រដ្ឋមន្ត្រីក្រសួងកសិកម្ម បន្តសួរសុខទុក្ខប្រជាពលរដ្ឋភៀសសឹក នៅស្រុកអូរជ្រៅ ខេត្តបន្ទាយមានជ័យ
(ខេត្តបន្ទាយមានជ័យ)៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និង នេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋាន ខេត្តបន្ទាយមានជ័យ នៅរសៀលថ្ងៃ ទី២៧ ខែកក្កដា ឆ្នាំ២០២៥ បន្តសួរសុខទុក្ខ និងនាំយកស្បៀងជូនប្រជាពលរដ្ឋចំនួន ៣៦០គ្រួសារបន្ថែមទៀត នៅទីតាំងសុវត្ថិភាពស្រុកអូរជ្រៅ ខេត្តបន្ទាយមានជ័យ។
មកដល់ពេលនេះប្រជាពលរដ្ឋសរុបជាង ៩០០ គ្រួសារ បានភៀសខ្លួនចេញពីតំបន់ព្រំដែនអូរបីជាន់ មក រកទីតាំងសុវត្ថិភាពនៃស្រុកអូរជ្រៅ។ រាជរដ្ឋាភិបាល និងអាជ្ញាធរខេត្ត នឹងបន្តផ្ដល់ការគាំពារជូនប្រជាពលរដ្ឋដែលភៀសខ្លួនពីតំបន់ហានិភ័យខ្ពស់ ។
នៅរសៀលដដែល ឯកឧត្តមរដ្ឋមន្រ្តី ឌិត ទីណា បានបន្តអញ្ជើញចុះពិនិត្យស្ថានភាព និងសួរសុខទុក្ខមន្ត្រីប្រចាំការ និងពុកម៉ែបងប្អូនប្រជាពលរដ្ឋដែលកំពុងបន្តវិលត្រឡប់មកមាតុភូមិកម្ពុជាវិញ នៅច្រកទ្វារព្រំដែនអន្តរជាតិប៉ោយប៉ែត។
ឯកឧត្តមរដ្ឋមន្ត្រី ទទួលស្វាគមន៍ពលករបន្តចាកចេញពីប្រទេសថៃ មកកម្ពុជាវិញ ហើយថ្លែងអំណរគុណចំពោះអាជ្ញាធរខេត្ត និងមន្ត្រីប្រចាំការនៅច្រកព្រំដែន ចំពោះកិច្ចខិតខំប្រឹងប្រែងរៀបចំការដឹកជញ្ជូនទៅស្រុកកំណើត ការជួយស្វែងរកការងារ និងការផ្តល់សេវាសុខភាពដើម្បីសម្របសម្រួលឱ្យប្រជាពលរដ្ឋវិលត្រលប់ដោយរលូន ៕
ប្រភព ៖ ក្រសួងកសិកម្ម
