មន្ត្រីពាណិជ្ជកម្មជំរុញម្ចាស់សហគ្រាស សិប្បកម្មទាំងអស់ក្នុងខេត្តតាកែវបង្កើនផលិតផលមានគុណភាព ខណៈកំពុងមានឱកាស
តាកែវ៖ លោក ឈាវ ផា អគ្គនាយករងពាណិជ្ជកម្មក្នុងប្រទេសនៃក្រសួងពាណិជ្ជកម្មបានជំរុញនិងលើកទឹកចិត្តដល់បណ្ដាសហគ្រាស សិប្បកម្មធុនតូចនិងមធ្យមទាំងអស់នៅក្នុងខេត្តតាកែវឱ្យពង្រឹងសមត្ថភាព និងបង្កើនការផលិតផលិតផលដែលមានគុណភាពឱ្យបានកាន់តែច្រើនថែមទៀត ខណៈទីផ្សារបច្ចុប្បន្នកំពុងមានតម្រូវការកើនឡើង។
លោក ឈាវ ផា បានថ្លែងក្នុងឱកាសដូច្នេះក្នុងឱកាសអញ្ជើញចូលរួមក្នុងសិក្ខាសាលាស្ដីពីផលិតភាព និងពាណិជ្ជកម្មតាមរយៈការបង្កើតតំណភ្ជាប់ឆ្ពោះទៅកាន់ប្រភពផលិតកម្ម និងអ្នកប្រើប្រាស់ ដែលបានរៀបចំឡើងកាលពីចុងសប្ដាហ៍កន្លងទៅនេះនៅ មន្ទីរពាណិជ្ជកម្មខេត្តតាកែវ។
លោកអគ្គនាយករងពាណិជ្ជកម្មក្នុងប្រទេសបានបន្តថា ដោយសារតែការបិទព្រំដែន និងឈប់នាំចូលទំនិញពីប្រទេសថៃបានធ្វើឱ្យប្រជាពលរដ្ឋខ្មែរងាកមកប្រើប្រាស់ផលិតផលក្នុងស្រុកវិញជាហេតុនាំឱ្យតម្រូវការទំនិញនៅក្នុងស្រុកមានការកើនឡើង ។លោកបន្ថែមថា ដូច្នេះវាជាឱកាសមួយដល់បងប្អូន ផលិតករក្នុងស្រុកទាំងអស់ ត្រូវបង្កើនការផលិត កែច្នៃផលិតផលរបស់ខ្លួនបន្ថែមទៀត ក្នុងនោះក៏គិតពីគុណភាព ស្តង់ដានិងបច្ចេកទេសឱ្យបានត្រឹមត្រូវ ដើម្បីធានាបាននៅគុណភាព សុវត្ថិភាព និងអនាម័យដល់អ្នកប្រើប្រាស់។
មានវត្តមានក្នុងឱកាសនេះដែរលោក យ៉ង់ សុវឌ្ឍនា អភិបាលរងខេត្តតាកែវបានថ្លែងថា សិក្ខាសាលានាពេលនេះពិតជាមានសារៈសំខាន់ដល់គ្រប់តួអង្គពាក់ព័ន្ធក្នុងវិស័យកែច្នៃផលិតផល ផ្សេង ៗ ដើម្បីស្វែងយល់ និងទទួលបានចំណេះដឹងនិងជំនាញថ្មីៗបន្ថែមទៀត និងឈានដល់ការផលិតឱ្យត្រូវនឹងតម្រូវការអ្នកប្រើប្រាស់ក្នុងខេត្ត និងអាចឈានដល់ការនាំចេញទៅក្រៅប្រទេសផងដែរ៕
ដោយ៖សាំង សារ៉ាវី
