ឯកឧត្តមឧបនាយករដ្ឋមន្រ្តី សាយ សំអាល់ អញ្ជើញចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋចំនួន ៧ភូមិ នៅឃុំស៊ើង និងឃុំឡាមិញ ស្រុកបរកែវ ខេត្តរតនគិរី
(រតនគិរី)៖ ឯកឧត្តមឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានជាអញ្ជើញអធិបតីចែកវិញ្ញាបនបត្រសម្គាល់ម្ចាស់អចលនវត្ថុ ជូនប្រជាពលរដ្ឋចំនួន៧ភូមិ សរុប១៦៥៧បណ្ណ ស្ថិតក្នុងឃុំស៊ើង និងឃុំឡាមិញ ស្រុកបរកែវ ខេត្តរតនគិរី នាព្រឹកថ្ងៃទី២១ ខែកក្កដា ឆ្នាំ២០២៥ ។
តាមរបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តរតនគិរី ឲ្យដឹងថា បានប្រកាសតំបន់វិនិច្ឆ័យរួចចំនួន ១៩២ ភូមិ (រាប់បញ្ចូលភូមិដែលបានចុះបញ្ជីតាមបទបញ្ជាលេខ ០១ បប) ចុះបញ្ជីចេញប័ណ្ណបានចំនួន ១១២ភូមិ (រាប់បញ្ចូលទាំងភូមិដែលបានចុះបញ្ជីតាមបទបញ្ជា លេខ ០១ បប) ។ កំពុងអនុវត្តមិនទាន់ចេញប័ណ្ណចំនួន ៨០ ភូមិ ក្បាលដីប៉ាន់ស្មានដែលត្រូវចុះបញ្ជីសរុប ១៥៤, ២៧៨ ក្បាលដី ក្បាលដីដែលបានវាស់វែងសរុប ៨១,៧៧៧ ក្បាលដី ។ ក្បាលដីដែលបានធ្វើការវិនិច្ឆ័យសរុប ៧៦, ៣២២ ក្បាលដីបានបិទផ្សាយសរុប ៥៧, ៨៦៨ ក្បាលដី បានចេញប័ណ្ណសរុប ៣៦, ៩៤៥ ក្បាលដី ប័ណ្ណដែលបានចែករួច ២៦,៥៨៧ ប័ណ្ណនិងមិនទាន់ចែកសរុប ១០, ៣៥៨ ប័ណ្ណ ដោយក្នុងនោះក្បាលដីបានវាស់វែងកំពុងបន្តនីតិវិធីសរុប ៨១, ៧៧៧ ក្បាលដី និងមិនទាន់វាស់វែងសរុប ៦៥,៧៨១ ក្បាលដី ។
គួររំលឹកផងដែរថា ៖ ចាប់ពីដើមអាណត្តិទី៧នេះ តាមការចង្អុលបង្ហាញរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ទាក់ទិននឹងកិច្ចការបង្កើតបរិយាកាសគ្មានវិវាទនៅកម្ពុជា ក្នុងនោះ ក្រសួងរៀបចំដែនដី នគរូបនីយកម្ម និងសំណង់ បានរៀបចំគោលនយោបាយមួយ គឺការចុះបញ្ជីដីបង្ហើយដែលបានធ្វើឡើងនៅទូទាំងប្រទេស ហើយមកទល់ពេលនេះនៅសល់ត្រឹមតែប្រមាណ ១៧ ម៉ឺនក្បាលដីទៀតប៉ុណ្ណោះដែលត្រូវវាស់វែងឱ្យបានចប់សព្វគ្រប់ ហើយក៏ត្រូវជម្រះបញ្ហាវាស់វែងដីធ្លី ដែលមានភាពឆកល្វែងពីមុនមក និងត្រូវបំពេញបន្ថែមឱ្យមានភាពល្អឡើងវិញផងដែរ ៕
ដោយ / គ្រី សម្បត្តិ
