កសិករ ៧០គ្រួសារនៅខេត្តកំពង់ធំ ស្ម័គ្រចិត្តចូលរួមជាមួយសហគមន៍កសិកម្មទំនើបដើម្បីដាំដុះស្រូវស្រង៉ែស្រាល និង ស្រូវសែនក្រអូប
(ភ្នំពេញ)៖ កសិករក្រុមថ្មីចំនួន៧០គ្រួសារ ជាមួយនឹងផ្ទៃដីជាង ១០០០ហិកតា នៅឃុំសានគរ ស្រុកកំពង់ស្វាយ ខេត្តកំពង់ធំ ស្ម័គ្រចិត្តចូលរួមជាមួយសហគមន៍កសិកម្មទំនើប ដោយចំណុះឱ្យសហគមន៍«អភិវឌ្ឍន៍ដំណាំស្រូវកំពង់ធំ» ដែលជាសហគមន៍មានស្រាប់នៅក្នុងស្រុកតែមួយ។នេះបើតាមការលើកឡើងពីសំណាក់ ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ។
បញ្ជាក់តាមបណ្តាញសង្គមហ្វេសប៊ុក ផ្លូវការនៅថ្ងៃទី ៣០ ខែកក្កដា ឆ្នាំ២០២៥នេះ ឯកឧត្តម ឃឹម ហ្វីណង់អ្នកនាំពាក្យក្រសួងកសិកម្មឱ្យដឹងថា តាមរយៈការចូលរួមជាមួយសហគមន៍កសិកម្មទំនើបនេះបានធ្វើឱ្យសហគមន៍ទំនើបមួយនេះនឹងមានផ្ទៃដីលិតកម្មកើនដល់ចន្លោះ៣០០០-៤០០០ហិកតា។ ក្នុងរដូវកាលថ្មីនេះដែរប្រជាកសិករនឹងដាំដុះលើផលិតកម្មស្រូវស្រង៉ែស្រាល និង ស្រូវសែនក្រអូប ។
ឯកឧត្តម ឃឹម ហ្វីណង់ លើកឡើងដែរថា”ចាប់ផ្តើមបន្តការងារសហគមន៍នៅតាមមូលដ្ឋានឡើងវិញ ដើម្បីឱ្យទាន់ការបង្កបង្កើនផលរដូវកាលថ្មី។ មិនថាស្ថានការណ៍នៅតាមព្រំដែនបែបណាទេ ការដោះស្រាយជីវភាពប្រចាំថ្ងៃរបស់បងប្អូនកសិករយើងនៅតែចាំបាច់ ជាពិសេសការបន្តនិរន្តភាពនៃផលិតកម្មស្បៀងក្នុងកាលៈទេសៈបែបនេះ” ៕
ដោយ ៖ ម៉ាដេប៉ូ
