(ខេត្តសៀមរាប)៖ ឯកឧត្តម សែម រតនា សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានស្រុកបន្ទាយស្រី ខេត្តសៀមរាប នៅរសៀលថ្ងៃទី២៨ ខែមិថុនា ឆ្នាំ២០២៥ បានអញ្ជើញជាអធិបតី ក្នុងពិធីអបអរសាទរខួបអនុស្សាវរីយ៍លើកទី៧៤ ថ្ងៃកំណើតគណបក្សប្រជាជនកម្ពុជា ២៨ មិថុនា ១៩៥១-២៨ មិថុនា ២០២៥ ដែលមានការចូលរួមពីក្រុមការងារចុះមូលដ្ឋានឃុំទាំង៥ នៃស្រុកបន្ទាយស្រី សរុបប្រមាណជិត ៣០០នាក់ ។

បន្ទាប់ពីបានអានសន្ទរកថា របស់សម្តេចអគ្គមហាសេនាតេជោ ហ៊ុន សែន ប្រធានគណបក្សប្រជាជនកម្ពុជារួច ឯកឧត្តម សែម រតនា បានបង្ហាញថា ការបង្កើត គណបក្សប្រជាជនកម្ពុជា នាថ្ងៃទី២៨ ខែមិថុនា ឆ្នាំ១៩៥១ មកបានប្រកាន់ខ្ជាប់នូវគោលបំណងដើមរបស់ខ្លួន គឺប្រមូលកម្លាំងគ្រប់ជនជាតិកម្ពុជា ដែលមានឧត្តមគតិស្នេហាជាតិមាតុភូមិ ស្រឡាញ់លទ្ធិប្រជាធិបតេយ្យ និងសន្តិភាព ដោយមិនប្រកាន់ឋានៈ ជីវភាព ដើមកំណើតជាតិ ជំនឿសាសនា អតីតកាល ដើម្បីរួមកម្លាំងគ្នារំដោះប្រជាជាតិឱ្យរួចផុតពីការ ឈ្លានពាន ការត្រួតត្រា ការជិះជាន់ធ្វើបាបគ្រប់បែបយ៉ាង ការពារសមិទ្ធផលសង្គមជាតិ និងកសាងប្រទេសកម្ពុជាមួយឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម។ ពិធីនេះដែរ ក៏ជាការគោរពដឹងគុណដល់វីរភាពរបស់ វីរជនស្នេហាជាតិទាំងអស់ ដែលបានបូជាជីវិត ដើម្បីការពារប្រទេសបូរណភាពទឹកដី ។

គួររំលឹកថា កម្ពុជា ក្នុងអតីតកាល ដែលជាប្រទេសក្រីក្រ រងនូវសង្គ្រាម អំពើប្រល័យពូជសាសន៍ និងមើលរំលងពីសហគមន៍អន្តរជាតិ បច្ចុប្បន្នប្រទេសកម្ពុជាបានក្លាយជាប្រទេសឯករាជ្យ ដែលអាចឈរជាប់លើឆាកអន្តរជាតិ ប្រកបដោយសេចក្ដីថ្លៃថ្នូរ និងស្មើមុខស្មើមាត់ជាមួយប្រទេសជាតិផ្សេងៗទៀត៕

ប្រភព ៖ ខេត្តសៀមរាប