ភ្នំពេញ៖មន្រ្តីយោធាជាន់ខ្ពស់នៃប្រទេសហ្វីលីពីនបានបញ្ជាក់ពីការ​បន្តផ្ដល់​អាទិភាពខ្ពស់ចំពោះកិច្ច​សហ​ប្រតិបត្តិ​ការលើការបណ្ដុះបណ្ដាលធនធានមនុស្ស និងបន្តចែករំលែកបទពិសោធន៍ និងការបណ្ដុះបណ្ដាលជំនាញ​ដល់កងទ័ព​ជើងគោកកម្ពុជា ។លើសពីនេះឯកឧត្តមប្រធានាធិបតីហ្វីលីពីនក៏មាន​គម្រោង​អញ្ជើញមកទស្សនកិច្ចផ្លូវរដ្ឋនៅកម្ពុជានាពេលខាងមុខនេះផងដែរ។

កាលពីរសៀលថ្ងៃទី១៨ ខែកក្កដា ឆ្នាំ២០២៥​សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ​ព្រះរាជា​ណាចក្រកម្ពុជា បានអនុញ្ញាតឱ្យ ឯកឧត្តម ឧត្តម​សេនីយ៍​ឯក Roy M. Galido មេបញ្ជាការកងទ័ពជើងគោក នៃ​សាធារណរដ្ឋហ្វីលីពីន ចូលជួបសម្តែងការគួរសម និងពិភាក្សាការងារ នៅវិមានសន្ដិភាព។

ក្នុងឱកាសនេះឯកឧត្តមឧត្តមសេនីយ៍ឯកមេបញ្ជាការកងទ័ពជើងគោកហ្វីលីពីន បានជម្រាបសម្ដេចធិបតី​នាយក​រដ្ឋមន្រ្តី​ ដោយសម្ដែងនូវការពេញចិត្តចំពោះ​ការរីកចម្រើននៃទំនាក់ទំនងទ្វេភាគី ហ្វីលីពីន-កម្ពុជា ជាពិសេស កិច្ច​សហ​ប្រតិបត្តិការដ៏ល្អប្រសើររវាងកងទ័ពជើងគោកនៃប្រទេសទាំងពីរ ដែលត្រូវបាន​កសាងឡើងលើមូលដ្ឋាននៃ​មិត្តភាព និងការជឿទុកចិត្តគ្នាទៅវិញទៅមក។

ឯកឧត្តមបានគូសបញ្ជាក់ទៀតថា ហ្វីលីពីនបន្តផ្ដល់អាទិភាពខ្ពស់ចំពោះ​កិច្ចសហប្រតិបត្តិការលើការបណ្ដុះ​បណ្ដាលធនធានមនុស្ស ។ការបន្ត​ចែករំលែក​បទពិសោធន៍ ។ការបណ្ដុះបណ្ដាលជំនាញដល់​កងទ័ពជើង​គោកកម្ពុជា និង​បន្តរៀនសូត្រពីបទពិសោធន៍ពីកម្ពុជាវិញផងដែរ។

ជាការឆ្លើយតប, សម្ដេចបវរធិបតី បានសម្ដែងនូវក្ដីសោមនស្ស ដែលជួបជាមួយ ឯកឧត្តម ឧត្តមសេនីយ៍ឯក ជាថ្មីម្ដងទៀត និងបានផ្ដាំផ្ញើការរសួរសុខទុក្ខជូនចំពោះ ឯកឧត្តមប្រធានាធិបតី ហ្វេឌីណាន់ ម៉ាកូស ចេ អ(Ferdinand R. Marcos Jr.) និងរង់ចាំស្វាគមន៍ដំណើរទស្សនកិច្ចផ្លូវរដ្ឋរបស់ឯកឧត្តមប្រធានាធិបតី មក​កាន់កម្ពុជា នាពេលខាងមុខ។

សម្តេចធិបតីបានវាយតម្លៃខ្ពស់ចំពោះភាពរីកចម្រើនប្រកបដោយផ្លែផ្កានៃទំនាក់ទំនង និងកិច្ចសហប្រតិបត្តិការ​រវាងកង​ទ័ពជើងគោក នៃប្រទេសទាំងពីរ។ ជាក់ស្ដែង​ការ​បិទបញ្ចប់វគ្គហ្វឹកហ្វឺនថ្មីៗនេះ គឺជាសក្ខីភាពមួយនៃ​ទំនាក់ទំនង និងកិច្ចសហ​ប្រតិបត្តិ​ការដ៏ល្អប្រសើរនៃកងទ័ពជើងគោកប្រទេសទាំងពីរ។សម្តេចសង្ឃឹមថា តាមរយៈ​កិច្ចសហ​ប្រតិ​បត្តិការ ដ៏ល្អនេះ កងទ័ពនៃប្រទេសទាំងពីរ អាចពិនិត្យលទ្ធភាព​ពង្រីក​កិច្ចសហប្រតិបត្តិការ រវាង​កងទ័ពជើងទឹក និងកងទ័ពអាកាសនៃ​ប្រទេស​ទាំងពីរផង​ដែរ។

ពាក់ព័ន្ធនឹងកិច្ចសហប្រតិបត្តិការលើវិស័យការពារជាតិ , សម្ដេចបវរធិបតីក៏បានសង្កត់​ធ្ងន់​ពីសារៈសំខាន់​នៃការ​បណ្ដុះបណ្ដាលធនធានមនុស្ស ជាពិសេសការលើក​កម្ពស់​សមត្ថភាពកងទ័ព ដើម្បីរួមគ្នាប្រយុទ្ធប្រឆាំងនឹង​ឧក្រិដ្ឋ​កម្ម​ឆ្លងដែន និងឧក្រិដ្ឋកម្ម​អ៊ីនធឺណិត ដែលកំពុងបន្តគំរាមកំហែងដល់សេដ្ឋកិច្ច និងសន្តិសុខ ក្នុងតំបន់និង​សកលលោក។

សម្ដេចធិបតីនាយករដ្ឋមន្រ្តីបានលើកទឹកចិត្តឱ្យកងទ័ពជើងគោកនៃប្រទេសទាំងពីរ បន្តសហការគ្នាឱ្យ​កាន់តែ​ជិតស្និទ្ធថែមទៀតដើម្បីពង្រឹង និងពង្រីកកិច្ចសហ​ប្រតិ​បត្តិការឱ្យកាន់តែរឹងមាំបន្ថែមទៀត៕
ដោយ៖វណ្ណលុក