសរហូត​ទទួលបានជ័យជម្នះ​ទាំង​ស្រុង។ ប៉ុន្តែក្រោយពីសង្គ្រាមផុតរលត់ទៅ​បនក្បត់ ប៉ុល ពត អៀង សារី ខៀវ សំផន បានឆក់ប្លន់យកជោគ​ជ័យនេះ​ទៅកាន់​កាប់នៅក្នុងកណ្ដាប់ដៃបក្ខពួក និងគ្រួសាររបស់ខ្លួន​បង្កើតជា របបកម្ពុជាប្រជាធិបតេយ្យ អនុវត្តន៍នយោបាយ​ប្រល័យ​ពូជសាសន៍ យ៉ាងសាហាវយង់ឃ្នង ទៅលើអាយុជីវិតប្រជាជនកម្ពុជា យ៉ាងសាហាវព្រៃផ្សៃបំផុត។

ក្នុងពេលដែលប្រទេសជាតិធ្លាក់ទៅក្នុងជ្រោះ នៃមហាវិនាសកម្មនេះ គណបក្សប្រជាជនកម្ពុជា បានដឹកនាំចលនា​សង្គ្រោះជាតិ វាយផ្តួលរំលំរបបប្រល័យ ពូជសាសន៏នៅថ្ងៃទី៧ ខែមករា ឆ្នាំ១៩៧៩ សង្គ្រោះ​ជាតិ និងប្រជាជន​កម្ពុជា ឱ្យមានជីវិតរស់ឡើងវិញ បានទាន់ ពេលវេលា ដោយបានបញ្ចប់ទាំងស្រុងសម័យកាលដ៏ខ្មៅ ងងឹតបំផុត នៃកម្ពុជា បើកឡើងនូវទំព័រប្រវត្តិសាស្ត្រថ្មី សម្រាប់មាតុភូមិកម្ពុជា និងប្រជាជន​កម្ពុជា លើមាគ៌ាសន្តិភាព បង្រួប​បង្រួម​ជាតិ ប្រជាធិបតេយ្យ និង​អភិវឌ្ឍន៍ ។

ក្នុងរយៈពេល ៤៦ ឆ្នាំកន្លងមកនេះ គណបក្សប្រជាជនកម្ពុជា បានដឹកនាំប្រទេសជាតិសម្រេចបាននូវសមិទ្ធផល​យ៉ាង​ធំធេងលើគ្រប់វិស័យ ជាពិសេស គឺការការពារ ការរស់ឡើងវិញរបស់ប្រជាជន ទប់ស្កាត់ការប៉ុនប៉ង វិលមក​សារជា​ថ្មី នៃរបបប្រល័យពូជសាសន៍ ការស្តារ និងកសាងប្រទេសឡើងវិញតាំងពីបាតដៃទទេ ឱ្យមានស្ថិរភាព​ជា​ជំហានៗ ​បង្កើតបានបុព្វបទ និងលក្ខណៈជាមូលដ្ឋានសម្រាប់ ការបង្រួបបង្រួមជាតិ ឯកភាពជាតិ ឯកភាពទឹកដីការ​បង្កើត​រដ្ឋធម្មនុញ្ញថ្មី និងព្រះរាជាណាចក្រកម្ពុជាទី២ នៅឆ្នាំ១៩៩៣ ។

តាមរយៈនយោបាយឈ្នះឈ្នះ ដែលដាក់ចេញដោយ សម្ដេចតេជោ ហ៊ុន សែន រាជរដ្ឋាភិបាលកម្ពុជា ក្រោមការដឹក​នាំរបស់គណបក្សប្រជាជនកម្ពុជា បង្កើតបានសន្តិភាពពេញលេញជូនប្រទេសជាតិ ចាប់ពីខែធ្នូ ឆ្នាំ១៩៩៨។ រាជរដ្ឋា​ភិបាលកម្ពុជា ក្រោមការដឹកនាំរបស់ គណបក្សប្រជាជនកម្ពុជា កាន់តែទទួលបាននូវសមិទ្ធផលធំៗ​ជាច្រើន ទៀត ក្នុងនោះគឺការការពារបានសន្តិភាព ស្ថិរភាពនយោបាយ និងការអភិវឌ្ឍ។

លទ្ធិប្រជាធិបតេយ្យកាន់តែត្រូវពង្រឹងបានជាលំដាប់ ក្រោមម្លប់ សន្តិភាព ការបោះឆ្នោតជ្រើសតាំងតំណាងរាស្ត្រ​នីតិកាល​ទី៧ បានប្រព្រឹត្តទៅដោយជោគជ័យ ដែលនៅក្នុងការបោះឆ្នោតនេះ គណបក្សប្រជាជនកម្ពុជា បាន​ទទួល​ជ័យជម្នះ ដោយទទួលបាន ១២០ អាសនៈ ក្នុងរដ្ឋសភា។ ឆ្លងតាមលទ្ធផលនេះ រាជរដ្ឋាភិបាល នីតិកាលទី៧ នៃរដ្ឋសភា បានប្រកាសនូវកម្មវិធីនយោបាយរបស់ខ្លួន ដែលត្រូវបាន កសាងលើមូលដ្ឋានកម្មវិធីនយោបាយរបស់​គណបក្ស និងបានដាក់ចេញយុទ្ធសាស្ត្របញ្ចកោណ-ដំណាក់កាលទី១ (២០២៣-២០២៨) ដើម្បីកំណើន ការងារ សមធម៌ ប្រសិទ្ធភាព និងចីរភាព សំដៅការពារ ថែរក្សា ពូនជ្រំសមិទ្ធផលជាតិនិង កសាង មូលដ្ឋាន​ឆ្ពោះទៅសម្រេច​ចក្ខុវិស័យកម្ពុជា ប្រែក្លាយជាប្រទេសមាន ចំណូលមធ្យម​កម្រិតខ្ពស់នៅឆ្នាំ២០៣០និង ប្រែក្លាយជាប្រទេស​មាន​ចំណូលខ្ពស់ឆ្នាំ២០៥០ ៕

ដោយ ៖ វណ្ណលុក