ថ្ងៃទី១នៃសន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០ បានចាប់ផ្តើមដោយបើកសិក្ខាសាលាចំនួន៧ ផ្តោត សារៈប្រយោជន៍យ៉ាងសំខាន់លើវិស័យព័ត៌មានយុគសម័យថ្មី
(សៀមរាប)៖ ក្នុងការបើកសន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នៅលើទឹកដីអង្គរ ខេត្តសៀមរាបនាថ្ងៃទី២១ ខែកក្កដា ឆ្នាំ២០២៥ ដែលជាថ្ងៃទី១នេះ បានចាប់ផ្តើមធ្វើឡើងដោយបើកសិក្ខាសាលាចំនួន ៧ព្រមៗគ្នា ក្នុងនេះបានផ្តោតសារៈយ៉ាងសំខាន់ ទៅលើការវិវឌ្ឍន៍ នៃយុគសម័យឌីជីថល ការវិឌ្ឍន៍លើវិស័យបញ្ញាសិប្បនិម្មិត (AI)ជាដើម ។ នេះបើតាមការថ្លែងបញ្ជាក់ពីសំណាក់ ឯកឧត្តម កឹម គុណវឌ្ឍន៍ រដ្ឋលេខាធិការក្រសួងព័ត៌មាន ។
ឯកឧត្តម កឹម គុណវឌ្ឍន៍ រដ្ឋលេខាធិការក្រសួងព័ត៌មាន បានឱ្យដឹងថា ក្នុងសិក្ខាសាលានាព្រឹកថ្ងៃនេះដែរនឹងមានវាគ្មិនមកពីបណ្តាប្រទេសសំខាន់ៗពិសេសជាសម្ព័ន្ធភាពនិងដៃគូសំខាន់ៗ ដែលក្នុងនោះនឹងធ្វើបទបង្ហាញ និង ពន្យល់អ្នកចូលរួមទាំងអស់បានយល់ និងបានចំណេះដឹងក្នុងពិធីនេះផ្ទាល់តែម្តង។
ឯកឧត្តម រដ្ឋលេខាធិការ បានចាត់ទុកថា នេះពិតជាមានសារៈសំខាន់សម្រាប់អ្នកចូលរួមក្នុងការបានទទួលនូវចំណេះដឹងថ្មីៗនៃការវិវឌ្ឍន៍នេះបច្ចេកវិទ្យាទំនើបថ្មីៗដល់អ្នកចូលរួម ។
សន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នៅលើទឹកដីអង្គរ ខេត្តសៀមរាប បានចាប់ផ្តើមហើយ នៅថ្ងៃទី២១ ដល់ថ្ងៃទី២៤ ខែកក្កដា ២០២៥ នាសណ្ឋានគារសុខា ។ នេះជាការធ្វើម្ចាស់ផ្ទះលើកទី២ បន្ទាប់ពី លើកដំបូងកម្ពុជាបានរៀបចំសន្និសីទកំពូលស្តីពីប្រព័ន្ធផ្សព្វផ្សាយនេះមានលើកទី១៦ នៅក្នុងឆ្នាំ២០១៩ ដោយនៅពេលនោះគឺមានអ្នកចូលរួមប្រមាណជាង៦០០នាក់ មកពីបណ្តាប្រទេសចំនួន ៤៣។
ឯកឧត្តម នេត្រ ភក្ត្រា រដ្ឋមន្រ្តី ក្រសួងព័ត៌មានបានថ្លែងបញ្ជាក់ឱ្យដឹងនាថ្មីៗនេះថា សន្និសីទកំពូលប្រព័ន្ធផ្សព្វផ្សាយអាស៊ីលើកទី២០នេះ គឺដើម្បីពង្រឹងទៅលើក្របខ័ណ្ឌនៃការទូតព័ត៌មានចំពោះការទូតព័ត៌មាន គឺសំដៅទៅលើវិស័យព័ត៌មាន និងសោតទស្សន៍។ ចំពោះកិច្ចសហប្រតិបត្តិការនេះ ក្រសួងព័ត៌មាន ក្នុងនាមជាសេនាធិការរបស់រាជរដ្ឋាភិបាល គឺត្រូវចាំបាច់រុញតភ្ជាប់ក្នុងតំបន់ និងពិភពលោកតែម្តង ពីព្រោះបញ្ហាដែលជួបប្រទះរួម គឺព័ត៌មានក្លែងក្លាយ ហើយហានិភ័យនៃការកើនឡើងនៃព័ត៌មានកែ្លងក្លាយដែលបង្កើតឡើងដោយបញ្ញាសិប្បនិម្មិត (AI)។
ឯកឧត្តម ប៉ាង ណាត អនុរដ្ឋលេខាធិការនៃក្រសួងព័ត៌មាន បានឱ្យដឹងដែរថា ៖ ការរៀបចំសន្និសីទកំពូលស្តីអំពី”ប្រព័ន្ធផ្សាព្វផ្សាយនៅអាស៊ីប៉ាស៊ីហ្វិក”លើកនេះ ក្រសួងព័ត៌មានក៏បានរៀបចំគណៈកម្មការមួយ ដោយមានឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានជាប្រធាន។ ហើយ ក្នុងគណៈកម្មាធិការនេះមានអនុគណៈកម្មការចំនួន៤ និងលេខាដ្ឋានចំនួន១។ ដោយក្នុងអនុគណៈកម្មការចំនួន៤នេះទី១អនុគណៈកម្មការសណ្តាប់ធ្នាប់ និងសង្រ្គោះបន្ទាន់ ដើម្បីយើងទទួលគណៈប្រតិភូ។ យើងត្រូវតែមានការងារសណ្តាប់ធ្នាប់ មានការងារសង្រ្គោះបន្ទាន់ដោយ យថាហេតុណាមួយ។ អនុគណៈកម្មការមួយទៀតគឺអនុគណៈកម្មការ និងបដិសណ្ឋារកិច្ច។
គួរបញ្ជាក់ថា ការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ ដែលគ្រោងនឹងប្រព្រឹត្តចាប់ពីថ្ងៃទី២០ ដល់ទី២៤ ខែកក្កដា ឆ្នាំ២០២៥ នៅខេត្តសៀមរាបនេះដំណើរការនៃអង្គសន្និសីទ គឺក្រសួងព័ត៌មាន សហការជាមួយ វិទ្យាស្ថានអភិវឌ្ឍន៍ប្រព័ន្ធផ្សាយសោតទស្សន៍អាស៊ីប៉ាស៊ីហ្វិក ដើម្បីរួមគ្នារៀបចំសំដៅធ្វើយ៉ាងណាឱ្យរលូនល្អ និងទទួលបានលទ្ធផលជោគជ័យ៕
ដោយ ៖ ម៉ាដេប៉ូ
