អ្នកជំនាញប្រណាំងម៉ូតូនៅកម្ពុជា លោក គួន ផាន់តារា នៅតែបង្ហាញក្តីរំពឹងខ្ពស់ថា អាចរក្សាតំណែងជើងឯករបស់ខ្លួនបាន នៅក្នុងព្រឹត្តិការណ៍ខ្មែររ៉ាលីរ៉េដ ឆ្នាំ២០១៩ ទោះបីជាកំណើនកីឡាករជាតិ និងអន្តរជាតិចូលរួមប្រជែងច្រើនជាង ឆ្នាំ២០១៨កន្លងទៅក៏ដោយ ការថ្លែងបែបនេះធ្វើឡើងក្នុងបទសម្ភាសន៍ជាមួយអ្នកសារព័ត៌មាន កាលពីចុងសប្តាហ៍កន្លងទៅ ។

អ្នកជំនាញប្រណាំងម៉ូតូឧបសគ្គរូបនេះ បញ្ជាក់ថា រូបលោក និងមិត្តរួមក្រុមបានហ្វឹកហាត់ត្រៀមខ្លួនយ៉ាងល្អ ដូចជា ម៉ូតូ ក្រុមការងារបច្ចេកទេស ការមើលសៀវភៅផែនទីបង្ហាញផ្លូវ ជាលក្ខណៈស្តង់ដាប្រកួតកម្រឹតអន្តរជាតិក៏ដោយ មិនជាឧបសគ្គទេ ពីព្រោះលោកមានពិសោធន៍យ៉ាងក្រាស់ក្រែលទាំងការប្រកួតកម្រិតជាតិ និងអន្តរជាតិ រហូតក្លាយជើងឯកនៅក្នុងប្រទេស និងក្រៅប្រទេសជាដើម ជាពិសេសកាលពីឆ្នាំ២០១៨ លោកជាជើងឯក ។

កីឡាករ គួន ផាន់តារា បន្តថា ទោះមានជោគជ័យច្រើនពីការប្រណាំងក្នុងស្រុកក៏ដោយ ក៏លោកនៅតែមានក្តីបារម្មណ៍ និងមិនធ្វេសប្រហែសដែរ ចំពោះកីឡាករមួយួចំនួន ដែលធ្លាប់ប្រណាំងជាមួយ ដូចជា កីឡាករជនជាតិអង់គ្លេស និងកីឡាករខ្មែរ សិតសឹងតែមានបច្ចេកទេសខ្ពស់ និងបទពិសោធន៍ការប្រណាំងច្រើន ។ គួររំលឹកថា អ្នកប្រណាំង គួន ផាន់តារា គឺជាកីឡាករមួយរូប ធ្លាប់ប្រឡូកក្នុងវិស័យប្រណាំងម៉ូតូ កម្រិតជាតិ និងអន្តរជាតិ មិនក្រោម២០លើកនោះទេ ចាប់តាំងពីឆ្នាំ២០០៦មក ជាពិសេសធ្លាប់គ្រងជើងឯក និងជើងឯករងជាច្រើនផងដែរ ។

សូមបញ្ជាក់ថា ព្រឹត្តការណ៍ប្រណាំងយានយន្តឆ្លងកាត់ឧបសគ្គក្នុងដែនជម្រកសត្វព្រៃ «ព្រៃឡង់» នេះ ធ្វើឡើងក្រោមប្រធានបទ «រួមគ្នាថែរក្សាបរិស្ថាន និងធនធានធម្មជាតិ» ដោយចេញដំណើរចាប់ពីថ្ងៃទី១៧ ខែឧសភា និងបញ្ចប់វិញនៅថ្ងៃទី២០ ខែឧសភា ឆ្នាំ២០១៩ ឆ្លងកាត់ខេត្តចំនួន៤ រួមមាន៖ ខេត្តកំពង់ធំ ខេត្តព្រះវិហារ និងខេត្តសៀមរាប លើចំងាយផ្លូវសរុបប្រមាណជាង ៦២៤គីឡូម៉ែត្រ ពិសេសគឺនឹងឆ្លងកាត់តំបន់ការពារដែនជម្រកសត្វព្រៃ «ព្រៃឡង់» ដោយមាន ក្រុមម៉ូតូប្រណាំងចំនួន ២០គ្រឿង ក្រុមរថយន្ត ចំនួន២១គ្រឿង ក្នុងនោះមានរថយន្តប្រណាំងរបស់ក្រុមកីឡាករជាតិចំនួន ១៥គ្រឿង រថយន្តប្រណាំងរបស់ក្រុមកីឡាករអន្តរជាតិចំនួន ៤គ្រឿង និងរថយន្តជំនួយគ្រឿងបម្លាស់ចំនួន ២គ្រឿង ៕ធ.ដ