(ភ្នំពេញ)៖ រដ្ឋមន្ត្រីក្រសួងការបរទេសកម្ពុជា បានកោតសរសើរ ឯកអគ្គរដ្ឋទូតបារាំង ដែលបានបំពេញបេសកកម្មប្រកបដោយការតាំងចិត្តខ្ពស់ និងមានប្រសិទ្ធភាព ក្នុងការរួមចំណែកយ៉ាងសកម្មក្នុងការលើកកម្ពស់ និងពង្រឹងចំណងមិត្តភាពជាប្រវត្តិសាស្រ្ដ និងកិច្ចសហប្រតិបត្តិការពហុវិស័យ រវាងកម្ពុជា និងបារាំង។

ការកោតសរសើរបែបនេះ បានធ្វើឡើងខណៈដែល ឯកឧត្តមឧបនាយករដ្ឋមន្រ្តី ប្រាក់ សុខុន បានអនុញ្ញាតឲ្យ ឯកឧត្តម Jacques PELLET ឯកអគ្គរដ្ឋទូតនៃសាធារណរដ្ឋបារាំងប្រចាំនៅកម្ពុជា ចូលជួបសម្ដែងការគួរសម និងជម្រាបលា ក្នុងឱកាសដែលឯកឧត្តមឯកអគ្គរដ្ឋទូត ត្រូវចប់អាណត្តិការទូតនៅកម្ពុជា នាថ្ងៃទី១៧ កក្កដា ឆ្នាំ២០២៥ នៅទីស្តីការក្រសួង ។

ឯកឧត្តម ប្រាក់ សុខុន បានអរគុណចំពោះការរួមចំណែកដ៏សំខាន់របស់ ឯកឧត្តមឯកអគ្គរដ្ឋទូត ក្នុងការពង្រឹងទំនាក់ទំនងទ្វេភាគីរវាងកម្ពុជា បារាំង និងបានវាយតម្លៃខ្ពស់ចំពោះការប្តេជ្ញាចិត្តរបស់ ឯកឧត្តមឯកអគ្គរដ្ឋទូត ក្នុងការលើកកម្ពស់កិច្ចសហប្រតិបត្តិការនៅក្នុងវិស័យនានា ជាពិសេសវិស័យអបរំ វប្បធម៌ និងការអភិវឌ្ឍន៍ ។

ដោយទទួលស្គាល់នូវកិច្ចខិតខំប្រឹងប្រែងលើកិច្ចការទាំងនោះហើយ រាជរដ្ឋាភិបាលកម្ពុជា បានប្រគល់គ្រឿងឥស្សរិយយស«សហមេត្រីថ្នាក់មហាសេរីវឌ្ឍន៍» ដែលជាគ្រឿងឥស្សរិយយសកម្រិតខ្ពស់បំផុតមួយរបស់ព្រះរាជាណាចក្រកម្ពុជា ជូន ឯកឧត្តម Jacques PELLET ។

ឯកឧត្តម ប្រាក់ សុខុន បានថ្លែងទទួលស្គាល់ចំពោះតួនាទីគន្លឹះរស់ ឯកឧត្តម Pellet ក្នុងការសម្របសម្រួលការផ្លាស់ប្តូរទស្សនកិច្ចកម្រិតខ្ពស់ជាច្រើនក្នុងអាណត្តិរបស់ឯកឧត្តម ដែលបានសម្គាល់ពីវឌ្ឍនភាពឆ្ពោះទៅរកការបង្កើតភាពជាដៃគូយុទ្ធសាស្ត្ររវាងកម្ពុជា និងបារាំង ជាមួយគោលដៅរួម ក្នុងការសម្រេចឲ្យបានគោលបំណងនេះ នៅឆ្នាំ២០២៦ ។

ឯកឧត្តមឯកអគ្គរដ្ឋទូតបារាំង បានបញ្ជាក់ជាថ្មីនូការប្តេជ្ញាចិត្តរបស់បាំរាំង ក្នុងការបន្តពង្រឹងកិច្ចសហប្រតិបត្តិការជាមួយកម្ពុជា លើវិស័យនានា និង បានបញ្ជាក់ពីការគាំទ្ររបស់ប្រទេសបារាំងចំពោះការធ្វើជាម្ចាស់ផ្ទះរបស់កម្ពុជាក្នុងការរៀបចំកិច្ចប្រជុំកំពូលហ្វ្រង់កូហ្វូនី លើកទី២០ ៕

អត្ថបទ ៖ គង់ សុផុល
រូបភាព ៖ សួង ពិសិដ្ឋ