ឯកឧត្តម ហ៊ុន ម៉ានី ៖ បន្ទាប់ពីប្រាសាទព្រះវិហារត្រូវបានដាក់បញ្ចូលក្នុងបញ្ជីបេតិកភណ្ឌពិភពលោកនៅឆ្នាំ២០០៨ ភាគីថៃបានបង្កភាពតានតឹង និងប្រឈមមុខដាក់គ្នាផ្នែកកងទ័ពនៅក្នុងតំបន់ប្រាសាទព្រះវិហារ និងនៅតាមបន្ទាត់ព្រំដែន
(ភ្នំពេញ)៖ ឯកឧត្តម ហ៊ុន ម៉ានី បានលើកឡើងថា បន្ទាប់ពីប្រាសាទព្រះវិហារត្រូវ បានដាក់បញ្ចូលក្នុងបញ្ជីបេតិកភណ្ឌពិភពលោកនៅឆ្នាំ២០០៨ ភាគីថៃបានបង្កភាព តានតឹង និងប្រឈមមុខដាក់គ្នាផ្នែកកងទ័ពនៅក្នុងតំបន់ប្រាសាទព្រះវិហារ និងនៅតាមបន្ទាត់ព្រំដែន។ ការប៉ះទង្គិចគ្នារវាងកងទ័ពនៃប្រទេសទាំងពីរបាននាំឱ្យមានការខូចខាតដល់ប្រាសាទព្រះវិហារដែលជាបេតិកភណ្ឌពិភពលោក និងបានបំផ្លាញទាំងស្រុងនូវផ្សារឈ្មោះ “ផ្សារជើងប្រាសាទ” ឬ “ផ្សារមុខប្រាសាទ” ដែលមានទីតាំងនៅជើងភ្នំព្រះវិហារដែលមានចំនួន ២៦២តូប ដោយមានប្រជាពលរដ្ឋអាស្រ័យផល ចំនួន ៣១គ្រួសារ។ ទោះបីជាយ៉ាងណាក៏ដោយ កម្ពុជាបានឈរលើគោលការណ៍ដោះស្រាយដោយសន្ដិវិធី និងច្បាប់អន្ដរជាតិ។ ជាក់ស្ដែងការប៉ះទង្គិចគ្នានាពេលនោះ បានធូរស្រាលទៅវិញបន្ទាប់ពីកម្ពុជាបានស្នើរទៅកាន់តុលាការអន្ដរជាតិ (ICJ) បកស្រាយឡើងវិញនូវសាលក្រមនៃរឿងក្ដីប្រាសាទព្រះវិហារ ថ្ងៃទី១៥ ខែមិថុនា ឆ្នាំ១៩៦២។
នេះជាការលើកឡើងរបស់ ឯកឧត្តម ហ៊ុន ម៉ានី នៅលើបណ្តាញសង្គមហ្វេសបុកផ្លូវការ នៅព្រឹកថ្ងៃទី៧ ខែកក្កដា ឆ្នាំ២០២៥ ស្របពេលដែលព្រះរាជាណាចក្រកម្ពុជា អបអរសាទរខួបជាប្រវត្តិសាស្ត្រទី១៧ឆ្នាំ នៃការដាក់បញ្ចូលប្រាសាទព្រះវិហារ ជាសម្បត្តិបេតិកភណ្ឌពិភពលោក (៧ កក្កដា ២០០៨-៧ កក្កដា ២០២៥)។
ក្នុងសំណេរលើបណ្តាញសង្គមដដែលបានបន្ថែមថា ប្រជាជនកម្ពុជាបានហែលឆ្លងនូវទុក្ខលំបាកវេទនាច្រើនរាប់មិនអស់ដែលកើតឡើងដោយសារសង្គ្រាមក្នុងអតីតកាល ដែលធ្វើឱ្យប្រជាជនកម្ពុជាស្គាល់យ៉ាងច្បាស់នូវតម្លៃនៃសុខសន្ដិភាព។ ការប៉ះទង្គិចគ្នាចន្លោះឆ្នាំ២០០៨ ដល់ ២០១១ បានបង្កជាផល់ប៉ះពាល់ជាច្រើនដល់ជីវភាពរបស់ប្រជាពលរដ្ឋ ជាពិសេសបងប្អូនប្រជាពលរដ្ឋដែលរស់នៅតាមបណ្ដោយព្រំដែន ដូចជា ដោយការជម្លៀសខ្លួនទៅកាន់ទីសុវត្ថិភាព និងអាក់ខាននូវការប្រកបរបរទទួលទានប្រចាំថ្ងៃ ក៏ដូចជាប៉ះពាល់ដល់ការសិក្សារៀនសូត្ររបស់សិស្សានុសិស្សផងដែរ។
ទោះបីជាយ៉ាងណាក៏ដោយ ស្មារតីរួមគ្នាជាធ្លុងមួយឧបត្ថមគាំទ្ររបស់ប្រជាពលរដ្ឋកម្ពុជាដែលជាសមរភូមិក្រោយបានក្លាយកម្លាំងគាំទ្រដល់កងទ័ពដែលឈរជើងនៅជួរមុខ។ ជាពិសេស ការគាំទ្រនេះបានក្លាយជាកម្លាំងរួមដ៏ខ្លាំងក្លាដែលខ្មាំងសត្រូវមិនអាចយកឈ្នះបាន។ មិនថាការប៉ះទង្គិចគ្នាក្នុងឆ្នាំ២០០៨ ដល់ ២០១១ ឬភាពតានតឹងប្រឈមមុខដាក់គ្នាក្នុងពេលនេះ កម្លាំងគាំទ្ររបស់ ប្រជាពលរដ្ឋដែលជាសមរភូមិក្រោយគឺជាខឿនការពារជាតិដ៏រឹងមាំ ជាកម្លាំងជំរុញទឹកចិត្តនិងស្មារតីកងទ័ពដែលឈរជើងនៅខ្សែត្រៀមជួរមុខ។ ក្នុងនាមជាប្រជាពលរដ្ឋ យើងជឿជាក់ និងគាំទ្រយ៉ាងពេញទំហឹងដល់រាជរដ្ឋាភិបាលកម្ពុជាដែលបានត្រៀមខ្លួនរួចជាស្រេច និងមានសមត្ថភាពគ្រប់គ្រាន់ក្នុងការការពារបូរណភាពដែនដី និងអធិបតេយ្យភាពជាតិ ក៏ដូចជាសមត្ថភាពក្នុងការគ្រប់គ្រងស្ថានការណ៍នានាដោយបោះជំហានយ៉ាងស្វាហាប់ប្រកបដោយភាពជឿជាក់៕
ដោយ៖ង៉ាន់ ទិត្យ
