កុមារកំព្រា និងចាស់ឥតទីពឹងនៃអង្គការសង្គ្រោះជនអស់សង្ឃឹម ទទួលបានការឧបត្ថម្ភពីកាកបាទក្រហមកម្ពុជាជាលើកទី២៥
ភ្នំពេញ៖ជាមួយនឹងអំណោយជាស្បៀងអាហារ សម្ភារៈ និងថវិកា, បុគ្គលិក កុមារកំព្រា ចាស់ឥតទីពឹងចំនួន៣២៨នាក់ ដែលរស់នៅក្រោមដំបូលនៃអង្គការសង្គ្រោះជនអស់សង្ឃឹមបានទទួលទានអាហារសាមគ្គីដ៏មានឱជារសមួយពេលដែលរៀបចំឡើងដោយកាកបាទក្រហមកម្ពុជា។
កាលពីថ្ងៃទី១៥ ខែកក្កដា ឆ្នាំ២០២៥សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ និងសហការីចុះមកសួរសុខទុក្ខ ដោយភ្ជាប់មកជាមួយនូវអំណោយសម្រាប់ឧបត្ថម្ភដល់អង្គការសង្គ្រោះជនអស់សង្ឃឹម ស្ថិតនៅភូមិលិចវត្ត សង្កាត់កំបូល ខណ្ឌកំបូល រាជធានីភ្នំពេញ ដែលជាការផ្តល់ជូនជាលើកទី២៥ ។
ក្រោមស្នូរទះដៃ និងស្នាមញញឹមពព្រាយរបស់កុមារា កុមារី ប្រកបដោយសម្លៀកបំពាក់ស្អាតបាតស្វាគមន៍វត្តមានលោកជំទាវ ម៉ែន នារីសោភ័គ អគ្គលេខាធិការរងទី១នៃកាកបាទក្រហមកម្ពុជា , លោកស្រី ម៉ារី អិន ទីប្រឹក្សាអង្គការសង្គ្រោះជនអស់សង្ឃឹមបានជម្រាបលោកជំទាវអគ្គលេខាធិការរងទី១ថា ក្មេងៗដែលយើងគ្នាបានឃើញពួកគេស្លៀកពាក់ស្អាតៗ រាំល្វតល្វន់ ញញឹមស្រស់នៅទីនេះ អតីតកាលរបស់ពួកគេ គឺពិបាក និងកម្សត់។ កុមារខ្លះជាទារកទើបនឹងកើតត្រូវគេយកមកបោះបង់ចោល ,ខ្លះឪពុកសម្លាប់ម្ដាយទុកឱ្យកូននៅកំព្រា, ខ្លះទៀតម្ដាយជួបបញ្ហាច្រើន កូននៅតូចគ្មានទីពឹង,ខ្លះទៀតគ្រួសារគ្មានលទ្ធភាពចិញ្ចឹម ,ខ្លះម្ដាយស្លាប់ចោល ,ខ្លះម្ដាយឪពុកញៀនគ្រឿងញៀនយកកូនមកទុកចោលជាដើម ។
លោកស្រីបានបន្ថែមដោយពេញចិត្តថា “ខ្ញុំមានការសប្បាយចិត្ដ។ក្នុងនាមខ្លួនខ្ញុំផ្ទាល់មិនមែនជាអ្នកដើមកំណើតជាខ្មែរមែនពិត តែបានមករស់នៅស្រុកខ្មែរ,ខ្ញុំមានអារម្មណ៍ស្រស់ស្រាយ សុខសប្បាយ ពិសេសមានសេរីភាពពេញលេញក្នុងការរស់នៅ និងសុខដុមនីយកម្មសាសនា ។ដោយមិនមានប្រកាន់ពូជសាសន៍ សាសនា”។
ជាមួយនឹងការលើកឡើងខាងលើ លោកស្រី បានថ្លែងអំណរគុណដល់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន កាកបាទក្រហមកម្ពុជាដែលតែងតែគិតគូរជាប់ជានិច្ច និងចាត់តំណាងនាំយកនូវស្បៀងឧបភោគ-បរិភោគ សម្ភារៈ និងថវិកាមួយចំនួន មកប្រគល់ជូនដល់អង្គការដោយផ្ទាល់ជាបន្តបន្ទាប់ ដែលនេះគឺជាការជួយមួយដ៏ធំធេងមិនអាចកាត់ថ្លៃបាន។
ក្នុងនាមកាកបាទក្រហមកម្ពុជាដែលមានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ គង់ប្រថាប់ជាម្លប់ដ៏ឧត្តុង្គឧត្តមជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន, លោកជំទាវអគ្គលេខាធិការរងទី១ បានថ្លែងអំណរគុណនិងកោតសរសើរ ដល់បុគ្គលិក លោកគ្រូអ្នកគ្រូថែទាំកុមារទាំងអស់ ដែលបានយកចិត្តទុកដាក់យ៉ាងល្អប្រសើរក្នុងការជួយចិញ្ចឹមបីបាច់ ថែទាំដល់កុមារ និងអ្នកនៅទីនេះទាំងអស់បានយ៉ាងល្អ។លោកជំទាវបន្ថែមថា ទាំងនេះបានឆ្លុះបញ្ចាំងឱ្យឃើញថាអង្គការបានចូលរួមសម្រាលបន្ទុករាជរដ្ឋាភិបាល និងចូលរួមកសាងអភិវឌ្ឍធនធានមនុស្សក្នុងសង្គមជាតិកម្ពុជា ។
ដោយកត់សម្គាល់ចំពោះបរិយាកាសកន្លែងរស់នៅរបស់កុមារា កុមារីទាំងនេះ លោកជំទាវបញ្ជាក់ថា កន្លែងស្នាក់មានបរិស្ថានស្អាត ខ្យល់អាកាសល្អ និងមានកន្លែងលេងកីឡាផ្សេងៗទៀត។ដូច្នេះអ្វីដែលក្មួយៗចៅៗទាំងអស់ត្រូវយកចិត្តទុកដាក់ថែទាំសុខភាពខ្លូនឯងឱ្យបានល្អនោះគឺត្រូវមានអនាម័យជានិច្ចក្នុងការរស់នៅដើម្បីបង្ការជំងឺដង្កាត់ផ្សេងៗ។ ចំណែកការបរិភោគប្រចាំថ្ងៃគឺកុំផ្អែមពេក កុំប្រៃពេក និងកុំខ្លាញ់ពេក ពោលគឺ “ស្រឡាញ់ខ្លួន ស្ងួនចំណី” ដើម្បីជៀសផុតពីជំងឺមិនឆ្លងនានា។ត្រូវរស់នៅប្រកបដោយសីលធម៌ គុណធម៌ និងត្រូវខិតខំរៀនសូត្រ ដើម្បីធ្វើជាពលរដ្ឋល្អ សិស្សល្អ កូនល្អ ។ត្រូវចៀសឆ្ងាយពីគ្រឿងញៀន ដើម្បីជាធនធានដ៏ល្អសម្រាប់ជាតិ ដែលមានទាំងចំណេះដឹង និងសុខភាពល្អ ។
គប្បីជម្រាបជូនថា កាកបាទក្រហមកម្ពុជា បានផ្តល់អំណោយជូនអង្គការសង្គ្រោះជនអស់សង្ឃឹម ចាប់តាំងពីឆ្នាំ២០១៣រហូតមក។ពេលនេះគឺជាលើកទី២៥ហើយ។អំណោយដែលផ្តល់រួមមាន៖ អង្ករ ៣តោន,មី ២០កេស , ត្រីខ ៥កេសធំ,ទឹកស៊ីអ៊ីវ ១០យួរ, ទឹកត្រី១០យួរ, ប្រេងឆា ២កេស, ស្ករស២៥គីឡូក្រាម,ទឹកក្រូច២០កេស, ទឹកបរិសុទ្ធ ២០កេស,សាប៊ូកក់សក់(ក្លិន)៧កេស, ឃីត(សារុង មុង ភួយ ក្រមា)ចំនួន៥០ឃីត និងថវិកា២០លានរៀល ព្រមទាំងអាហារមួយពេលយ៉ាងឆ្ងាញ់ពិសាទៀតផង៕
ដោយ៖ គ្រី សម្បត្តិ
