(បន្ទាយមានជ័យ)៖ មន្រ្តីចូលកាន់មុខតំណែងអភិបាលរងក្រុងប៉ោយប៉ែតថ្មី ត្រូវពង្រឹងការងារផ្តល់សេវាសាធារណៈជូនពលរដ្ឋឲ្យបានប្រសើរ ។ ការតែង​តាំងមន្រ្តីរាជការ គឺជាដំណើរការប្រក្រតី សម្រាប់ដំណើរការគ្រប់គ្រងបុគ្គលិក​បំពេញការងារប្រចាំថ្ងៃ ដោយអនុលោមតាមច្បាប់ និងលិខិតបទដ្ឋានគតិយុត្តិជា​ធរមាន ក្នុងគោលបំណងលើកកម្ពស់ប្រសិទ្ធភាព និងប្រសិទ្ធផលនៃការគ្រប់គ្រង។

នេះជាប្រសាសន៍ណែនាំរបស់ ឯកឧត្តម អ៊ុ រាត្រី អភិបាលខេត្តបន្ទាយមានជ័យ ក្នុងពិធីប្រកាសចូលកាន់មុខតំណែង លោក វឺ ថងរ័ក្ស ជាអភិបាលរងក្រុងប៉ោយ​ប៉ែតថ្មីជំនួស លោក ហឿន វីរៈ ដែលត្រូវបានផ្លាស់ប្តូរមុខតំណែង ពីអភិបាលរងក្រុង​ប៉ោយប៉ែត ទៅកាន់តំណែងជា អភិបាលស្រុកព្រះនេត្រព្រះ នាថ្ងៃទី០៨ ខែកក្កដា ឆ្នាំ២០២៥។

លោក វឺ ថងរ័ក្ស អភិបាលរងក្រុងប៉ោយប៉ែតថ្មី បានប្តេជ្ញាចិត្ត ៧ចំណុចសំខាន់ៗ ជាពិសេស​ប្តេជ្ញាអនុវត្តការងារ តាមឋានានុក្រម ពង្រឹងសាមគ្គីភាពផ្ទៃក្នុង ឱ្យបានល្អ​ប្រសើរ សាមគ្គីភាព ឯកភាពជាមួយគ្រប់ អង្គភាពពាក់ព័ន្ធ ដើម្បីសម្រេចបាននូវគ្រប់​ភារកិច្ច ដែលថ្នាក់ដឹកនាំប្រគល់ជូន និងប្តេជ្ញារគោរពយ៉ាងខ្ជាប់ខ្ជួន នូវអភិក្រមទាំង៥ របស់មន្ត្រី “ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ” ដើម្បីលត់ដំខ្លួន ឱ្យសក្តិសមជាមន្ត្រី ទទួលការជឿជាក់ពីប្រជាពលរដ្ឋ។

ឯកឧត្ដម អ៊ុ រាត្រី អភិបាលខេត្ត លើកឡើងថា ការគ្រប់គ្រងមន្រ្តីរាជការនៅរដ្ឋបាល​ថ្នាក់ក្រោមជាតិ គឺត្រូវបានរាជរដ្ឋាភិបាលធ្វើប្រតិភូកម្មអំណាច មកឱ្យគណៈអភិបាល​រាជធានី ខេត្ត ក្រុង ស្រុក តាមរយៈអនុក្រឹត្យលេខ២៤០ អនក្រ.បក ឆ្នាំ២០១៧ ដើម្បីលើកកម្ពស់ប្រសិទ្ធភាពការបំពេញការងាររបស់មន្រ្តីរាជការនៅរដ្ឋបាលថ្នាក់ក្រោមជាតិ។ ដែលកិច្ចការនេះ រដ្ឋបាលខេត្ត តែងតែបានយកចិត្តទុកដាក់អនុវត្តយ៉ាង​សុក្រឹត្យ ដោយអនុលោមតាមបទដ្ឋានគតិយុត្តជាធរមានពោលគឺ ករណីតែងតាំង​គឺត្រូវ​ផ្អែកលើគោលការណ៍មុខតំណែងដែលនៅទំនេរដែលត្រូវបំពេញ។

ឯកឧត្ដម អភិបាលខេត្ត ក៏បានណែនាំដល់អភិបាលក្រុង-ស្រុក ត្រូវយកចិត្តទុក​ដាក់​ពង្រឹងប្រសិទ្ធភាពការផ្តល់សេវាជូនប្រជាពលរដ្ឋប្រកបដោយគណនេយ្យភាព តម្លា​ភាព និងភាពរហ័សទាន់ចិត្ត ជាពិសេសសេវាតម្រូវការ និងសេវាសំណូមពររបស់​ប្រជាពលរដ្ឋ, ពង្រឹងសន្តិសុខសណ្តាប់ធ្នាប់សាធារណៈ ទប់ស្កាត់បញ្ហាក្មេងទំនើង បញ្ហាគ្រឿងញៀន បញ្ហាល្បែងស៊ីសងខុសច្បាប់ បញ្ហាគ្រោះថ្នាក់ចរាចរ ជាពិសេស ត្រូវខិតខំអនុវត្តនូវគោលនយោបាយ ” ភូមិ ឃុំ សង្កាត់មានសុវត្ថិភាព” ឱ្យទទួលបាន​លទ្ធផលល្អប្រសើរថែមទៀត៕

ដោយ ៖ ឃិន គន្ធា