អ្នកនាំពាក្យក្រសួងការពារជាតិ៖ថៃចាប់ផ្តើមប្រើគ្រាប់បែកចង្កោមជាការល្មើសច្បាប់អន្តរជាតិ និងបង្ហាញភាពឃោឃៅពីការសម្លាប់មនុស្សគ្មានញញើតដៃសោះឡើយ
(ភ្នំពេញ)៖ លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានថ្លែងថាថៃបានចាប់ផ្តើមវាយប្រហារគ្រាប់បែកចង្កោមមកលើកម្ពុជាចាប់ពីព្រឹកថ្ងៃទី ២៥ ខែកក្កដា ឆ្នាំ២០២៥នេះដែលបង្ហាញពីការល្មើសច្បាប់អន្តរជាតិ និងឃោឃៅពីការសម្លាប់មនុស្សគ្មានញញើតសោះឡើយ ។
ថ្លែងក្នុងសន្និសីទសារព័ត៌មាននាព្រឹកថ្ងៃទី២៥ ខែកក្កដា ឆ្នាំ២០២៥នេះ លោកជំទាវឧត្តមសេនីយ៍ឯក ម៉ាលី សុជាតាបានឱ្យដឹងថានៅព្រឹកថ្ងៃទី ២៥ ខែកក្កដា ឆ្នាំ២០២៥នេះ នៅវេលាម៉ោង៣,២០នាទីទាបភ្លឺ ថៃបានវាយប្រហារគ្រាប់បែកចង្កោមមកលើតំបន់ភ្នំខ្មោច តាថាវ និងភ្នំ៣៣៣។ នៅវេលាម៉ោង ៥,២៥នាទីថៃបានប្រើគ្រាប់បែកចង្កោមវាយប្រហារមកលើតំបន់ភ្នំខ្មោច ។ម៉ោង ៥,៣០នាទីថៃ បានចាប់ផ្តើមវាយប្រហារនៅប្រាសាទតាមាន់ និងប្រាសាទតាក្របី ,នៅវេលាម៉ោង៥,៤០នាទីថៃចាប់ផ្តើមវាយប្រហារនៅតំបន់មុំ៣ ,នៅវេលាម៉ោង ៦,៥០នាទីថៃបានបាញ់គ្រាប់បែកចង្កោម លើកទី២នៅភូមិ តេជោធម្មជាតិ ស្រុក ជាំក្សាន្ត ខេត្តព្រះវិហារ ,វេលាម៉ោង៧,០៣នាទីថៃបាញ់ចូលគោលដៅជាំក្សាន្តផងដែរ ។ សម្រាប់នៅពេលវេលាម៉ោង ៨,០០នាទី ថៃបានព្យាយាមវាយប្រហារដណ្តើមយកប្រាសាទតាក្របីវិញប៉ុន្តែកងកម្លាំងរបស់យើងបានតស៊ូយ៉ាងស្វិតស្វាញ ហើយប្តេជ្ញាការពារឱ្យខានតែបាន មិនឱ្យការរំលោភបំពានមកលើដែនអធិបតេយ្យភាពកម្ពុជាបានឡើយ។
លោកជំទាវបានថ្លែងដែរថាថៃចាប់ផ្តើមប្រើគ្រាប់បែកចង្កោមវាយសន្ធាប់ដោយចេតនាដ៏ខុសច្បាប់មកលើទឹកដីកម្ពុជា។ភាពរំលោភដ៏កម្រោល នេះគឺជាការរំលោភយ៉ាងធ្ងន់ធ្ងរចំពោះច្បាប់អន្តរជាតិនៃអនុសញ្ញាស្តីពីគ្រាប់បែកចង្កោម។ការប្រើប្រាស់អាវុធបែបនេះមិនត្រឹមតែបង្ហាញពិភាពឃោឃៅនិងអនុមនុស្សធម៌របស់ថៃប៉ុណ្ណោះទេតែវាជាការឆ្លុះបញ្ចាំងឱ្យមើលឃើញថាប្រទេសមួយនេះមិនខ្លាចរអាច្បាប់អន្តរជាតិសោះឡើយ៕
ដោយ៖ម៉ាដេប៉ូ
