(ភ្នំពេញ)៖ រដ្ឋមន្រ្តីក្រសួងបរិស្ថាន ស្វាគមន៍ចំពោះវិនិយោគិនគ្រប់ទិសទី ដែលមាន​គោលបំណងចូលរួមអភិវឌ្ឍន៍ប្រទេសកម្ពុជា ជាពិសេសលើកិច្ច​គាំពារបរិស្ថាន ស្រប​តាមគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំ របស់សម្តេច​មហា​បវរធិបតី ហ៊ុន ម៉ាណែត នាយករដ្ឋមន្រ្តី កម្ពុជា។ «ក្រសួងបរិស្ថាន សូមស្វា​គមន៍​ចំពោះបច្ចេកវិទ្យាថ្មីៗ ដែលត្រូវប្រើប្រាស់ក្នុងគ្រប់គ្រងបរិស្ថាន ដែលតម្រូវតាម​ស្ថានភាពសង្គម និងសេដ្ឋកិច្ចកម្ពុជាផងដែរ»។

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកឡើងបែបនេះ នៅរសៀលថ្ងៃទី ០៧ ខែកក្កដា ឆ្នាំ២០២៥បានទទួលជួបលោក Li Wenjie ប្រធាន​ក្រុមប្រឹក្សាភិបាលក្រុមហ៊ុន Guangzhou Zhongke Environmental Technology Co.,Ltd និងតំណាងក្រុមហ៊ុនផ្សេងទៀតមកពីប្រទេសចិនចូលជួប​សម្តែងការគួរសមនិងសំណេះសំណាល។

ឯកឧត្តមរដ្ឋមន្រ្តី បន្តថា ក្រសួងបរិស្ថាន បានកំពុងផ្តោតលើភាពស្អាត របស់យុទ្ធ​សាស្រ្តចក្រា​វិស័យបរិស្ថាន គឺស្អាតលើផ្ទៃមេឃ ស្អាតលើដី និងស្អាតលើទឹក ។ ចំពោះភាពស្អាតលើផ្ទៃមេឃ និង ស្អាតលើដី ក្រសួងបរិស្ថាន បានខិតខំប្រឹង​ប្រែង​ដាក់ចេញជាយុទ្ធនាការនានា ហើយបានទទួលលទ្ធផលល្អប្រសើរ ដោយមានការ​ចូល​រួម​យ៉ាងច្រើន ពីគ្រប់ភាគី ជាពិសេសរដ្ឋបាលថ្នាក់ក្រោមជាតិ អាជ្ញាធរមូលដ្ឋាន លោកគ្រូ អ្នកគ្រូ សិស្សានុសិស្ស និងប្រជាពលរដ្ឋនៅតាមមូលដ្ឋាន។ ដោយឡែក​ភាពស្អាតក្នុងទឹក ក្រសួងបរិស្ថាន បាននិងកំពុងរិះរកបច្ចេកទេសថ្មីៗបន្ថែមទៀត ដើម្បីឆ្លើយតបនឹងតម្រូវការសម្អាតទឹកកខ្វក់ចេញពីរោងចក្រ ដូចជាការរៀបចំអាង​ប្រព្រឹត្តិ​កម្ម​ទឹកកង្វក់ ស្របតាមបទដ្ឋានបច្ចេកទេសផង និងជួយសន្សំសំចៃជូនប្រជា​ជន និង វិនិយោគិនយើងផង នៅតាមតំបន់លំនៅឋាន រោងចក្រ សហគ្រាស និង​ទីប្រជុំជន។

ឯកឧត្តមបណ្ឌិតរដ្ឋមន្រ្តី បានផ្តល់អនុសាសន៍បន្តថា ក្រុមហ៊ុនវិនិយោគ អាចបង្កើត​ការិយាល័យនៅកម្ពុជាដើម្បីធ្វើការសិក្សា ស្វែងយល់ឱ្យកាន់តែច្បាស់ ពីឱកាសវិនិ​យោគ​ដែលកដែលរាជរដ្ឋាភិបាលកំពុងលើកទឹកចិត្ត ក្នុងនោះការពិនិត្យលើស្ថាន​ភាពជាក់ស្តែង លើគម្រោងវិនិយោគរៀបចំប្រពន្ធ័ប្រពឹត្តិកម្មទឹកកខ្វក់ ការផលិត​បរិក្ខាបច្ចេកទេសសំអាតសំណល់រាវនានា នៅកម្ពុជា។ ក្រសួងបរិស្ថានគាំទ្រចំពោះ​ផែនការរបស់ក្រុមហ៊ុន ដើម្បីរួមគ្នាធ្វើឱ្យបរិស្ថានកម្ពុជាយើង មានភាពស្អាត ភាពបៃតង និងចីរភាព ។

លោក Li Wenjie និងតំណាងក្រុមហ៊ុនមកពីប្រទេសចិន រួមមាន លោក Chen Zhiqiang នាយកគ្រប់គ្រងទូទៅ ក្រុមហ៊ុន Shenzhen Santai Environmental Protection Technology Co., Ltd. និងលោកស្រី He Yawen លេខាធិការក្រុមប្រឹក្សាភិបាល ក្រុមហ៊ុន Jiangxi Jindalai Environmental Protection Co., Ltd., Shenzhen Branch បានវាយ​តម្លៃខ្ពស់ និងកោតសរសើរចំពោះភាពរីកចម្រើនរបស់កម្ពុជា រួមនឹងកិច្ចខិតខំប្រឹង​ប្រែងរបស់ក្រសួងបរិស្ថាន ក្នុងការគ្រប់គ្រងបរិស្ថានបានល្អប្រសើរ និងបានទាក់​ទាញ ឱ្យមានការវិនិយោគ ដែលក្នុងនោះក្រុមហ៊ុនរបស់លោក មានបំណងចូលរួម​ចំណែកជំរុញភាពស្អាត ជាមួយ ក្រសួងបរិស្ថានផងដែរ។

លោកប្រធានក្រុមហ៊ុន បានលើកឡើងថា ក្រុមហ៊ុនធំៗ មកពីប្រទេសចិនទាំង៣ ដែលមានវត្តមាននៅថ្ងៃនេះ ធ្លាប់មានបទពិសោធន៍ជាង ១០ឆ្នាំ លើការរៀប​ចំប្រពន្ធ័ប្រព្រឹត្តិកម្មសំណល់រាវ នៅប្រទេសចិន ឥណ្ឌូនេស៊ី ឌូបៃ និងថៃ៕

ដោយ ៖ ង៉ាន់ ទិត្យ