សម្ដេចតេជោ ហ៊ុន សែន ស្វាគមន៍ប្រធានរដ្ឋសភាទីម័រឡេស្តេ នៅវិមានព្រឹទ្ធសភា
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានទទួលស្វាគមន៍ លោកជំទាវ Maria Fernanda Lay ប្រធានរដ្ឋសភានៃសាធារណរដ្ឋប្រជាធិបតេយ្យទីម័រឡេស្តេ ចូលជួបសម្តែងការ គួរសម នៅវិមានព្រឹទ្ធសភា រាជធានីភ្នំពេញ នារសៀលថ្ងៃទី១៦ ខែកក្កដា ឆ្នាំ២០២៥ ។
ក្នុងឱកាសនៃជំនួបសម្ដេចតេជោ ហ៊ុន សែន បានសម្តែងនូវក្តីរីករាយដែលបានជួបលោកជំទាវ ជាថ្មីម្តងទៀត បន្ទាប់ពីជំនួបនាឱកាសទស្សនកិច្ចផ្លូវការរបស់សម្តេច នៅទីម័រឡេស្តេ កាលពីខែឧសភាកន្លងទៅ ។ជាមួយគ្នានេះសម្ដេច ក៏រីករាយដែលអាស៊ានបានសម្រេចទទួលទីម័រឡេស្តេ ជាសមាជិកពេញសិទ្ធិនៅខែតុលា ឆ្នាំ២០២៥ ខាងមុខដែលជាការសម្រេចបាននូវគោលដៅខ្លួន។
ចំណែកលោកជំទាវប្រធានរដ្ឋសភាទីម័រឡេស្តេ បានជម្រាបសម្តេចតេជោ ហ៊ុន សែន នេះជាលើកទី១ហើយ ដែលលោកជំទាវបានមកកម្ពុជានិងបានឃើញយល់ដឹងអំពីកម្ពុជា និងទន្ទឹមគ្នានេះ ផ្លាស់ប្តូរទស្សនៈគ្នានៅក្នុងឱកាសនៃកិច្ចប្រជុំ និងជំនួបនានាជាមួយភាគីកម្ពុជា។ ដោយស្ថានភាពកម្ពុជា និងទីម័រឡេស្តេ មានភាពស្រដៀងគ្នានោះ លោកជំទាវនឹងពាំនាំបទបពិសោធន៍មេរៀនទាំងនោះទៅទីម័រឡេស្តេ។លោកជំទាវសង្ឃឹមថា ក្នុងនាមបងប្អូនអាស៊ាន កម្ពុជានឹងបន្តរួមដំណើរជាមួយគ្នា ហើយជឿជាក់ថា នៅក្នុងដំណើរនេះ ទីម័រឡេស្តេអាចប្រែក្លាយការប្រឈមនានាទៅជាកាលានុវត្តភាព។
បញ្ជាក់ជូនភ្ញៀវសម្តេចតេជោ ហ៊ុន សែន បានលើកឡើងនូវភាពជឿជាក់ចំពោះទីម័រឡេស្តេជាសមាជិកពេញសិទ្ធិរបស់អាស៊ាន។ទន្ទឹមនេះសម្តេចបានបង្ហាញពីស្ថានភាពខុសគ្នារវាងកម្ពុជា និងទីម័រឡេស្តេ ទាំងទិដ្ឋភាពសេដ្ឋកិច្ច និងសង្គម នៅពេលដែលប្រទេសទាំងពីរចូលជាសមាជិកអាស៊ានដំបូង។
ជាមួយនឹងភាពអំណត់ទន្ទឹងរង់ចាំតាំងពីឆ្នាំ២០១១ សម្តេចតេជោបានលើកបន្ថែមថា ទីម័រឡេស្តេក៏បានបោះជំហានអភិវឌ្ឍន៍ខ្លួនទៅលើផ្នែកផ្សេងៗ រួមទាំងធនធានមនុស្ស។ សម្តេចបានគូសបញ្ជាក់ឡើងវិញថា ការបញ្ចូលសមាជិកអាស៊ានថ្មី មិនមែនជាបន្ទុករបស់សមាជិកចាស់នោះទេ តែជាការរួមចំណែក ហើយវាជាការចាំបាច់ដែលយើងត្រូវការរួបរួមក្នុងតំបន់ និងធ្វើឱ្យតំបន់មានការរីកលូតលាស់។
នៅក្នុងក្របខ័ណ្ឌទ្វេភាគី សម្តេចតេជោ បានចង្អុលបង្ហាញអំពីសក្តានុពលនៃសន្តិសុខស្បៀងរបស់កម្ពុជា ខណៈដែលទីម័រឡេស្តេមានសក្តានុពលសន្តិសុខថាមពល ដែលជាកត្តាបំពេញឱ្យគ្នាទៅវិញទៅមក។ នៅក្នុងបរិបទនេះ សម្តេចសង្ឃឹមថា រដ្ឋាភិបាលនៃប្រទេសទាំងពីរ នឹងធ្វើការជាមួយគ្នាបង្កើតភាពជាដៃគូ ដើរជាមួយគ្នាក្នុងនាមជាប្រទេសអភិវឌ្ឍតិចតួច និងបន្តចែករំលែកបទពិសោធន៍គ្នាទៅវិញទៅមក។
ឆ្លៀតនៅក្នុងឱកាសនៃជំនួបនេះ សម្តេចតេជោ បានចែករំលែកអំពីមូលដ្ឋាន និងទស្សនៈវិស័យនៃការសម្រេចចិត្តរបស់សម្តេច ក្នុងការផ្ទេរអំណាចជូនថ្នាក់ដឹកនាំជំនាន់ថ្មី ដែលនោះគឺដើម្បីសន្តិភាព ស្ថិរភាពយូរអង្វែង ការអភិវឌ្ឍ និងជៀសវាងនូវការច្រំដែលនៃប្រវត្តិសាស្រ្តរបស់កម្ពុជា ដែលតែងតែមានជម្លោះនៅពេលមានការផ្លាស់ប្តូរថ្នាក់ដឹកនាំ ៕
ដោយ៖វណ្ណលុក







