រដ្ឋបាលខេត្តបន្ទាយមានជ័យ រៀបចំវេទិកាការងារស្ដីពីឱកាសការងារ ជូនពលករដែលវិលត្រឡប់មកពីប្រទេសថៃ
បន្ទាយមានជ័យ៖មជ្ឈមណ្ឌលការងារ សហការជាមួយមន្ទីរការងារ រដ្ឋបាលខេត្តបន្ទាយមានជ័យ និងអជ្ញាធរស្រុក ឃុំ និងភូមិ វិទ្យាស្ថានពហុបច្ចេកទេសខេត្តបន្ទាយមានជ័យ បានរៀបចំវេទិកាការងារស្ដីពីឱកាសការងារ និងឱកាសកម្មសិក្សាការងារនៅស្រុកព្រះនេត្រព្រះ ជូនដល់ប្រជាពលរដ្ឋជាពលករដែលវិលត្រឡប់មកពីប្រទេសថៃក្រោមវត្តមានលោក យឹម សំណាង អភិបាលរងខេត្តតំណាងឯកឧត្តម អ៊ុ រាត្រី អភិបាលខេត្តបន្ទាយមានជ័យ។
វេទិកាដែលរៀបចំឡើងនៅថ្ងៃសុក្រទី១៨ ខែកក្កដា ឆ្នាំ២០២៥ក្នុងបរិវេណសាលាស្រុកព្រះនេព្រះ មានការធ្វើបទបង្ហាញពីឱកាសការងារ អត្ថប្រយោជន៍ និងលក្ខខណ្ឌក្នុងការដាក់ពាក្យចូលបម្រើការងារ តាមក្រុមហ៊ុន រោងចក្រ សណ្ឋាគារ ធនាគារ មីក្រូហិរញ្ញវត្ថុ ជាដើម។
លោក យឹម សំណាង អភិបាលរងខេត្ត បានបញ្ជាក់ពីមូលហេតុនៃការបង្កើតវេទិកាការងារពេលនេះមានគោលបំណងចំនួន៣សំខាន់គឺ៖១. ផ្តល់ភាពងាយស្រួលដល់បងប្អូនដែលទើបត្រលប់មកពីប្រទេសជិតខាងហើយចង់ស្វែង រកការងារឱ្យបានជួបជាមួយនិយោជកផ្ទាល់ និងអាចសួរពីអត្ថប្រយោជន៍និងលក្ខខណ្ឌនៃការដាក់ពាក្យបានភ្លាមៗ។២.ផ្តល់ភាពងាយស្រួលដល់និយោជកក្នុងការផ្សព្វផ្សាយពីឱកាសការងារ និងបានជួបផ្ទាល់ជាមួយបងប្អូនដែលបានប្រមូលផ្តុំគ្នានៅទីនេះនិង៣. ផ្តល់ឱកាសឱ្យអាជ្ញាធរមូលដ្ឋានបានពង្រឹងការសហការជាមួយវិស័យឯកជនក្នុងការបម្រើសេវាសាធារណៈពាក់ព័ន្ធ នឹងវិស័យការងារជូនដល់ប្រជាពលរដ្ឋក្នុងមូលដ្ឋានរបស់ខ្លួន។
លោក យឹម សំណាង បានគូសរំលេចថា ខេត្តបន្ទាយមានជ័យបច្ចុប្បន្ន វិស័យឯកជនមានការរីកចម្រើនខ្លាំង ក្នុងនោះដូចជា រោងចក្រ សណ្ឋាគារ ធនាគារ មីក្រូហិរញ្ញវត្ថុ កាស៊ីណូ សំណង់ យានដ្ឋានជុសជុលរថយន្ត និងក្រុមហ៊ុនផ្សេងៗ ដែលជាឱកាសការងារសម្រាប់ប្រជាពលរដ្ឋដែលចង់ស្វែងរកការងារ៕
ដោយ៖ឃិន គន្ធា
