ឯកឧត្តមឧបនាយករដ្ឋមន្ត្រី សាយ សំអាល់ ៖ ការផ្ដោតលើការវិនិយោគហេដ្ឋារចនាសម្ព័ន្ធ ជាយុទ្ធសាស្រ្តទាក់ទាញភ្ញៀវទេសចរណ៍ លើកកម្ពស់ជីវភាពសហគមន៍
(កំពត)៖ ការផ្ដោតលើការវិនិយោគហេដ្ឋារចនាសម្ព័ន្ធ ដែលសហគមន៍មិនមានលទ្ធភាពធ្វើដោយខ្លួនឯង ដូច្នេះ នេះគឺជាយុទ្ធសាស្ត្រដែលរដ្ឋវិនិយោគក្នុងការទាក់ទាញភ្ញៀវទេសចរណ៍ឲ្យទៅសហគមន៍ ដើម្បីឲ្យសហគមន៍មានជីវិតដោយខ្លួនឯង គឺធ្វើយ៉ាងណាឱ្យសហគមន៍មានការងារធ្វើ មានប្រាក់ចំណូល ។
នេះជាប្រសាសន៍លើកឡើងរបស់ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត ក្នុងកិច្ចប្រជុំអន្តរក្រសួងពិភាក្សាស្តីពីលទ្ធផល នៃការកសាងហេដ្ឋារចនាសម្ព័ន្ធគាំទ្រសេវាទេសចរណ៍និងនេសាទ ជីវភាពរស់នៅរបស់សហគមន៍ត្រពាំងសង្កែ ដោយមានការចូលរួមពីថ្នាក់ដឹកនាំក្រសួងអភិវឌ្ឍន៍ជនបទ ក្រសួងទេសចរណ៍ អាជ្ញាធរខេត្តកំពត កែប និងព្រះសីហនុ រួមនឹងពលរដ្ឋសហគមន៍ត្រពាំងសង្កែ នាថ្ងៃអាទិត្យ ទី១៣ ខែកក្កដា ឆ្នាំ២០២៥ ។
ឯកឧត្តមឧបនាយករដ្ឋមន្ត្រី សាយ សំអាល់ មានប្រសាសន៍បន្ថែមថា ក្រសួងរៀបចំដែនដី បានផ្តួចផ្តើម និងជ្រើសយកសហគមន៍ត្រពាំងសង្កែជាសហគមន៍គំរូក្នុងការរៀបចំក្រុង ដោយធ្វើការរៀបចំកសាងហេដ្ឋារចនាសម្ព័ន្ធគាំទ្រដល់សេវាទេសចរណ៍ និងនេសាទ ឱ្យមានផាសុកភាព សោភណ្ឌភាព និងស្របតាមយុទ្ធសាស្ត្ររបស់គណកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា មុននឹងឈានទៅរៀបចំសហគមន៍ទាំងអស់នៅតំបន់ឆ្នេរ និងសហគមន៍ដទៃទៀតនៅកម្ពុជា ដើម្បីលើកស្ទួយជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង ។ ជាលទ្ធផលក្រោយការចាប់ផ្តើមរៀបចំនេះ សហគមន៍ត្រពាំងសង្កែបានប្រែមុខមាត់ និងទាក់ទាញភ្ញៀវទេសចរមកកំសាន្តប្រមាណមួយពាន់នាក់ក្នុងមួយសប្តាហ៍ ដែលបានជួយលើកស្ទួយជីវភាពពលរដ្ឋ និងសហគមន៍បានប្រសើរឡើងមួយកម្រិតធំ ។
ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា ផ្តើមចេញពីគំរោងដំបូងតូចមួយនៅទីនេះ យើងបានកសាងហេដ្ឋារចនាសម្ព័ន្ធគាំទ្រសេវាទេសចរណ៍ និងនេសាទ សម្រាប់សហគមន៍ត្រពាំងសង្កែ ស្រុកទឹកឈូ ក្នុងនោះបានកសាងផ្លូវបេតុង, ចំណតរថយន្ត និងបន្ទប់ទឹក ដោយបច្ចុប្បន្ន យើងឃើញថាគម្រោងនេះបានដំណើរការយ៉ាងល្អ និងអាចក្លាយជាគំរូមួយសម្រាប់សហគមន៍ដទៃទៀត ។ ដោយទទួលបានជោគជ័យ លើគម្រោងសម្រាប់សហគមន៍នេសាទត្រពាំងសង្កែនេះហើយនោះ ឯកឧត្តមឧបនាយករដ្ឋមន្ត្រី ក៏បានបន្តស្នើសុំកិច្ចសហការពីក្រសួងអភិវឌ្ឍន៍ជនបទ ក្រសួងទេសចរណ៍ និងរដ្ឋបាលខេត្តកំពត ដើម្បីរៀបចំគម្រោងកសាងហេដ្ឋារចនាសម្ព័ន្ធគាំទ្រសម្រាប់សហគមន៍ដទៃជាច្រើនទៀតក្នុងខេត្តនេះផងដែរ ។
ផ្ដើមចេញពីនេះ ឯកឧត្តមឧបនាយករដ្ឋមន្ត្រី សាយ សំអាល់ មានបំណងចង់ស្នើសុំក្រសួងសេដ្ឋកិច្ច និងហិរញ្ញវត្ថុ ដើម្បីកែប្រែគម្រោងLASED ដោយកាលពីមុនគម្រោងនេះសំដៅត្រឹមតែចែកដីដល់ប្រជាពលរដ្ឋខ្មែរដែលមិនមានដីប៉ុណ្ណោះ ប៉ុន្តែពេលនេះ ឯកឧត្តមស្នើសុំឲ្យមានការកែប្រែមួយផ្នែកនៃគម្រោងLASEDនេះ មកវិនិយោគលើហេដ្ឋារចនាសម្ព័ន្ធដូចជាផ្លូវ, ចំណតរថយន្ត, បន្ទប់ទឹកនៅតាមបណ្ដាសហគមន៍ និងទីស្នាក់ការសហគមន៍ មានន័យថា យើងមិនមែនផ្ដោតត្រឹមតែការចែកដីប៉ុណ្ណោះទេ ប៉ុន្តែថែមទាំងផ្ដោតលើការវិនិយោគហេដ្ឋារចនាសម្ព័ន្ធ ដែលសហគមន៍មិនមានលទ្ធភាពធ្វើដោយខ្លួនឯង ដូច្នេះ នេះគឺជាយុទ្ធសាស្ត្រដែលរដ្ឋវិនិយោគឲ្យទៅសហគមន៍ ដើម្បីឲ្យសហគមន៍មានជីវិតដោយខ្លួនឯង គឺធ្វើយ៉ាងណាឱ្យសហគមន៍មានការងារធ្វើមានប្រាក់ចំណូល ។
ឯកឧត្តមឧបនាយករដ្ឋមន្ត្រី បានគូសបញ្ជាក់បន្ថែមថា អ្វីដែលយើងខិតខំប្រឹងប្រែងធ្វើទាំងអស់នេះ គឺដើម្បីឲ្យជីវភាពរបស់ប្រជាពលរដ្ឋក្នុងសហគមន៍មានភាពរីកចម្រើន, ហើយបំណុលឯកជនរបស់ប្រជាពលរដ្ឋក្នុងសហគមន៍នីមួយៗ ក៏ត្រូវបានធ្លាក់ចុះជាបន្តបន្ទាប់ផងដែរ ។
ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត បានគូសបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ បានប្រែក្លាយគម្រោងបែងចែកដីសម្បទានសង្គមកិច្ច មកជាគម្រោងសម្បទានដើម្បីសង្គម និងសេដ្ឋកិច្ច ៕
ដោយ / គ្រី សម្បត្តិ
