យុទ្ធនាការផ្សព្វផ្សាយស្ដីពីការញែកសំណល់ និងកាត់បន្ថយប្លាស្ទិកនៅខេត្តបន្ទាយមានជ័យ
បន្ទាយមានជ័យ៖”រស់នៅស្អាត ភូមិឋានស្អាត សុខភាពល្អ ជីវិតរីករាយ អនាគតរុងរឿង”។នេះជាសារដាស់តឿនរបស់ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកព្រះនេត្រព្រះ ខេត្តបន្ទាយមានជ័យក្នុងឱកាសអញ្ជើញចូលរួមជាអធិបតីក្នុងយុទ្ធនាការផ្សព្វផ្សាយស្តីពីការញែកសំណល់ និងកាត់បន្ថយប្លាស្ទិកនៅស្រុកព្រះនេត្រព្រះនាដើមសប្ដាហ៍នេះ។
ថ្លែងទៅកាន់អ្នកចូលរួមជាអាជ្ញាធរដែនដី មន្ទីរពាក់ព័ន្ធ លោកគ្រូ អ្នកគ្រូ និងសិស្សានុសិស្សចំនួន២៥០នាក់ មកពីវិទ្យាល័យចំនួនប្រាំ ក្នុងស្រុកព្រះនេត្រព្រះ ព្រមទាំងឯកឧត្តម ប៉ាក សុខារ៉ាវុធ អនុរដ្ឋលេខាធិការក្រសួងបរិស្ថាន និងជាប្រធានគណៈកម្មាធិការដឹកនាំគម្រោង UN PAGE នៅបរិវេណសាលាស្រុក ឯកឧត្តម គង់ ច័ន្ទវាសនា បានបញ្ជាក់ថា យុទ្ធនាការនេះមានគោលបំណងលើកកម្ពស់ការយល់ដឹង និងការចូលរួមរបស់ប្រជាពលរដ្ឋ ជាពិសេស សិស្សានុសិស្ស ឱ្យយកចិត្តទុកដាក់ចូលរួមការពារបរិស្ថាន អនាម័យភូមិឋាន។ បែងចែក សំរាម និងកាត់ បន្ថយការប្រើប្រាស់ថង់ប្លាស្ទិក ដើម្បីសោភណភាព និងបរិស្ថានរស់នៅស្អាតនៅទូទាំងស្រុក ។
ក្នុងឱកាសនេះដែរ លោក ហឿន វីរៈ អភិបាលស្រុកព្រះនេត្រព្រះ បានឱ្យដឹងថា ស្រុកមាន៩ឃុំនិងភូមិ១១៨ភូមិ។មានប្រជាពលរដ្ឋសរុបចំនួន២៦ ៧៤៩គ្រួសារ ស្មើនឹង ១១០ ៣៨៨នាក់។ដោយឡែកសិស្សមកចូលរួមក្នុងយុទ្ធនាការផ្សព្វផ្សាយនាពេលនេះ មកពីប្រាំវិទ្យាល័យ រួមមាន វិទ្យាល័យឈ្នួរមានជ័យ វិទ្យាល័យទឹកជោរ វិទ្យាល័យបុស្បូវ វិទ្យាល័យជប់វ៉ារី និងវិទ្យាល័យរហាល។
តាមរយៈវត្តមានចូលរួមរបស់លោកគ្រូ អ្នកគ្រូ ពិសេស សិស្សានុសិស្ស, ឯកឧត្តមរដ្ឋលេខាធិការក្រសួងកសិកម្ម ឯកឧត្តមអនុរដ្ឋលេខាធិការក្រសួងបរិស្ថានបានបង្ហាញនូវរំពឹងខ្ពស់ ចំពោះលទ្ធផលនៃយុទ្ធនាការ។ឯកឧត្តម បានផ្ដាំផ្ញើដល់សិស្សានុសិស្សទាំងអស់ត្រូវយកទៅអនុវត្ត និងបន្តផ្សព្វផ្សាយទៅមិត្តភក្តិបងប្អូននៅមូលដ្ឋានរៀងៗខ្លួន ។ ត្រូវដើរតួនាទីជាគម្រូ៕
ដោយ៖ឃិន គន្ធា
