មន្ត្រីសង្ឃនិមន្តសួរសុខទុក្ខនិងនាំយកអំណោយទៅផ្តល់ជូនកងកម្លាំងជួរមុខ
បន្ទាយមានជ័យ៖សម្តេចព្រះវនរ័តកិត្តិបណ្ឌិត មួង រ៉ា សម្តេចព្រះសង្ឃនាយកទី២គណៈមហានិកាយនៃព្រះរាជាណាចក្រកម្ពុជា ព្រះអនុប្រធាន និងជាព្រះអគ្គលេខាធិការថេរសភានៃព្រះពុទ្ធសាសនានៅព្រះរាជាណាចក្រកម្ពុជារួមជាមួយពុទ្ធបរិស័ទ កាលពីថ្ងៃទី១៧ ខែកក្កដា ឆ្នាំ២០២៥ បាននិមន្តសួរសុខទុក្ខកងកម្លាំងជួរមុខ នៅតំបន់ប្រាសាទតាមាន់ធំនិងប្រាសាទតាក្របី។
ក្នុងឱកាសនេះសម្តេចព្រះវនរ័ត កិត្តិបណ្ឌិត មួង រ៉ា បានមានថេរដិកាថា ឆ្លើយតបបាវចនា “ជាតិ សាសនា ព្រះមហាក្សត្រ” ក្នុងនាមអ្នកគង់ឬនៅជួរក្រោយជួយឧបត្ថម្ភគាំទ្រដល់កងកម្លាំងនៅជួរមុខការពារព្រំដែនទាំងអាហារ សម្ភារៈ រួមការផ្ដល់ឱ្យអ្វីៗដែលជាកម្លាំងចិត្ត ។
ព្រះតេជគណ ចាន់ សុជន ចៅអធិការវត្តខ្ចាស់ស្រុកព្រះនេតព្រះមានសង្ឃដិកាថា ក្នុងឱកាសសួរសុខទុក្ខគណៈប្រតិភូសង្ឃបាននាំយកអំណោយរបស់សម្តេចព្រះវនរ័ត កិត្តិបណ្ឌិត មួង រ៉ា រួមមាន អង្ករ ១០ តោន មី ៣០០ កេស, ទឹកក្រូច ១០០ កេស, ទឹកសុទ្ធ ១០០ កេស, ទឹកដោះគោ ៣០ កេស, ត្រីខ ៣០ កេស ទឹកត្រី ១០០ ទឹកស៊ីអ៊ីវ ១០០យួរ, ស្ករស ១០ បេ និងកាហ្វេ ១០ កេស។ជាមួយគ្នានេះមានអាវយ័ន្តតេជៈចំនួន១ ២០០អាវ ជាអំណោយផ្លូវចិត្តជូនកងកម្លាំងផងដែរ៕
ដោយ៖គៀន ច័ន្ទហ៊ីន
