ភ្នំពេញ៖ឯកឧត្តម ថង សាវណ្ណ ភុមវិហាន (Thongsavanh PHOMVIHANE) រដ្ឋមន្ត្រីការបរទេសនៃសាធារណរដ្ឋ​ប្រជាធិបតេយ្យប្រជាមានិតឡាវ និងលោកជំទាវ នឹងអញ្ជើញមកបំពេញទស្សនកិច្ចផ្លូវការនៅព្រះរាជាណាចក្រកម្ពុជា រយៈពេលពីរថ្ងៃ ចាប់ពីថ្ងៃទី ២៤ ដល់ថ្ងៃទី២៥ ខែកក្កដា ឆ្នាំ២០២៥។

ដំណើរទស្សនកិច្ចផ្លូវការរបស់ឯកឧត្តម ថង សាវណ្ណ ភុមវិហាន រដ្ឋមន្ត្រីការបរទេសឡាវនៅកម្ពុជា ​ជាការ​តបតាម​ការអញ្ជើញរបស់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការ​អន្តរជាតិ នៃព្រះរាជាណាចក្រកម្ពុជា។

ក្នុងអំឡុងពេលនៃទស្សនកិច្ចនេះ ឯកឧត្តម ថងសាវណ្ណ ភុមវិហាន នឹងមានព្រះរាជសវនាការ ជាមួយ ព្រះករុណា ព្រះបាទសម្តេច ព្រះបរមនាថ នរោត្ដម សីហមុនី ព្រះមហាក្សត្រនៃ ព្រះរាជាណាចក្រកម្ពុជា និងចូលជួបសម្តែង​ការគួរសមដាច់ដោយឡែកជាមួយ សម្តេចអគ្គមហាសនាបតី តេជោ ហ៊ុន សែន ប្រធានព្រឹទ្ធសភា និងឯកឧត្តមកិត្តិ​សេដ្ឋាបណ្ឌិត ជាម យៀប ប្រធានរដ្ឋសភាស្តីទី។ឯកឧត្តមរដ្ឋមន្ត្រីការបរទេសឡាវ ក៏នឹងមានជំនួបទ្វេភាគីជាមួយ ឯកឧត្ដមឧបនាយករដ្ឋមន្ត្រី ប្រាក់ សុខុន ដើម្បីពិភាក្សាអំពីការពង្រឹងកិច្ចសហប្រតិបត្តិការ និងទំនាក់ទំនងកម្ពុជា-ឡាវផងដែរ។

ក្រសួងការបរទេសកម្ពុជាបានគូសរំលេចថា ដំណើរទស្សនកិច្ចផ្លូវការនាពេលនេះ បញ្ជាក់ជាថ្មីនូវការប្តេជ្ញាចិត្តរួម​ក្នុងការធ្វើឱ្យកាន់តែស៊ីជម្រៅនូវចំណងមិត្តភាពជា​ប្រពៃណីដ៏​យូរអង្វែងរវាងប្រជាជនទាំងពីរ។

សូមជម្រាបថា ឆ្នាំ២០២៤កន្លងទៅ​ទំហំពាណិជ្ជកម្មរវាងកម្ពុជា ជាមួយបណ្តាប្រទេសជាសមាជិក​អាស៊ានមាន​ក្នុងនោះមានប្រទេសឡាវផងដែរ មានទំហំទឹកប្រាក់ជាង ១៤,៣ពាន់​លានដុល្លារ​អាមេរិក ពោលកើនឡើង ១២,​៨ ​ភាគរយ បើធៀបនឹងរយៈ​ពេលដូច​គ្នាកាលពីឆ្នាំ២០២៣ ក្នុងនេះ កម្ពុជាបាន​នាំចេញ​ទំនិញ​​ក្នុងទំហំទឹកប្រាក់ជាង ៤,៦២០លានដុល្លារ កើនឡើង ៨,៨៧ ភាគរយ ,ចំណែក​ការនាំចូលពីបណ្តាប្រទេសសមាជិក​អាស៊ានចូលមក​កាន់កម្ពុជាមានទឹកប្រាក់ ៩,៦៨៩ លានដុល្លារ កើនឡើង ១៤,៨៥ ភាគរយ បើធៀបនឹងរយៈពេលដូចគ្នា​កាលពីឆ្នាំមុន។នេះបើយោងតាមរបាយការណ៍​ក្រសួងពាណិជ្ជកម្ម ៕

ដោយ៖មុនី